Гьар сен Россиейни Федерациее, июнни 6-чил’ Пушкинын йигъ алгъайгьи. Ман поэзиейква багълыданан байрам водун. Эгьес эйхьи, гьаIшдийна урусаршина классик поэзия, гьаIшдийна урусаршина адабиятна миз’ А. С. Пушкиныква багълыба вобна.
Хыллийна ыIмыр гьааъас манкъус къисмат девхьейиб, Александр Пушкине дюнйейл’ни адабиятни таарыхе кIорана гов гьабсыр. Манкъуни поэзийн мил’йард инсанаршини йикIее джига авхъу. Манкъун асарбы дюнйел’ни хаIдданани мизяршилхъа сакIалау. ЦIаIхни мизелхъа А. Пушкинын шечIбы Селим ДжаIфарове, Гьарун Ибрагьимове, АIбдураIгьим Дадашеве, Валегь Гьамзаеве ва мебынбыше сакIалау.
Поэзия, ыIмрена наххварий вобна. Манчин инсанын «улеббы» ачмишаъа. ХХ-ъэсди асырын аIхир, ХХI-ъэсди асырын кьом цIаIхбышди адбабиятни сардан гьаIракатыкван ыхьа. Маныд зы ойкIанан язы аIрайлхъа хъадыйква алакьа гьаъа. Мани джитIани манзил’ни аIрее ши йишин адабият аIшукьаршини мейханабышиле, фольклорыле классик адабиятни дараджайлхъа алхъавгьу.
ГьаIкIедад ман хъодкуйн ихтелет’ водун. ЦIаIхбышди шааирарше, язычерше джони асарбышикван китаббы гьар джура чапханабышее, гьар джура шагьарбышее къайиккы. Манчиле гъайре, йишди автораршин асарбы Россиейни чIакIни шагьарбышее – МаскIав, Санкт-Петербург, Ростов, Пятигорск, Владикавказ, Назран’- къайиккыйни антологиебышеехъа гядкIу. Йишди шааираршин асарбы дагъыстанни, урусни ва хаариджий мизяршилхъа сакIалаъа водунбы. 2022 сен йишди шааирашини асарбышикван китаббы АIрабстан илгъевчIуйни дюнйейни джаIмаъатбышди аIреени китаббышди выставке гьагу.
Манчиле гъайре, йишди шааираршини ва джони асарбышди гьаIкIеедын макьалебы джурабаджур адабиятни кIазетбышее ва журналбышее чапау. Къийнаб мана иш гьаIракатыква гьихъа атдым-атдымна аIлгьаа вобна. Анджах медни карале ши нарагьаIт воохьи вобунбы, йыIкьале хъооIн джегьил’ шааирар, язычер сейракба воб къооджи .
Гьайни сен са цIаIхбышди поэзиейн антология Азербайджан ешемишоохьени цIаIхбышди ( йихъбышди) маъаIллимарше МагьаIммадшариф Шамхаловейий Нусрет ЫIсмаилове гьазирау къайиккы. Манчина редактор В. Шамхалов, корректор З. Мурадова вобунбы.
Антологиехъа ХIХ-ХХI ас. ешемишивхьайни ва ешемишоохьени цIаIхбышди шааираршин сечмишауйн шечIбы гядкIу.
Китаб ушахаршини фольклорыквайий баятыбышиква гийгъал водун. Хъийгъа автораршини асарбышилхъа аIлгъаа.
Мункум вобна, сабара йишин шааирар махъа гидябкIу вухьес. Манчина сабаб, китаб саъанбы, манбышди поэзиейква танышба девхьай вобна. Эгьес эйхьи 70% шааираршин манчее водун.
ЙыIкьнекни асарбышее ешемишивхьайни шааираршикен маъIлумат ва манбыше одкIунийн шечIбы авторарше Гьарун Ибрагьимовни 4 сыныфни адабиятни китабеенче ва ыIлим ишбышеенче алетIу.
Гьайни цIаIхбышди поэзиейни антологиехъа гьайни шааираршин шечIбы гядкIу: ХыIягъалий Ибрагьамынбы, ГьаIджи АIлийнбы, АIшукь ГьуIсейнынбы, Дабузов Джаббарынбы, Лезги Семединбы, Мамедов Шихамирынбы, Селим ДжаIфаровынбы, Кор Незирынбы, Гъайбуллагь Бабаевынбы, Гьарун Ибрагьимовынбы, Сафар АIбдуллаевынбы, АIдил ЫIсмаиловынбы, Рамазан Мамедовынбы, Муса Фаррухынбы, АIгьмад Кьурбановынбы, Шихса УIмаровынбы, Расул АIгьмадовынбы, ШейхаIлий ХанаIгьмадовынбы, Фазил Балаевынбы, Алмаз Мирзоевынбы, Рашид Мирзоевынбы, Гъайбуллагь ГьуIсейновынбы, МагьаIммад Агъаларовынбы, АIбдураIгьим Дадашевынбы, ДжуIма Мамедовынбы, Магьмуд Магьмудовынбы, Бадир Мусаевынбы, АIдил’хан Салеховынбы, Нусрет ЫIсмаиловынбы, Рустам АIбдуллаевынбы, ВаIгьыд’ Мирзоевынбы, АIбдураIгьман ЫIаровынбы, ДжуIма Мамедовынбы, АIгьмад Давудовынбы, Валегь Гьамзаевынбы, Кьурбан Омахановынбы, Первиз АIзизовынбы, Чеменгул’ ГьаIбиловайнбы, АIбдулла Дагълар огълуйнбы, Мурад Мамрыхалийнбы ва Музаффар Кьадировынбы.
ГьаIкIебаб китаб ойкIананбыше хаIбна загьмат гьавъу, антологиехъа шечIбы сааъасдимее. Сабаранбышин биографиебы дешинбы, сабаранбышин шикыл’бы дешинбы. Умудааъана, сабара вахтале мани антологиейн кьоIдъэсын том хъигъечIес. Манчеехъа гыргын цIаIхбышин ( йихъбышин) шааирар ва язычер гябкIасынбы
