Инсан дюнйейлхъа къаховуна мигьман ворна. Манбышди гьаарункъухъабыб джуна ыlмрена йаlхъ вобна. Эвеляа, инсанын язы Аллагьыке аIслыда водун, гонер гьар инсан джуни бахтына устад вудджар ворна.
Дюнйейл’ сабара маIгьдын санаъаIтбы водунбы, манбы гьаъасдимее ацIалиле гъайре, сабыр, раIгьым, инсафийвалла вуккан. Мани инсанаршини йIкIее пахырийвал’на, кубытийвал’на, сарсахийвал’на, оIгунмишхьайна кIуда вухьес вуккан деш. МаIгьадни санаъаIтбышди аIрее гьийбна джига маъаIллимни санаъаIтна вобна. КьоIдъэсыд, медни санаъаIтбышисын диб ши ооъад увгьойни санаъаIтын гийххьи. Дюнйейл’ сабара маIгьдын санаъаIтбы водунбы, манбы гьаъасдимее ацIалиле гъайре, сабыр, раIгьым, инсафийвалла вуккан. Мани инсанаршини йIкIее пахырийвал’на, кубытийвал’на, сарсахийвал’на, оIгунмишхьайна кIуда вухьес вуккан деш. МаIгьадни санаъаIтбышди аIрее гьийбна джига маъаIллимни санаъаIтна вобна. КьоIдъэсыд, медни санаъаIтбышисын диб ши ооъад увгьойни санаъаIтын гийххьи. ДжамаъаIтни балей аахвани инсанарашини гьаIкIей одкIуний, манбыше къеджен ишбы гьагуй ва манбышин до югвалис агъмишауй йишин бордж водун. Мани джаргее Мишлешни мактабна маъаIллим Мамедов Нуруллагь ШаIъбанна дих ворна. Эгьес эйхьи, манкъуна ыIмыр шадна, марахукана, бахтыквана вухьа. Августни 26-чил’ Нуруллагь маъаIллимыс 80 сенийн юбилей ва 60 сен маъаIллимын санаъаIт гьаъан быкырехьи.Ши маIъаллимни санаъаIтыс кIыл’валла гьавъу, Нуруллагь маъаIллимна гьуIрмат гьувааджы, къийнийна йишда макьале манкъуни ыIмрес, къуллухыс къавайсар вобна.Ши гыргыба мактабеенче хъигъебчIы. Мани аIкIел’ гьоолени хаан шас ыIмырна хъобкуна йаIхъ гьаагу. Шаваа нягьаIд манчике истифада гьаий, инсанни гьаIракатбышике аIслыда. Анджах маъаIллимна дараджа гьаммаше ахтыба вухьес. Мамедов Нуруллагь ШаIъбанна дих Мишлешни хивее 1941 ъэсди сенни августни 26-чил’ едике ыхьа. Ушахийвалла джуни тай-тушершина хьинне хивееъаб абкIын. 1959 сен Мишлешин йыIкьнекин мактаб таамау, са сенна мани мактабее дагъайдни сыныфбышис дарсбы гьуво. 1960 сен мана Ставропольни девлет педагожи институтни естественно-географиейни факультетехъа иккечIу. 1965 сен ман институт таамау , маъаIллимна ишлемишехьи гиргъыл’. Мактабее ишлемишехьи гиргъылийнкъаI эскереехъа, Ватаныс бордж хъелес, хъортIул’. Са сенна эскерийвалее къуллух гьавъу. Эскееренче хъарыйле хъийгъа, къийнийни йигъылхъаме манкъвее джуна ыIмыр манзил’ гьидявъу маъаIллимийвалис къабсыр. Къийнар мана агъсаххъал Мишлешни мактабни маъаIллимаршини джаргее ворна. Манкъухъаб 60 сен маъаллимни санаъаIтна стаж вобна. Мани сенбышди аIрее кьоIни элейс директорна сечмишау. 8 сенна директорыйвалла гьавъу. 18 сенна мактабна завучна , 20 сенна мактабна тербиейна ташкилатчийна ишлемишхьа. Къийнар гьамани къуллухыл’ ворна.Гьел’бедти, гьоIкуматыныд манкъун маъаIллимын, директорын, завучын гьаIракатбы, баджарагъбы кIелиханау деш. Районни хъаIдхъийни управлениейни, Дагъыстанни хъаIдхьийни ва ыIлимни министерствайни , РФ-ни хъаIдхъийни министерствайни сураке мана грамотабышис, дипломбышис лайикьау. Нуруллагь маъа1ллим РФ-на, ДР-на «Отличник образования» ва « Почётный работник в сфере образования РФ» ворна. АIсас манкъуни ыIмрена девлет, джуна хизан ва вуджее дарс гьувойн телябабы вобунбы. Къийна манкъвее дарс гьувойн инсанар джурабаджур чIакIни къуллухбышил’ ишлемишоохьи. Гьаарна хизанбышин сагьыIбар вобунбы. Манкъуни телябабышди аIрее доюкан ва гьуIрматукан цIаIхбы – РаIгьимов ХанмагьаIммад, Бабаев Баба, АIлиев Шарафуддин, ГьIаджиев Тааджиддин ва мебынбы вобунбы. Хизан , Нуруллагь маъаIллимын маIгькамын далы водун. Джуни раIгьматтыгъ ёлдашиква Гул’ханумыка саджигее гьалални къыкыл’ 8 ушах ( 6 гаде, 2 ичий ) чIакIы хъавъу, манбышис хъаIдхъий гьувы, эвлемишавъу. ГьаIшде манбышихъад джон санаъаIтбы, джон хизанбы водунбы. Манбышди аIрее эскерна къуллух гьааъанар ворна.Ши, цIаIхбы (йихъбы), гьаммаше йишди саватукани, камалукани, абырыквани маъаIллимаршиле гуянмиш вухьа. Манбы шахъаб гьар вахтал’ еттигъба вухьайнбы. Къийнийни йигъылиб мактабей, аали мактаббышей миллетын, республикайн, оIлкайн до ахты хъаъан маъаIллимар кIыл’ба дешобонбы. Манбыше джони ишиква, санаъаIтыс кIыл’валла гьавъуйка, гьалалын къык одхьуний субут гьаъа водон. Гьел’бедти, манбышда сайир йишди макьалейна кьаIгьраман ворна!ГьуIрматукана Нуруллагь маъаIллим! ЙикIейнче гъу юбилейква табрикаъа. Вас джанана сагъвалла, хизаныс баракат аIрзуламишаъа. Вас ацIааликван , тербиейкван ушахар чIакIы хъааъас джанана сагъвалла, хылийна ыIмыр гьевлена !
