Гьар сен цывлихъа, сентябрьни цIеддыйни декааде, аIдатеехъа гидхьу Дагъыстанее ва медни Россиейни республикабышил’, вилаетбышил’, шагьарбышее Дагъыстанни шааирыс Расул Гьамзатовыс къассырыйн «Джагварани дурналаршин йигъбы» алгъайгьи.
Ман джамаъаIтбышди аIреедын адабиятын фестивал’ ЮНЕСКО-ни мислягьаIтыква алгъайгьи. Мани йигъбышил хъаIдхъийбы , адабиятын маджлисбы, шааираршикван горушбы, китаббышин гьагуйбы, тематик горушбы ва концертбы илгъечIи.
Гьайни сен Дагъыстанее ман йигъбы сентябрьни 8-чил’, Расул Гьамзатов едике ыхьайни йигъыл’ гидгъыл. Йишди республикеехъа хаIбна шааираршина, язычершина десте ман йигъбы ярашугъыква алгъагьас Российни регионбышенче абы. Абыйн мигьманар мичIееб чакба Тарки-Тауйни тапылхъа, Р.Гьамзатовни нюкьнелхъа тIетIбы гиххьес гьабкIын. Махъа гьабкIынбышди аIрее ДР-ни правительствайна къуллухчера, ДР-ни парламентын депутатар, Россиейни язычершини Союзын уIзвыбы, Беларусенче, Сириенче, Крымыле, Башкиренче абыйн шааирар, сайиб Р. Гьамзатовын достар, гогьарбы, дёлесинбы вухьа. Хъийгъа манбыше тIетIбы Республикайни Урус драмтеатрни гьийб гивхьуйни шааирни гьаIйкални авхъа гиххьы.
Гьамани джаб йигъыл’ абыйн мигьманр — шааирар, язычер республикайни аали мактаббыше вухьа. Манбы телябабышиква , ааIлимаршиква горушмишивхьа. Мааъад илгъечIуйни маджлисбышее шааирарше джон тезеда одкIунийн шечIбы хъаIдхъы. Россиейни язычершини уIзвее Х. Мамедове джуни чихыш ДДПУ-ни утагъее гьаъанкъаI увгьойн: « Р. Гьамзатовын до быкырни дюнйейл’ дойикани шааирын хьинне ацIа водун. Манкъуни шечIин « Журавли» адабиятни гьаваскараршини йикIбыше кIоран едигар гьассыр. Къийна Россиейни язычершини союзын Дагъыстанни миллетбышди шааирашин , язычершин асарбы урусни мизелхъа сакIалаъа водунбы. Мана иш ши гьалеб гуджлемишааъас вуккан . Инам гьаъан, гьоIкуматни суракед мана иш къавджес кумаг ихьесын…».
Мани маджлисее Россиейни регионбышди язычершини союзын уIзвыбы , шааирар йишонавъу. Шааирарше, язычерше, адабиятни критикарше Расул Гьамзатовни поэзиейс хабна кьиймат гьувы.
Хаарыджий оIлкайле ва Россиейни субъектбышиле абыйн шааирар Дагъыстанни телеверлишбы ыккекани студиебышехъа, кIазитбышди, журналбышди студиебышехъа горушис хъобтIул.
Сириенче арыйни шааире джуни чыхышее увгьойн: « Расул Гьамзатовын до быкырни дюнйейл’ дойикани шааирын хьинне ацIа водун. Манкъуни шечIин « Журавли» адабиятни гьаваскараршини йикIбыше кIоран едигар гьассыр.
Гьамани джад йигъыл’ , саъаIт 18-чил Поэзиейни Хааъаб шааираршина маджлис гибгъыл. Мана маджлис Дагъыстанни язычершини Союзни садре МаIгьаммад АIгьмадове вукку. Манкъвее хааиш гьауйн абыйни шааираршис джон шечIбы ва сакIалауйбы друстда хъаIдхъас. Мани маджлисее доюкани Россиейни шааирарше джон джурабаджур , гьар тематиквайкан шечIбы хъаIдхъы, Джона джувабна устадыйвалла гьаагу. КьоIдъэсди йигъыл’ абыйн мигьманар хьебни дестейлхъа джуребхьа , Гунибхъа, Хунзаххъа, Дербентхъа гьабкIын. Манбы мааъаб джамаъаIтыква горушмышивхьа ва адабиятын тамашебы алгъавгьу. Абыйн мигьманар гейб разийба авху. Шинаб делесийваленче фестивалеехъа арыни Россиейни язычершини союзни катибыква, доюкани шааирыква танышивхьа ва адабиятни гьаIкIее йишонавъу.
