Къийна дюнйейл’ пандемиейкена дагъамна вазият яранмишувхьа вобна. Манчин инсанаршис диндж гьели деш. Чlырываллайн оlги садджу вакцинайн алятlасКъийна дюнйейл’ пандемиейкена дагъамна вазият яранмишувхьа вобна. Манчин инсанаршис диндж гьели деш. Чlырываллайн оlги садджу вакцинайн алятlас

Къийнийни йигъыл’ вакцина гьавъуйнбышди аlрайл’ кьомана джига маъаlллимарше авхъаххъа. Манбыше нишиледжаб хъидаlбкьыlн цlебба вейбар ыlхы. Гьаlшде маъаlллимарше вакцина гьидявъйинбышикlле, агар джанана сагъвалла вукканхьей, вейба ыlвхас лазымбава эйгьи.

Ферзаlлиев Джуlма Идрисна дих  Тезе муслагъни хивни йыlкьнекни мактабна камалукани джаван маъаlллимаршина са  ворна. Мана гьинчиле сабара вахтна гьихъа завучни къуллухулхъа  хъары. Манкъуни фыкрее мактабна дараджа ахты хъавъуйнимее, геледжагъыл’ назарее аххъыйн хаlдда ишбы водунбы.  Манбы ишилхъа адчесдимее  манкъве цlедда мактабни коллективна, махъа хъавайлени ушахаршина, хивни джамаъаlтна сагъвалла гозетяаъа. Манчихъа гора, Джуlма маъаlллим вакцина гьавъуйнбышда цlеррийна са ыхьа.

Манчини гьаlкlее гаф гибхьыйнкъа, Джуlма маъаlллиме увгьойн: «Коронавирусни чlырываллайн хаlбба инсанар начахавъу, гьаба­тlанбыб кlыл’ба вухьа деш. Манбышди аlрайл’ закlле ваацlанбыб вухьайнбы.  Манбышис раlгьмат къихооли. Шахъабыб чlырыхъувхьесын гичl аlрайле абкlын дешда. Мана баляа садджу вакцинациейн явашааъас. Гойне хьинне, йишди мактабыхъад хаlдын ва мугьуlбыкан коллектив водун. Маъаlллимаршди гыргынкъве вакцина гьавъуна. Сабаранбыше эйгьи вод, джаванаршис коронавирусыкена къорху дешда. Мани ихтилетыле зы разийра дешда. Мани  азарын хаlрна-кlыл’на гозетяъа деш.  Геледжагъыл’ ман дехьесдимее, вахтал’ аlгьтият гозетяаъас вуккан. Манаб садджу чини вахтал’ гьавъуна вакцина вобна. Инсанаршина сагъвалла гьаlмагьаб гьуваджес ваахаlс».

Гойне хьинне Джуlма маъаlллиме мактабни къийнийни йигъыке зас гаф гьавъу. Ушахаршис гьелени ацlаалике, дагъайдни сыныфейхъа хъавайленбышис гьелени къуlмани одхьунийке аlтрафлы маlълумат гьуво.

Зы редакциейни доюле  Джуlма маъаlллимыс угъурбы, фыкрее аххъыйн ишбы быкыраъас джанана сагъвалла аlрзавъу.