Устадыйвалла цlаlхни халкьына архайле архайлхъа илгъочlена пеше вухьа. Гьихъа мани санаъаlтылхъа аlшкьнан инсанар гыргыни хиваршее растына хъавайленбыний. Къийна замаана бадалувхьана. Манчиква хаlдда карбы бадалхьа. Гьаlшде оlгийл’ хьинне инсанаршис йыlкьни ишил’ ишлемишувхьес вуккан деш. Хаlббананбыше сибыкна иш тlабалааъа.
Муслагъалий Шаlъбанов Семед дайий устадни санаъаlтылхъа хъарына хаlдда сенбы водунбы. Къийна мана са агъсаххъал ыхьейир, хаlдни гьавасыква устадна иш къооджи. Мана нишиледжар хъидаlркьын, дагъамни ишил’ ишлемишехьена, джуни санаъаlтылхъа хаlдын марах гьагва.
Уста Семед дайий Дагъыстанее, Азербайджан югра ацlа ворна. Манкъве гьавъуйн ишбы гыргынанкъаl растына хъайленбы. Манкъуни ишис гыргынбыше ахтына кьиймат гьооли. Манкъуни гьаlкlее гаф гибхьыйнкъаl эйгьен : «Семед гьаlкlера устадыйвалис ирхьуна инсан ворна. Манкъун хылеббы къизленбы водунбы. Мана хылес сибыкна, фыкрес кlорна устад ворна».
Мана едике Муслагъни хивее ыхьа. Манкъуни увгьойка, вудж едике ыхьайн сенбы хизаныс дагъамынбы ыхьа. Манчихъа гора, хивейнче геллесын хизанбы Аlранейхъа кочмишехьи ыхьа. Джон доланаджагъ юг хъаъасдимее Муслагъни хивейнче хаlдда хизанбы абкlын. Манбышике сабарабы шагьарбышее явашувхьа. Авхуйнбыб Муlхаlхни, Къымырни, Кlатехни хиваршейхъа сабы.
Семед дайийни деке, Магьаlммад дидее, юрд Кьымырни хивее абчы. Мани сенбышике гаф гьааъанкъаl, устадее хаlдда марахукван ихтилетбы йикlел’ хъаляъа.
— Йишда хизан хаlбна вухьа деш. Къымырни хивейхъа хъабыйнкъаl, ши хурун ушахарний. Ши сувал’ едике вухьа. Амма еш кагъызбы Азербайджан алятlу. Манке гыргынкъуни ушахаршин едике вухьайн сений йигъ са къайдайл’ одкlун. Манке шавааджад манчис фыкыр гьуво деш. Шакlле ши са йигъылинбы вухьай аlрейнче хаlдда сенбы адкlынийле хъийгъа ацlахьа. Гьаlшде ши гьар сен са йигъыл’ едике вухьайн йигъ алгъайгьи.
Уста Семедна ушахийвалла Къымырни хивыка багълыба. Йыlкьнекин мактаб быкырауйле хъийгъа, манкъве санаъаlтбы Закаталайни политехни техникумейхъа хъуво. Ман хъадхъыl къаттитхьынийле хъийгъа, ишлемишхьес Украинейхъа йаlххъыл’ гьау. Сабара гагьна Кривой Рогни шагьарее чалышмишхьа.
Семед дайийн устадийвалилхъан хаlдын гьавас эскерей хидмат гьаъаани сенбышее гидгъыл. Манкъве Саратовни вилаетни Энгельсни шагьарее тикинтийн ишбы ыккеккани батальонее хидмат гьавъу. Манке вудж гьам кафель гийхьена, гьамыр сантехникайн ишбы гьаъана устад ыхьа. Эскерийвалла быкыравъуйле хъийгъа, мани санаъаlтылхъан аlшкь сикlылдад гуджламишхьайн. Гьаlшде устадыхъаб Дагъыстане гьеххаалика иш вобна. Манчиле гъайре, мана районбышейхъар ишлемишхьес гьайкlанна.
Сечмишауйни санаъаlтыле гаф гибхьыйнкъаl, Семед дайей эйгьен: «Йизын къык устадыйваликва багълыда. Зы ненкеджар ишиле хъаlркьынна деш. Гьар вахтал’ хылехъа алябтlуна иш уфтанба, чини къайдайл’ гьааъас чалышмишхьа. Гьасре гьавъуйни ишис кьиймат инсанарше гьевледжин».
Семед дайийхъаб гееб уфтанна, маlърафытыкана хизан вобна. Манбы Закаталайни районее ешемишоохьи вобунбы. Манкъве ёлдашика саджигее ёкьуйре ичер хаlб хъавъу, эвле-атта гьавъу. Йишбышикlле дек’, невабышикlле дидей къидеджена хаlдда сенбы водунбы. Сергьадбы утlумда ыхьайхъа гора, инсанаршин ивийкырий явашхьа водун. Манкъуни фыкрее гьайни сен манбы къавджес гьаркlыний вод.
«Нур» кlазетни редакциейн Семед дайий ва авхуйн тикинтийни отраслее ишлеми воохьенбы санаъаlтни байрамыка табрик гьааъа. Манбышис хылийна ыlмыр, фыкрее аххъыйн ишбы быкыраъас Орункъуке сагъвалла гьоохъа.
