2022 сенил’ дюнйейн къурлыш, ешайиш бадалехьи гидгъыл. Манчина сабабыб Украина вухьа. Украинее еймишехьени нацизмайн, сатанизмайн, аIйибаджар гьаIракатбышин оIги ыIхасдимее ва мааъад ешемишехьен миллет къорамишаъасдимее Россия маджбырба вухьа спецоперацие февральни 24-чил’ гигъалас.
Къийнад ман таамхьа дешодун. Америкайн ва Авропайни оIлкабыше йигъыс яраходун махъа кIяъа, чодж оIлкабыше эб кIееъэджинва. Хъийгъа джони чIаIпал’ни фыкырбышиква Украинайна девлет, инсанар дена, джони хылелхъа алебтIас. Ман ишбыд абни душманаршини кумагыква къеджи водунбы. Гыргын сиясат сайидкьылыйн. Агар аIкьда алеетIе, дюнйе кьоIна хъыхьа водун : гьаIкьийкьатый нягьаIкь дюнйейл’ вурушмишехьи.
Йишди гьоIкуматни сурал’ хъобкуйвалла, барабарыйвалла гозетявъуй вобна. Манчихъа гора, йишин эскерар мааъаб гъамувхьесынбы. Анджах ман спецоперацие мысыйлхъамее цIыцIахьай, садджу АллагьыкIле ацIа. Ши доъаIбы гьаъанбы , экIда таамхьеджинва. АIреехъа эчIуйни иблисын гIал’, къел’-хыл’ гьитIалас ыккан.
Гьел’бедти, йишди эскераршин далы маIгькамын ихьес ыккан. Ши борджлыба вобунбы манбышди дердее авхъас. Гьаарункъвее джуке аIхани караква эскераршин рыIгь , гьавас къалхымишаъас ыккан.
Садджу югни ярахыква джаб деш гъамоохьи, рыIгь, инам маIгькамын ихьес ыккан. Варрыбышилхъайий касибаршилхъа битIалувхьее, ненджад ихьес деш. Ватан йикIеенче вуккыйканас вуккан. Ватаныкед гыргынкъвее барабарда хайир алеетIас ыккан.
Энки хаIдда Россиейни девлетыке «кьыш» къайищыйнбы, Ватан дареехъа айибхьымее, гьейбхыйнбы. Анджах, Ватанын оIзяг джааъад ешемишехьен миллет водун. Хаайинаршис джига гьиняа дешда.
Украинее аIлгьаани спецоперациее хаIббанани цIаIхбышди джегьилерше иштыракаъа водун. Манбыше джона игитийвалла вурушбышее тасдикьавъу. ХаIббананбышис гьоIкуматын орденбы ва медалбы гьуво. Къийнаб манбы гьийбни джаргее вобунбы. Манбышди аIрее Ватаныс джан гьувойнбыб хъызааханбы.. Гьел’бедти, манбы хаIдын ярабы водунбы.
Йишда кьаIгьраманаршини гьаIкIее, ши чалышмишоохьенбы «Нур» кIазете окIанас ва манбышда игитийвалла гьаагвас.
Рутул районни мактаббыше «Эскерысын басиркIа» акцие ишлемишехьи гидгъыл водун. Манчини гьаIкIеена хабар шас Рутул районни хъаIдхъийни управлеениейни хааIрункъве Ферман АIгьмадбегове гьуво.
Ман акцие районни администрациейни ва едаршини джамаIт советни мислягьаIтыква аIлгъаа водун.
Акцие «Эскерысын басиркIа Рутулни, Цудикни, Вочни, Къуфайни, Тезе Быршни ва медни мактаббышее илгъечIу.
Сувал’ни маIгьалыл’ни мактаббышед гьаIракатыква мани акциее иштыракаъа водунбы. ЦIаIхбышди мактаббышди шигыртарше, маъаIллимаршиква саджигее эскерысын басиркIабы саъы , фронтеехъа оIтираъа. Ман хайирхагь акциебы ЦIаIхни, Хьойикни, Муслагъни, ДжинаIгъни, Мишлешни, ГыльмецIни, Лекни , Миххьейни, Аттални, МуIхахни мактаббышее илгъечIу.
Мактабни шигыртарше басиркIабышеехъа турусбы, хьахьалийбы, адъаляъан палтарбы, дарманбы, кьурун чурыбы, ширынныгъбы ва медын эскерыс лазымехьен карбы гиххьы. Манчее шигыртарше эскераршилхъа одкIунийн кагъызбыд ыхьа. Гьайни дёлесийвалее манбы саджигеехъа саъы, машнеква фронтеехъа оIтираъас.
Мактабни директораршини увгьойка , ман акцие ушахарше гейдни гьавасыква алгъавгьу ва гьаIшдед аIлгьааI водун. Мактабни шигыртарше джон чIакIын эскереебын чоджар, деккяр, гогьарбы сагъба-саламатба, гъамувхьа гозетяаъанбы.
