УIлджумни далатийни йигъыл’ РИА «Дагъыстан» майдамыл’ Дагъыстанни экономикайни министрын Адил’хан АIгьмадовын журналистаршикван горуш илгъечIу.

Министрни увгьойка, гьайни сен энки вааджибни гьаадисабышди арее республикайн 2030 сенилхъамен ешайиш-экономикайни инкишафын Стратегие кьабляий ыхьа. Манчиле ооъаб хаIбна ва гьаракатукана иш вукку.

Манчиле гъайре, гьар сен министерствайн республикайни ешайиш-экономикайн прогнозбы къурмишаъа, гьуIкуматни программабышис ва милли проектбышис назарат ыккекка.

Гьаракатука ишлемишехьени проектбышди аре А. АIгьмадове «100 школ» ва «Местные инициативы» проектбы агъмышау. «100 школ» проектука 2018-2021 сенбышил’ 570 мактаббышее капремонтбы гьау. Манчин таIгьсилни сферейдын хаIдданан месалабы гьаIллаъас имкан гьуво. Амма ман проект явашаийн. Манчина сабаб федералын проект ишилхъа адчый вухьа. «Местные инициативы» проектыс фыкрее 2022 сен 400 милйон манатний авхъу.

«Заявкабы ши кьабыл’ гьаъа гибгъылыйнкъаI, шакIле къаджейнки, заявкабышин сай къат-къатна фыкрее аххъыйни пылыле хаIдда вод. Манчис 1 млрд агъаллан пылый ыккан. Манчини алла, республикайни чIакIынбыше манчин бюджет 600 милйонылхъа гьихьарау. МаIгьуд шаке 128 проект быкыраъас аIхы», — АIгьмадове увгьо.

Манкъве сайиб сувал’ни ишкараршис кумаг гьелена программа агъмышавъу. Манчис гьайни сен 75 милйон манат къахову.

Вуджее хаIбвалла гьааъани министерствайни ишин екунбы гьаъанкъаI Адил’хан АIгьмадове увгьойнки, дагъамийвал’бышихъа ил’дяакы республикайн югун сент’ алятIу водун.