Инсан хьоцIал’ни ешеле илгъечIуйле хъийгъа, ыIмрехъа меннягьаIр иляакка. Мани ешбыше инсанна фыкыр каамылёохьи, фыкырбы бадалехьи. Къеджени карас кьиймат илёобку гьоли. НягьаIкьни ва гьарамни караке аIраламишехьена.
ЦIаIхбышихъаб югна мисала вобна: «Инсаныс кьиймат гьевлесдимеега ва манкъуни хасиятылхъа гихьасдимеега са пуд кьеван охьанас ыккан. Заке ман джуваббы тасдикьаъас аIхасынбы.
Июнни 5-чил’ «Нур» кIазетни джавабдар каатибын Шамхалов Камил’ Нуруллагьни дихын 55 сенин юбилей ыхьа. Мани ыIмрен 27 сен цIаIхни журналистикайс къадсыр. «Нурыс» диб гиххьыйнбышда ва гьаIракатейхъа адчинбышда сайир мана ыхьа. Мана къуллух К. Шамхаловее къийнаб йикI’ гиххьы гьааъа вобна.
Гьайни дюнйейл’ гьар инсане джусда гьуIрмат, вудже къазанмишааъа. Инсанаршихъар тахсирбы денана, гунагьбы денана ээхьена дешки. Югна инсан мана ворна, манбы ацIахьа, геледжагъыл’ гьидяъана. Гьар инсаныхъаб джуна кьисмат вобна. ЫIмыр мункум вобна дагъамна, ваяхуд вахарийна вухьес. Анджах, гьаарна чалышмишхьес ыккан, гьайни дюнйейл’ югун до гьассарас. ЦIерра, йигъни ыIмреле гъу разийра ихьес ыккан, гойне йигъна хизан, хъийгъад йигъын джамаъаIт. Инсан джуни ыIмрена сагьыIб вудж ворна. Джусда гьуIрмат гьайни дюнйейл’ манкъвее вудже гьаъани хайир ишбышиква къазаммышааъа. МагьаIрна инсан югни, писди йигъыл’ джамаъаIтыква саджиге эйхьи. Югни инсанын йикI ачухда, темизда эйхьи. Манкъухъаб пахылыйвалла, улена мысвалла воохьи деш. Мерынкъус писин гьауй фыкрее эйхьи деш. Югунчиле шадехьена, писинчиле пашманехьена. МагьаIрни инсане вукIул’ кIебчу динджиба джуна иш гьааъа. Ненкеджар мана оIгуммиш эйхьена дешки, нейиб гьавъуна хайир иш акьвалхъа ашкарааъана дешки. МагьаIбни инсанаршис кьиймат халкьын, таарыхын гьооли. Йишди аIрейиб маIгьбын инсанар вобунбы. Йизда къийнийна макьаале магьаIрни са инсанни гьаIкIее, йишди кIазет’ни джавабдар каатибни Камил’ Шамхаловни гьаIкIеена вухьес.
Инсанаршихъад кьоIдле джура эйхье: санбыше джожаб джо оIгунмишааъа, мерынкъвее гьауйн ишбы джунбы хьинне гьагва, гьаммаше инсанаршини гIалил’, кIазетбышди варакьбышее, телевизорни экранбышее воохьи; шенсабы гьаммаше чалышмишоохьенбы «гьай-куй» дена джона иш вукIул’ кIебчу серрасыба гьааъас. ГьаIмагьабни инсанршини дестеехъа Камил’ Нуруллагьна дих гехьа.
Кино цIыцIаъанкъаI, сабы актерар воохьи. Манбы экранеенче гьаагванбы. Шенсабы режиссёрар, сценариебы гийхьенбы, редакторар, звукорежиссёрар ва мебынбы. Кинойна марахыйвалла манбышди ишике аIслыба воохьи. Анджах манбы, манбышда иш экранеенче гьаагва деш. Камил’на иш, зы манбышди ишиква алаакьа гьааъа.
Камил’ Шамхалов 1968 сенни июнни 5-чил’ Рутул районни Калел’ни хивее маъаIллимни хизанее едике ыхьа. Гьамани джаб сен манкъуна хизан Азербайджан Республикайни Закаталайни шагьареехъа кочмишивхьа. Манкъуле гъайре, Нуруллагь маъаIллиме джуни ыIмрени гьамбазыка ГьуIриперий халайка гьалални къыкыл’ хьебыйре дихий са йиш чIакIы хъавъу. Манбышда гьаарна гьаIшде хизанбышин саIгьыбар вобунбы. КьоIни духеейий , йище деккин санаъаIт – маъаIллимийвалла хъаIдхъы.
Закаталайн йыIкьнекин урус мактаб 1985 таамауйле хъийгъа, Камил’ Шамхалов са сенна консервабы къеккани заводе ишлемишхьа. Хъийгъа манкъвее 1986 сениле 1988 сенеехъаме эскерийвалее къуллух гьавъу. Ватаныс бордж Свердловскни вилаетыл’ хъуво.
Эскереенче хъары, Камил’ Шамхалов 1989 сен иккечIуна Тулайни йивани йаIххъыни инженераршини институтеехъа. Заочныда институте хъаIдхъы, доюкана урусаршина язычий Лев Толстой ни ватаныл’, Ясный Полянайл’, йивани йаIххъыл’ монтёрна ишлемишхьа. Манке гьоIкуматын эн дагъамын сенбы ыхьа. Камил’ маджбырхьана ман джигабы таргаъу хъалес.
1991 сен мана иккечIуна Дагъыстанни педагожи институтни гьазирийвал’ни шоIъбеехъа. 1992 сениле 1997 сенилхъаме манкъвее ДДПУ-ни филологиейни факультетни цIаIхни ва урусни мизени шоIъбее хъаIдхъы. Хьодле сенна манкъвее цIаIхни мизекен ва адабиятыкен ацIаал’ доюкани ааIлимыке Гьарун Ибрагьимовыке алетIу. 5 курсе хъаIдаххъанкъа, Камил’ Шамхаловыс теклиф гиххьыйни «Нур» кIазете ишлемишхьес. МаIгьад манкъвее маъаIллимын санаъаIт журналистни санаъаIтыке бадалау. Мани йигъыке Камил’ манзил’ гьидявъу «Нур» кIазете ишлемишехьи ворна. Манкъуни ишни китабе (Трудовой книжке) са язы водун. Мааъар ишлемишехьенкъаI, мана корреспондентни къуллухыле хаIрни редакторни маIъвынылхъа гьирхьыл’. Сабара манзил’на Рамазан Къоджаев (манкийна хааIрна редактор) кечмишхьайнкъаI, манкъвее хааIрни редакторна къуллух гьавъу.
ГьаIшде Камил’ Шамхалов «Нур» кIазетна джавабдар каатиб ворна. К. Шамхалове 27 сенни аIрее аазырбышиква джурабаджур темабышикен ед’ни мизел’, урусни мизел’ макьаалебы одкIун . Манкъуни журналистын баджарагъыс журналистикайни санаъаIтни устадарше гьаммаше ахтыйна кьиймат гьооли. К. Шамхалове сиясат макьаалебышее джун из, джун эн гьассыр. Манкъуни гьаIракатыква официоз макьаалебы къайдалхъа хъады. ГьаIшде мана манчина устад ворна. Къийна гыргын макьаалебы Камиле радактировать гьауйле хъийгъа, кIазетее чапаъа. Мана чалышмишехьена кIазет ойкIананбышиний хъаIдаххъанбышин алаакьабы гьуваджес ва сана-санчика гицIанас.
Камил’ садджу кIазетна джавабдар катиб джар дешорна. Манкъвее мактабыс къеккан китаббы, пособиябы, адабиятын китаббы редактировать гьаъа. Манкъуни редакциейка хил’дже китаббы хъигъечIу. Манчиле гъайре, К. Шамхалове гыргыни цIаIхбышди таарыхыква, мизеква, адабиятыква багълыданани конференциебышее, маджлисбышее, конкурсбышее иштыракаъа.
АIхреени сенбышее Камил’ Нуруллагьна дих цIаIхбышди адабиятыква маIшкьулехьи гиргъыл’. Манкъвее ушахаршис хурын хабарбы, меххвар ойкIан. Манбы «Нур» кIазетее ва ушахаршини «Лачын» журнале чапаъа. Манчиква барабарда манкъвее цIаIхбышди шааираршин ва язычершин асарбы едини мизеле урусни мизелхъа сакIалаъа.
Гьел’бедти, Камил’ Шамхаловын журналистикайн гьаIракатбы, гьунарбы къадже Республикайни Правительствайн, чапни ва маIълуматни министерствайн, Россияйни ва Дагъыстанни журналистаршини Союзын грамотабышис ва мукафатбышис лайикьау. 2005 сен Дагъыстан Республикайни ГьоIкуматни Советни амурыква ДР-ни Почетный грамотайс лайикьау. 2003 сен Россиейни журналистаршини Союзын манкъус джона Почетный грамота гьуво. 2012 сен ДР-ни чапни ва коммуникациебышди Комитетын джона Почетный грамота, мукафатыква саджигее, гьуво.
Камил’ Шамхалов гьалер ахтыйни къуллыхбышик ва дераджебышик’ аваакIуна журналист ворна. Анджах эн ахтына манкъуна дараджа – миллетна гьуIрмат вобна. Камил’ Шамхаловын до Дагъыстанее ва Азербайджан ешемишоохьени цIаIхбыше садджу югвалис агъмышаъа. Манкъвее джуни хьунащейква саджигее гадейий ичий тербиейква ва гьалални къыкыква чIакIы хъааъа вобунбы. Камил’ни оIгее хаIдда, ниятее аххъыйн , югын ишбы водунбы.
Ши, цIаIхбышди интеллигенциейн, достарше, кIазет хъаIдаххъанбыше мана 55 сенийни юбилейиква табрикаъа. Манкъус джанана сагъвалла, ушахаршини югни йигъбышиле гуянмышхьес, ишее югун угъурбы аIрзуламишаъа.
Камил’ Нуруллахович, Вас шадна, хыллийна, ыкIарбы денана ыIмыр аIрзуламишааъа!
