Июнни хьебыдъэсди базарни йигъыл’, медицинайни ишчершин Йигъ къейд гьаъа. Гьайни сен ман йигъ  июнни 18-чилхъа хъады. Мани йигъыл’ чичилхъа хъады йишди миллетни гьуIрматыквани дохтурыни Мустафаев Бейдуллагьни Мустафайни дихни юбилейква. Манкъус 80 сен быкырхьа. Къийнад манкъвее джун санаъаIт  гьаъа водун.

ЦIаIхбышихъа гьаргьаммаше джон санаъаIт ербестда гьаъан дохтурар, фельдшерар, медсестрабы, акушеркабы вухьайнбы ва гьаIшдеб вобунбы. Манбышди аIрее дюнйелхъа до хъигъечIуйн  ааIлимарыб вобунбы.  Манбыше джона дараджа ишбышиква къалхымишавъу. Манбышин добы садджу югвалис агъмишаъа.

Гьел’бедти, инсанна джанана сагъвалла садджу дохтураршике джаб деш аIслыба вобна. ЦIеббыйке инсаныс сагъвалла Аллагье гьооли, кьоIдъэс — джуке инсаныке, хьебыдъэсыб – дохтурыке. Дохтурыр дюнйелхъа инсанаршин джан хъувадкаъас Аллагье къахувына инсан ворна. ГьаIкIени дохтурыке  садджу дарманбышикаджад деш, джувабыкад инсанын джан хъувадкаъас аIхас ыккан. Дохтур чIырынкъуни джанеехъа ичIес аIхас ыккан. Манке гьаъани малиджейхъад натийджабы ихьес.

Зас гьаман эгьес ыккан, къийна йишди миллетни аIрее эн хаIбна гьуIрмат йишди чоджаршихъаб – дохтураршихъаб вобна. Манбы ахтыйн джуваббы дешёдунбы, ман гьаIкьийкьат водун. Дагъыстан, Азербайджан, Урсиятыл’ манбы ешемишоохьи ва ишлемишоохьи вухьейиб, джони миллетна инсан дареехъа айирхьуйнкъаI, манбы джоке аIхан  кумагаъас гьазирба воохьи. Ман югун аIдатбы гьаIшде джегьил’ дохтураршилхъа илгъечIу водунбы.

Къинийна йишда макьале гьуIрматыквани агъсаххъал дохтурни Бейдуллагь Мустафаевни гьаIкIеена вухьес. Ман ооъад одкIунийн инсафыкван дохтурын хасиятбы, эле гьаманкъук’ аваакIуйнбы водунбы. Манкъвее джуни ыIмырын 55  сен дохтурни санаъаIтыс къадсыр. Сувал’ни маIгьалыл’ мана дяцIана инсан яраб ыхьее. Гьар хивее манкъухъаб джун мигьманар вобунбы. 

Бейдуллагь дохтур Рутул районни ЦIаIхни хиве кIалхозчийни хизане 1943-ъэсди сенни июнни 18-чил’ едике ыхьа.  Дек’ –Мустафа, ед’ — Миседей хивни аIрайл’ гьуIрматукан инсанар вухьа. Бейдуллагьыле гъайре манбыше гьалални къыкыл’ дих МаIгьаммад, йишбы Зугьрайий Халиса чIакIы хъавъу.  Манбы эн дагъамын  ХаIбна Ватанна даIвъий аIлгьаан сенбы ыхьа. Бейдуллагьна ушахийвалла джуни тай-тушершина хьинне абкIын. Декккис едис хаани аIрайлин ишбы гьаъас кумагбы гьаъы; кьыкаршихъа гьаркIын, берабы гьелес бакIийбышеехъа гьаркIын; ос, окI саъас кумаг гьаъа ыхьа. Молидъэсди сыныфеехъаме манкъве ЦIаIхни мактабее хъаIдхъы. Манкъус дарсбы Урсиятыле хъабыйни ичерше- маъаIллимарше ва хивни маъаIллимарше гьувы. Эле гьаманбыше манкъун дохтурни санаъаIтылхъан гьавас ачмишау. Алидын сыныфбы Мишлешни мактабее хъаIдхъы. Ман таамауйле хъийгъа, медучилище манкъвее хъаIдхъы, ишлемишхьес йаIххъыляуна Рутул районни Гыл’мецIни хивеехъа. Манкъвее дохтурын санаъаIт гьаъа мани хивеенче гиргъыл’. Къийнад Гыл’мецIни хивни джамаъаIтын манкъун до югвалис агъмишаъа ва вуджейиб мани джамаъаIтна гьуIрмат гьаIшдеб авхъаахъана.

Манче мана аркIынна эскерехъа Ватаныс бордж хъелес.  Манче хъары иккечIуна Дагъыстанни мединститутни стоматологиейни факультетехъа. Ман таамау, ыхьана Б. Мустафаевыке силибышда дохтур. Институтее манкъуква саджигее хыIягъалий АIбдулла Назирове хъаIдхъы. Къийнаб манбы чоджар хьинне ешемишоохьи вобунбы. АIбдулла дохтуре хаIдда Бейдуллагь дохтурни гьаIкIеедын шас хабарбы гьаъы. Институт таамаумее , Бейдуллагь дайий силибышда  дохтур ишлемишхьес Дербентни шагьареехъа оIтирау. Ишилхъа гиргъылийка джар, поликлиникайни дохтурарше ва джусхъа сил’бы хъувадкаъас ва гьаъас абайлени дербентлыбыше ахтына кьиймат гьувы. Мана кIыл’ра-кIыл’ра къуллухыл’ ахтыхъа гиргъыл’.

Сабара вахт арайле абкIынле хъийгъа хааIрна дохтурна гиххьы. Манке мана ишлемишехьени медицинайни ташкилатын югун гьаIракатбы гьагва гидгъыл. Дагъыстанни Минздравын Б. Мустафаеве хаIбвалла гьааъани  Дербентни стоматологиейн поликлиника дипломбышис лайикьау. Поликлинике ишлемишоохьени дохтураршина дараджа ахтыхъувхьа. Манбышин ишин къулай хаIдхъаъасдимее Бейдуллагь дохтурее дохтурна дараджа ахтыхъааъани курсбышеехъа поликлиникайн дохтурар йаIххъылявъу.

Силибышин дохтурар манке Сувал’ни маIгьалыл’ни йишди хиваршее вухьа деш. Гьийдни сенбышее силибышисын маалидже ваяхуд тезе силибы гьаъас йишин инсанар Дербентхъаний гьавайкIан. Мааъад ман дагъамийвал’бы Бейдуллагь дохтуре гьаIллаъа ыхьа. Силибы гьаъас абыйнбышин сабарабы манбышди хааний хаIммаршис аахванбы. Гьале не Бейдуллагь дайий, не джуна хьунаще Разият халай  манбышди хатрес хъибхьыр деш, не «акьва –йыIкь » хъаъы деш. Къийнар манбышди хаанче мигьман камехьи деш.

Бейдуллагь дайийн гьаIракатбы къадже, мана Дербентни шагьарни иджласна депутатна сечмишау. Гойне мана Дербентни шагьарни медицинайни ишчершини профсоюзна садры гиххьы. Мааъад хаIдда суалбы медицинайква ва мани сферее ишлемишоохьени инсанаршин гьаIллаъы. Къийнар мана алетIуйн ишбы быкыраъас чалышмишехьи ворна.

Бейдуллагь дайий гьамыр йишди миллетна тарафкар ва  мизена, адабиятна, маданиятна гьаваскар ворна. Манкъвее сенис «Нур» кIазет джус ва джуни гогьарбышис ,вудж ишлемишехьени ташкилатыс ойкIан. Дербент илгъечIени цIаIхбышди маджлисбышее, мавлидбышее ва медни йигъынджагъбышее манкъве гьаммаше иштыракаъа.

ГьоIкуматын манкъуни ишис югна кьиймат гьувы. Грамотабышис, дипломбышис, орденбышис лайикьау. Ахтыйни дараджайн дохтурын до гьувы.

Бейдуллагь дохтуре джуни хьунащейква Разият халайква дихий йиш чIакIы хъавъу. ГьаIшде манбышихъадыд джон хизанбы водунбы. Йище Гул’наре деккин санаъаIт –дохтурыйвалла джес сечмишавъу. Мана едаршини чIырвал’бышда югна дохтур ворна. ХаIдда сенбына Гул’нара дохтур Дербентни шагьарее ишлемишийхьа. ГьаIшде мана МаIгьачкъале едаршис консультациебы гьелени поликлиникайна хааIрна ворна. МаIнкъейид, декке хьинне, йишди инсанаршис джеке аIхан кумаг гьаъан. Дих Булатыр МаIгьачкъале джуни хизаныква ешемишехьи. Манкъвее Дагъыстанни девлет университетын юридический факультет таамаы. ГьаIшде мана инсанаршин ихтиярбы, гьукьукьбы къорамишаъани  ташкилатбышее ишлемишехьи ворна. Манкъвейид деккее гьувойн тербие гьуваджен. Югни-писди йигъбышил’ джаIмаъатыква  аликкы эхьи.

Месала вобна: «Сагъын кокбынани йивыл’, югна мейва аляали». Мана Мустафаев Бейдуллагь дайийни хизанык’ аваакIына месала вобна.

«Нур» кIазетни редакциейн, цIаIхни миллетни дойиле гьуIрматыквана Бейдуллагь дохтур 80 сенни юбилейква табрикаъа. Манкъус джанана сагъвалла хизаныква саджигее аIрзуламишааъа!

Бейдуллагь дайий , йигъын йикIеедын мурадбы быкырхьенбы!