Октябрьни 8-чил’, МаIгьачкъалее, Дагъыстанни девлет технический университетни юбилейс къабсырна маджлис вухьа. Гьайни сен ман аали мактаб ачмышхьайн 50 сен быкырхьа.
Мани маджлисее иштыракаъас Дагъыстанын регьберар, сабара министрар, депутатар, ааIлимар, телябабы, журналистар ва мебын мигьманар абы. Юбилейс кьадсырыйн йигъынджагъбы гигъалассе гьихъа Дагъыстанна ХааIрна С.А.Меликов университетни гьагуйни майдама, лабораториебышее ва кафедрабышее ыхьа. Мана университетын гьазирауйни дезгагьбышиква, техник макетбышиква , ааIлимарше къаджейни ишбышиква танышхьа ва аали мактабни таарыхыква марахламишхьа.
Къийна ДДТУ Къузайл’ни Кавказылин гьаIракатыква гьихъа аIлгьаан аали мактаб водун. Ман Дагъыстанее 1972 сен ачмишхьа. Университете 100 ыIлимбышда доктор, 300 ыIлимбышда кандидат ишлемишехьи. Гыргыба саджигее лекцибы, семинарбы, лабораториейн ишбы ыккеккан 600 меегана инсан ворна. ДДТУ-хъад 11 факультет водун. Мааъаб гьар джура санаъаIтбы гьаъасын джегьилер гьазирааъа. Университетын 50 сенни аIрее 40 аазыр санаъаIткар гьазирау. Джоке 35 аазыр инженерар вухьа. Манбы гьаIшде республике, Россиейни субъектбышил’, хаариджий оIлкабышил’ ишлемишоохьи вобунбы.
Маджлисеехъа сабыйнбы саламыква ДДТУ-ни ректоре Назим Баламирзоеве къаршламишавъу. Гойне манкъвее чыхыш гьаъас Дагъыстанни ХааIрункъус Сергей Меликовыс хааишаъы.
Манкъвее университетын къооджени ишис ахтыйна кьиймат гьуво ва нишилхъайий джони ишее фыкыр геледжагъыл’ маIгькамба гьевлес вукканва увгьо.
Табрикааъан чыхыш гьауйле хъийгъа, Сергей Меликове ишее югун натийджабы гьагуйни универстетни ааIлимаршис, ыIлимни ишчершис, телябабышис дипломбы, грамотабы, лайикьыкван наградабы гьувы.
Наградабы гьувойнбышди аIрее йишди миллетна эл’чий, ДДТУ– ни архитектурно — строительный факультетна декан , ааIлим АIриф УIмарна дих УIмаров ыхьа.
С.Меликове джуни указыква АI.УIмаровыс шарафукан до «Заслуженный строитель Республики Дагестан» гьуво.
Йишди кIазет хъаIдаххъанбышикIле АIриф УIмаров лап югра ацIа ворна. Мана йишди миллетикена ДР-ни 1 созывна депутат ыхьа. ОIгийл’ мана Агропромстрой ташкилатее ишлемишхьа, банкна хааIрна ыхьа, тикил’тийбы аляъани джурабаджур ташкилатбышее инженерна, регьберна ишлемишхьа. Мани сенбышди аIрее манкъвее, йишди джамаъаIтни сардан, хаIдда югун ишбы къаджы. Къийнад манкъуле джамаъаIт разийда водун ва манкъун до югвалис агъмышаъа. ГьаIшде джуна ыIмыр манкъвее ыIлимыс , джегьилер санаъаIтыс гьазирааъас къабсыр . Сабара сенбына гьихъа ДДТУ-ни ректоратын манкъус хааишауйн аритектурно- строительный факультете дарсбы гьелес. ДжитIани вахтни аIрее манкъвее телябабышиквана, ааIлимаршиквана ва медни ишчершиквана садибна миз’ тIабалавъуна. АIриф УIмарни дихын гьаIракатбы къадже, манкъуке кафедрайна хааIрна гьаы. 2022 сенни къыIлина мана гиххьына архитектурно — строительный факультетыс деканыйвалла гьааъас. Манкъвее деканна хаIбвалла гьааъан факультет, университетын аIсас оIзяг водунва эгьес эйхьи.
АIриф УIмаровее джуни санаъаIтын гьунарбы йиссейн таарыхын бинаабы, гьаIйкалбы тезелемишаъанкъаI ва тезен бинаабы аляъанкъаI гьаг у. Манчини аIрее Дербентни шагьареена «Нарын- къала», Республикайна миллетна музей ыхьа. ГьаIшде манкъуни регьберийваликва ЦIаIхни хивеедын клуб тезелемишаъа водун. Манкъвее, джуни кафедре, йишди миллетна ЙыIкьнекна манзик-мадраса реставрировать гьааъасын проект гьазирау водун. Ин ша Аллагь, мана ишиб гивгъаласда.
АIриф УIмарна дих, ши мани республикайни шарафукани наградайква табрикаъа. Манкъус, джуни хизаныс джанана сагъвалла гьооххъа. Ишее угъурбы ва гьалед чIакIын наградабы алеетIас аIрзаъа. Къуллух джус, хизаныс, йишди миллетис хайирыквана вухьена. Аамин!
