ЦIаIхбышшин едар гьаммаше хизанын даягъ ыхьа. Манбы чалышмишоохьенбы хизанее югун баба-дидершике ахуйн аIдатбы гьуваджес, бухарайн цIа гьуваджес, ушахар тербиейква ва гьалални къыкыква адамийква саджигее чIакIы хъааъас.
Хаадын тасарруфат ыккый вахарийна иш дешобна. Сасса вахтал’ манбыше адамерше гьааъасда хаани аIрайл’на иш гьааъа. Арына, аIлгьааIна мигьманыр кар гьидёву ва хыл’ кьаIрар къекка деш. МаIгьдын хаIдын хизанын юк ыккекка ыхьейид, йишин едяар, йичибы доннух алятIани къуллухбышилиб ишлемишебаххьенбы. Нена няаъар ишлемишейхьи йихьейир, маIнкъее гьааъани ишилхъа зигарабы гьаъанбы деш. Гьаарна йишди миллетна йичи ахтыйни гьуIрматыс лайикьра ворна. Къийнийни йишди макьаалейна кьаIгьраман манбышда са ворна.
Январьни вуза гьуIрматыквани хьунащейс, ушахаршини едис , невабышди адийс, доюквани журналистыс Бабаева Шефига Рамазанни йищес 60 сен быкырхьа. Едаршин сенбы гьыIсабаъанбы дешки, анджах ши мана юбилейиква табрикееъи. МаIнкъее джена гьавъуна ыIмыр журналистыни санаъаIтыс къабсыр. Къийна йишди санаъаIтна гьамбаз шаква саджигее йишда едина миз, адабият, маданият гьуваджес ва артымишаъас чалышмишеехьи ворна. Джени ишин къулай джегьил’ журналистаршис чечнайс хъели.
Шефига Бабаева едике 1966 сенни январьни 14-чил’ Рутул районни Мишлешни хивее Къоджаеваршини насылэй едике йихьа. МаIнкъына раIгьматтыгъ дек’, Рамазан маъаIллим, хивее, районее, республикее доюквана, гьуIрматыквана, дараджайквана ацIана къуллухчий ыхьа. Мана гьар чIакIни къуллухбышил’ ишлемишехьенкъаI, йишди миллетни меега хаIдда хайирыкван ишбы къадже. ЦIаIхни миллетын ихтиярбы Р. Къоджаеве гьаммаше гыргынчиле гьихъа аххъы. Ман джун югун хасиятбыд манкъвее джуни ушахаршис хъуво.
Деккина хизан Рутулхъа кочмишивхьайхъа гора, Шефига баджее 8 сыныф Рутулни кьоIдъэсди мактабее таамаъы. Манчиле хъийгъа, мана Дербентни педагожи училищейхъа хъаIдхъас аркIын. 1985 сен маIнкъее училище таамаъы, дагъайдни сыныфбышди маъаIллимын санаъаIт алетIу. Манке ман гейд гуджнакван ацIаал’, билиг гьелен хъаIдхъийн ташкилат ыхьа. Педагожи училищейна диплом алебтIу, Шефига Къоджаева даянмишийхьа деш. Джена маъаIллимна дараджа ахтыхъааъасдимее, мана 1986 сен Дагъыстанни девлет педагожи институтни дагъайдни сыныфбышисын маъаIллимар гьазирааъани факультетейхъа иккейчIу. 1992 сен ман аали мактаб таамаъы. Дагъайдни сыныфбышда маъаIллимна ишлемишеехьи мана Рутулни кьоIдъэсди мактабее гиргъыл’.
Язы ачмишхьамее , маIнкъее Бабаев Асланыква хизан къурмишавъу. Джегьил’ хизан ешайиш гьаъас Закаталайни шагьареехъа кочмишивхьа. Закаталайни интернат мактабее дагъайдни сыныфбышда маъаIллимана ишлемишеехьи гиргъыл’. Мааъад молидле сенна дарсбы гьуво. Ишини гьамбазаршини аIрее, дарсбы гьелени ушахаршини, джони деккяршини едяаршини аIрее Бабаева Шефига маъаIллимае хаIбна гьуIрмат къазаммишавъу. Къийнад Рутулни мактабее , Закаталайни интернат мактабее хъаIдхъийни шыгыртарше мана садджу югвалис агъмишейъи. МаIнкъее ацIаал’, тербие гьувойн шыгыртар гьаIшде джурабаджур къуллухбышил’ ишлемишоохьи, маIърафатыквани хизанбышин ессибы вобунбы.
Сабара вахтале Совет гьоIкумат дагъылмишхьамее, Аслан Бабаевна хизан Россиейлхъа сабкIыл. Сабара гагьна манбы Саратовни шагьарее ешемишивхьа. Мани сенбышди аIрее хизан хаIбхъувхьа. Гьалални къыкыл’, тербиейква хьебыйре йиш чIакIы хъавъу. Ватанылхъа, Дагъыстанеехъа сабкIылыйле хъийгъа, Шефига Бабаевае джен санаъаIт бадалаыйн. Гьайни элейс маIнкъее джен гьаIракатбы журналистни пешее гьагва гиргъыл’.
Къийна Ш. Бабаева ёкьни адабиятни мизаршил’ ( цIаIхни, рутулни, урусни, азербайджанни) темизра юшенееъэна. 2004 сеныле мана ГТРК «Дагъыстан» редакторна ишлемишеехьи ворна. МаIнкъее рутулни мизелин теле-радио верлишбы ыккекка. Мааъаб маIнкъее хаIбна джес гьуIрмат къазаммишавъу. Мани ташкилатни регьбераршди увгьойква, Ш. Бабаева джена иш ваацIана ва вахтал’ иш быкырааъана санаъаIткар ворна. Мысаджад маIнкъее журналистын санаъаIт бейабыраъы деш. Къийнар мана ишее югунбышди джаргее ворна.
2009 сен мана ишлемишийхьес цIаIхни мизел’ къоокани ушахаршини «Лачын» журналеехъа хъортул’. Мааъар ишлемишеехьенкъаI , художествеенный адабиятыква марахламишеехьи гиргъыл’. МаIнкъее цIедда урусни, дагъыстанни шааираршин ушахаршин асарбы цIаIхни мизелхъа сакIалаъа гиргъыл’. Хъийгъа хурун-хурун ушахаршин шечIбы, меххвабы, хабарбы ойкIан гиргъыл’. Сабара маIнкъее одкIунийн ва сакIалаъыйн шечIбы, хабарбы мактабни дагъайдни сыныфбышди китаббышее гьели водунбы.
Къийна мана китаббы ойкIанни автораршини дестейхъа эйчIу ворна ва барабарба мана ишиб вуккейс.
МаIнкъыни ишис ГТРК «Дагъыстан» компаниейн, «Лачын» журнални редакциейн, Дагъыстанни маIълуматни ва чапни Агентствайн , ракьамни аинкишафни министерствайн ва менни профильни министерствабыше, водомствабыше ахтына кьиймат гьуво. Мана джурабаджур грамотабышис, дипломбышис, мукафатбышис лайикьайъы. Шефига Бабаева РФ-на лайикьыквана радист ворна.
Эн хаIбна маIнкъына шадвалла – джена хизан вобна. МаIнкъее джени адамийква, Аслан Бабаевыква, хьебыйре йиш чIакIы хъавъу, манбышис хъаIдхъий гьуво, даватбы гьаъы. Къийна манбы джони хизанбышиква джурайба ешемишоохьи. Адий дидейиб невабышиле шадоохьи. Манчиле хаIбна кьисмат, баракат , шадвалла яраб вухьее.
Шефига баджийс джанана сагъвалла аIрзуламишааъа. Аслан чоджийква 100 сен саджигее гьаъас кьисматхьен ! «Нур» кIазетни редакциейн Шефига Бабаева юбилейиква табрик гьейъи.
