КьоIдъэсын сен водун кIыреенче сесбы, мизеле джуваббы – «коронавирус», «пандемия», « штамм», «карантин», «локдаун» ва медынбы. Ман джуваббыд тезеба дюнйейлхъа абыйни чIырвалин яратмишау. Мани джуваббышиква лугъат хаIдхъыхьа. Анджах мани джуваббышин джанеехъа инсанаршини вас-вас абы.
Эгьес эйхьи , быкырни дюнйейн къурлуш, инсанаршин ешайиш охале къаъадчийн. Мани чIырвалин садджу джанас джад деш зиян гьуво, манчин инсанаршин фыкырбы, нервыбышда система, хасиятбы бадалау. Манчин хаIббанани инсанаршин ыIмырбы ыккы. Фыкреедын мураадбы быкыраъас имканбы гьуво деш. Гьаарна са аIджалыква аркIын. Манбышди аIрее шакIле ваацIан инсанарыб вухьа. Гьел’бедти , сабара джигабышее мани чIырвалис оIги инсанарше джо гьувы. Зы шос са закIле кьайиххьыйнчина ва къаджейнчина са гаф гьааъас:
КъыIлина зы хъортIулна са закасана университете ишлемишхьайни гьамбазни йищени даватбышеехъа. Манке зас кьисматхьа деш оIххъас. АIреенче сабара вахт абкIынмее зы манкъус барака гьааъас ва даватбышда пай гьевлес ишилхъа джар эчIу. Мааъад хъидгIын-алидгIунбы гьауйле хъийгъа, гьинкъвее зас хабарааъа:
— Зас къыIлина гьаыйин даватбы уленче хъады. ЦIерра зы даватбы гьаъасын утагъ тIабалаъа ийкыр. КьоIдле –хьебыдле утагъ бадалаъас гидхьу. Анджах мана деш аIсас дагъамийвалла вухьа. Даватбышиххъа аIкьананче, хиваршеенче йизын, хьунащейн гогьаргьамбаз ады. Манбышди аIрейир са чIырына едаршина йихьа. Мана даватбышиле гьихъа арыйнкъаI, кIоссабыйий гьаъа ва гягьаIраххъайий. Арыйни шункъаI инсаныкIле нягьаIдне эгьес : « Гъу чIырыра вор, ейра хаахъа..» Хатирек хъидёотIас хьинне ши маIнкъыке хъидгIын гьауйнкъаI: « Гъу чIырыра каране ворна?», маIнкъее джаваб хъуво: «Зы югра ворна. Шос заке къорху дешда». Шинад манчилхъа инам гьауйн. Анджах манкъыIхъаб къыздырма вухьавоб. ВакIле ацIанде, йишин инсанар…. Сана’санкъус хуIваабакIа, убабы гьаъа. Даватбы гийгъални йигъыл’, мичIеер йизда ед’ бирданхьессе чIыры хъайы. Гьинкъее джена гьаIл бадалааъа гибгъыл. ХъобтIулыйнбы ваацIан дохтурар. Манбыше шак гиххьы, короновирусни чIырвалилхъа. Хъийкына мана больницехъа. Гьини батее абыйн сабара мигьманарыб чIырыхъувхьа. ДжитIада, нягьаIдмы ман даватбы илгъечIу закIле къадже деш, не ацIахьа деш. Са къел’ больницайни маIгьалле ыхьа, са къелид даватбышди утагъее. КьоIни йигъыле зынар, хьунащер, арына Урсиятыле чоджир чIырыхъавъу. Чодж гьамани джар йигъыл’ аркIынна, зынар йыIкьра коронавирусыка чIырыхъыхьа больницеехъа хъыккы. ХъикIуйнийий ахуйни аIрее са кIиваIна перданий авху. Захъад инам ыхьа деш , мани чIырывалике зы къидтийхьанва.
Сабара йигъбышиле закIле къийххьи, ед’ раIгьматыххъа аркIын. Заке мана бастурееъэни йигъыл’ оIххъас аIхы деш . Эйгьи дишеки : « Баляа текба абайлена дешки». Сабара йигъбышиле Урсиятыл’ ешемишехьена чоджир раIгьматыххъа аркIын. Манкъус инфаркт ыхьа. Багьнаб мана чIырвалла вухьа. Вазнамее зы больнице къалирхьу. КъекканкъаI, захъад са баркIвбыйий кьабыхий аху.
Кьийнар гьале зы залхъа хъары дешорна. Мани чIырвалин йизда ыIмыр кьоIни суралхъа хъавъу. ОIгийл’ манчин хабарбы гьаъанкъаI, зы инам гьаъа ыхьа деш. Не профилактик ишбы, не вакцина уIвхы деш. Анджах закIле мана баляа къавджена, менни шавукIле джаб къидёоджена. Хьунащее, ушахарше мана чIырвалла къелил’ алгъавгьу.
