Майни вузани 23-чил’ республикайни йыlкьнекни мактаббышее  аlхыреедни зенгыс къадсырыйн  йигъынджагъбы илгъечlу.

 Мани йигъыл’ мактаббышин майданбы инсанаршика гяцlыйий. Махъа  мактаб таамауйнбышика саджигее, маъаlллимар,тезеба гьайни сен мактабеехъа хъавалесын ушахарый манбышин едярий деккяр, хивын джамаъаlт сады.  Мани йигъыл’ мактаббышин майданбы инсанаршика гяцlыйий. Махъа  мактаб таамауйнбышика саджигее, маъаlллимар,тезеба гьайни сен мактабеехъа хъавалесын ушахарый манбышин едярий деккяр, хивын джамаъаlт сады.  Рутул районни йыlкьнекни мактаббышед манчис югна гьаlзирийвалла къавджу. Сувал’ни магьаlлыл’ни йыlкьнекни мактаббышее марахукван аlхыреедын зенг алгъайгьен югун аlдат водун.  Ушахареше марахукан тамашебы гьагва, маlънийбы гьекlва. Аlхыреени зенгыс кьадсырыйн тадбырбы мактабни директорарше аахъы. Манбыше махъа сабыйнбы йикlейнче табрикавъу. Гойне хьинне мактаб таамауйни шигыртаршис угъурбы аlрзау.  Мани йигъыл’ шигыртар, манбышис дарс гьувойни маъаlллимарше, хивни вукlлелинбыше, абыйни мигьманарше табрикавъу. Гыргынбыше мактаб быкырауйнбышис югун дилягбы гьеххъы. Джаванаршис  мактабын, хивын, миллетын до ахтывалее гьуваджесын наlсигьатбы гьуво. 

Хъийгъа джуваббы 11-ъэсын сыныф таамауйнбышис гьуво. Манбыше гыргынчиле гьихъа, джос тербие, ацlаал’ гьувойни маъаlллимаршис миннатдарийвалла агъмишавъу.  Геледжагъыл’  ниятее адхъыйни ишбышике йишонебхьа.  Джони ихтилетее манбыше джос цlедда окlанасый хъаlдхъас хаlбхъавъуйн маъаlллимарыб кlеливханавъу деш. Манбышис джанана сагъвалла аlрзуламишавъу.Манчиле хъийгъа, шыгыртарше, аlдат гьуваджы, маъаlллимаршис, тезеба мактабеехъа хъабыйни ушахаршис пайбы гьуво.   Хъийгъалетти, мактаббышди магьаlллабыше аlхыреедын зенг ыхыl. Йигъынджагъеехъа сабыйнбыше алидын сыныф таамаъанбышис баракабы гьау. Тадбырбы шадни концертыква, ушахарше гьаlзирауйни тамашебышиква,  маlъракайква таамхьа.Маlгьдын джад йигъынджагъбы Бабаюртни бинабышили’ни йыlкьнекни мактаббышейид  илгъечlу.Йихъбышди мактаббыше  гьар сен  билигыкван ушахар къоокка. Манбы нахъа абкlынейиб, джос ацlаал’ гьувойн мактаб, маъаlллимар кlеливханааъа деш. Манбышда дараджа ахытывалее гьуваджес чалышмишоохьи. Аlхыреени сенбыше, шакlле манбышин добы садджу югни сураке агъмишаъа къийххьи.  Сениле сенилхъа югни кьийматбышикайий чlаlрани дипломыка аали мактаббы быкыраъанбышис сай хаlдхъехьи водун.    Къийнийна дагъамийвалла са менни сураке вобна. Гьаlшде  мактаб таамаъани шигыртаршин сай къат -къатна кlыл’ хъыхьа. Гьайни сен Мишлешни, Миххьегlни, Цlаlхыйни, Тезе Калелъни йыlкьнекни  мактаббышихъад 11-ъэсын сыныфбы ыхьа деш.  Гьихъа гьар мактабыхъад энки кlылба йицlыйре шигыртний эйхьена. Ахуйни мактаббышейиб вазият югба дешда. Масалан, гьайни сен кьойре джегьил Гыл’мецlа, кьоlйре  Муслагъа,  кьоlйре Джинаlгъни хиваршее вухьа.  Амма мани сардан гьайин сен Тезе Муслагни йыlкьнекни мактабыс угъадыка ыхьа. Мактабыхъаб молюйре 11-ъэсын сыныфын шигыртар вухьа.Гьаlшде манбы садибын гьокуlматын имтаlгьанбы хъелес гьаlзироохьи вобунбы. Манчиле хъийгъа, манбыше  джо сечмишауйни санаъаlтыка багълыдани  аали мактаббышеехъа документбы хъелес.Гьайни сен мактаб быкыраъанбышди аlрайл’ хаlбба ючlыдъэсди сыныфын шигыртарыб вобунбы. Манбышди фыкрее документбы колледжбышейхъа хъувой вод. «Нур» кlазетни редакциейн мактаб быкырауйн, тезеба мактабеехъа хъабыйн ушахар, мактаббышин маъаlллимар йикlейнче табрикааъа.  Мактаб быкырауйнбышис садибни имтаlгьанбышее югун баллбы сау, фыкрее аахъыйни аали мактабышехъа иккебчlес  аlрзаъа.