1 июнь ушахаршини къайгъвее аахван Йигъ водун. Манбышди гьаIракатбышике, аляатIани тербиейке, ацIаалике дюнйейн геледжагъ аIслыда водун. Сагъни кокал’, сагъна йив аляалена ва манчиныб югна мейва гьооли. Агар кок хъыIвчее, йивыб къурухъоохьи. Инсаныр мани йивыка тутушмишаъас эйхьи.
Дюнйейлхъа къаховуйни нафас аляатIани ичIудни карбышихъад чин балабы эйхьи. Фагьамыхъа ил’дяакы, гьаарынчис чина бала эн аIзизба вобна. Зас ман эгьес ыккан, гьаар инсаныкIле джун ушах энки уфтанда къеджи. Анджах манчихъа илдяаку, ушахаршилхъана рагьыIм девхьай аддымыс-адымыс хъызаахана. Ушах ухой хаIдын гьунар дешодун. Эн дагъамна ва вааджибна иш мана тербиейква хаIр хъауй, манкъус одхьуний, аляуй гьувой водун. Ушах гьоIкуматын геледжагъ водун. Манкъуке дохтурыр, маъаIллимыр, эскерыр, президентыр эйхьи. Ушахар зинджирын эн кIиваIн джига водун. Зинджир ваяхуд мык цIедда кIиваIни джигенче хъоха. ОIлка дагъылмишехьенкъаI, даIвъий гибгъылыйнкъаI, чIырвал’бышин эпидемиябынанкъаI, декий ед’ сана-санкъука ёла хъыIдяаIнкъаI, цIеддыйн уцIур ушахаршис хъетIа. Къийна етим ушахаршин интернатбы гяцIы водунбы. Ушахар мал хьинне манче масса гьооли. Ед’, дек’ сагъба летти манбы етимаршини хайбышехъа хъооли.
Хьулейре ушахне къийна дюнйейл’ мыссына ворна, хьулейре инвалидне ворна, хьулейре хав-уджагъ дешда, хьулейре наркоман ушахне ворна?! Ман шакIле , чIакIынбышикIле, къайиххьес ыккан деш. Манчин тахсиркарар едяарий деккяр, паччагьарый оIлкабы водунбы. Инсанар, инсаф гьеъэ, даянмишивхье! Мани дагъамийвалилхъа улеббы гимадахха. Баляфхъаб адрес воохьена дешки. Мункум вобна, къийхъа вушди хаахъа аблес. Ушахын аIхъана дешин хав, хав дешодун. Ушах дешда хизан , хизан дешобна.
Сенис июнни санчил’ йишди гьоIкуматыл’ ушагъаршин Йигъ алгъайгьи. Мани йигъыл’ джурабаджур ушахаршис къадсырыйн маджлисбы, йигъынджагъбы илгъечIи. Гьел’бедти, йишди республикейид джурабаджур майдамбышее, паркбышее ушахаршис къадсырыйн акциебы илгъечIи.
Гьайни сен, июнни 1-чил’ Гыл’мецIни хивее фонд «Инсанын» хивни гыргыни ушахаршис байрам къурмишаы. Хивни имамни АIсадуллагь гьаIджийни увгьойка, ман байрам ушахаршис къурмишаъас ишкар Адил Давудове кумаг гьувы. Гыргыни хивни ушахаршис манкъвее кIанфит’бы, кIалит’бы ва медын ширынныгъ битIалау. Ушахар манчиле гееб шадебхьа. Шадоохьен ушахар , гыргынчиле югда водун. Манбышди йикIее гьаммашийс маIгьдын йигъбы ахванбы. АIсадуллагь маъаIллиме ушахаршиква тербие, маIърафат гьелена гаф гьавъу. Гойне ушахарше саджигеедын шикыл’бы цIыцIаы.
Зас гыргыни дюнйейл’ни ушахаршини акьвале аIхъана кам дехьай ыккан. Шадна ыIмыр шохъаб вухьена! ДаIвъийбы шокIле мысаджад къидедженбы!
