Къийна республикайни хивни тасарруфатни министерствайн хиваршее ешемишоохьени инсанаршин ешайиш юг хъаъасдиме манбышин джан тавул’ гьуваджесдимее джурабаджура проектбы, программбы ишилхъа адачи водунбы. Мани программайни кумагыка гьайни дёлесийвалей Гыл’мецlни хивее футболын майдам аляъа гибгъыл.
Цlаlхыйни дерайл’ маlгьдын майдам аляъасын гафбынан хаlбба вахтный. Мани мисалайс цlебба фыкыр «Нур» кlазетын гьуво. Цlедда маlгьдын футболун майдам Муслагъныйий Мишлешни хивни аlрее аляуй назарее аххъы ыхьа. Амма администрациейбышин вукlлелинбы мыlслягьатейхъа хъидябыйхъа гора мана иш джигайле ивийкыр деш. Гыл’мецlбы мани ишис гьаlракатыква делес хъувхьа. Манчихъа гора, футболун майдам манбышис кьисматхьа.
Гыл’мецlни хивни джаванаршихъад футболулхъан гьавас гьаммаше ыхьайн. Къийна садджу Магьаlчкъалайни шагьарее гыл’мецlбышихъаб ёкьубле футбол гьуваагана команда вобна. Манбыше гьаммаше шагьарее алгъааlни джурабаджура чемпионатбышее, турнирбышее иштыракаъа. Манчиле савагьийда, хивни джаванаршихъабыб уфтанна футболна команда вобна. Манбыше районни турнирбышее гьаммаше ахтыйн джигабы аххъаххъа.
Гыл’мецlни хивни джаванаршини увгьойка, хивее футболун майдам аляуй хошна хабар вобна. Ман итаамхьайка, джаванаршини аlрайл’ мани оюнулхъан маарах сыкlылдад хаlдхъихьес. Манчиле гъайре, мани майдаме джурабаджурайн чемпионатбы, турнирбы алгъагьас ихьесынбы.
Къийна мааъад гуджнада тикинтийн ишбы кьеджи водунбы. Манчин заказчик ГКУ РД «Дагсельхозстрой» водун. Ишбы ООО «Антстрой» ыккекка. Дагъсельхозстройн ташкилатни отдел’на хааlрна Ризван Мирзоевни джуваббышихъа гора, тезе аляъани объектыс пыл Республикайни хазнейнче къайиккы водун. Манчина кьиймат 8, 1 милйон манат вобна. Футболун майдам гьайни сенни аlхырейххъассе аляъас назарее аххъы водун.
Гьаlшде устадар яваш девхьа ишлемишувхьесдиме джигайл’ гьеххаалика тикинтийн материал водун. Къийна манбыше майдамна гьиххъийалла магьаlджарейхъа саъа. Манчиле хъийгъа, майдамни адыйн ишбы ыккейс. Сабара дагъамийваллабы тикинтийн материал гьаххъанкъаl ыхьа. Гыл’мецlни хивни аlрайл’на йаlхъ даркашба вухьайхъа гора, материал гьаххъан машинбы дагъамда илгъечlу.
Тикинтийе ишбы бригадир Рамазанов Рамазанее, устадар ДжуIмаев Рамиль, Мирзоев Гул’мураде, Имранов Махмуде, Рамазанов Магьараме ыкека.
Гыл’мецlни хивни джамаъаlтын тезеда аляъан футболын майдам таамхьайн йигъ хаlнни гьавасыква гозетяъа водун. Джаванаршини фыкрее мааъад цlедда Цlаlхыйни дерайл’ни хиваршини аlрайлин чемпионат алгъавгьуй водун.
Гьалекийс тезеда аляъани объекте устадар яваш девхьа ишлемишоохьи вобунбы. Манбышди фыкрее мыкlаал’бы гигъалассе гибгъылна иш быкыравъуй вобна.
