Калел’ни хивни йыlкьнекни мактабни дагъайдни сыныфбышее хъаlдаххъани шигыртарыб  23 феврал’ни байрамни йигъыс гееб югба  гьаlзирувхьа. Ушахарше марахукван йигъынджах гьаlзирау. Манбыше 23-ъэсди февралыс  къасссырийн шечlбы хъаlдхъы, тамашебы гьагу, маlънийбы гьау.

Дагъайдни сыныфбышейхъа хъавайленбыше мактабын палтар эскераршинформайка бадалау. Эскераршини кlатлени формайн гадебышисий ичершис уфтанийвалла гьуво. Йигъынджах цlеддыйни сыныфни шигыртарше аахъы. Манбыше  дестейка эскераршис къабсырна маlъний гьавъу. Гойне хьинне гьарынкъве джурайба шечl хъаlбхъы. Кьоlдъэсдыйий хьебыдъэсди сыныфни ушахарше ватан къорамишааъанбышис  тамашебы гьагу.  Ёкьудъэсди сыныфейхъа хъавайленбыше эскерийвалике йишонебхьа.

Ушахаршис дарс гьелени маъаlллимаршини увгьойка, чlакlынбышиква саджиге хурни сыныфни ушахаршед мактабее алгъани гыргыни тадбырбышее иштыракъан.  Хурунбышихъад мани саягъыл’ни тадбырбышис, йигъынджахбышис  хаlдын марах  гьаагва. Гойне хьинне, къийна иняхъа сабыйни ушахаршин геллесынкъун деккяр военныбы вобунбы. Манбышда гьаарна са сурал’ хидмат вуккекка вобна.  Манчихъа гора, ушахаршис  23-ъэсын феврал’ энки хошун байрам водун.

Йигъынджахни аlхырее маъаlллимарше ушахар табрик гьавъу.  Манбышис хъаlдхъее угуъурбы аlрзау. Геледжагъыл’ югун эскерар вухьесдиме хъаlдхъыйлхъан аlшкь  сыкlылдад гуджламишаъас  ушахар хъобтlул.  Манчиле хъийгъа, махъа сабыйннбыше санаб «Катюша» маlъний гьавъу. Акьвал’ ахъаlнайква ушахар хайбышейхъа абкlын.