Гьар сен, майни 18-чил’ йишди республике Дагъыстанни поэзиейн йигъ алгъайгьи. Мани йигъыл’ шааирар мактаббышди шыгыртаршиква, колледжбышди, техникумбышди, институтбышди, университетбышди телябабышиква горушмишоохьи.
Мани маджлисбышее шааирарше джон шечIбы хъаIдаххъа, джегьилершини суалбышис джаваббы хъели. Поэзиейс къадсырыйн маджлисбы чIакIни китабханабышее, маданиятни марказбышее, районбышди ва хиваршини китабханабыше илгъечIи. ГьаIшдийни адабиятыс къадсырыйн ва манчина дагъамийвалла ашкараъан конферециебы аали мактаббышее ва ыIлимни марказбышее илгъечIи.
Советни девырее республикайхъад поэзиейн майдам ыхьа. ХаIбба баджарагъыкван шааирар шахъаб вухьа. Манбыше джони шечIбышее инсанна ыIмыр, заманайна дагъамийвалла, муIгьуб ва медын ешайишин карбы гьагу. Манбыше инсанаршина барабарыйвалла , ихтиярбы гозетяъы.
Поэзие лирикайни жанреехъа гёохьа. Манчеехъа шечIбы, поэмабы, маIънийбы эчIи. Гьар шааирыхъад джун поэзиейн асарбы ойкIанан къулай ва стиль водун. Сабара джигабышее авторын фыкырбы гьагвасдимее, рифмовка хъобкуба хъавалесдимее мункум вобна джуни лугъадеедын джуваббы окIанас. Анджах манбы ойкIананкъаI, адабиятни мизен граматик къайдабы гьуваджес ыккан.
Эйгьи водки, шааирын, шикыл’чийн, дезгагьбышиква макьамбы гьаъанбышин баджарах сейракни инсанаршихъад эхьи. Ман гыргынкъус дешодун гьувы. Анджах садджу ацIахьес ыккан, ман нягьаIдый ишлемишаъас. АIкIел’, маIърафат, муIгьуб шечIбышее гьелени шааирыхъад цIедда джухъад ихьес ыккан. Шааирын джуваббыйий ыIмрен гьаIракатбы са ихьес ыккан.
ЦIаIхбышихъабыб гьаммаше джувабын устадар, шааирар вухьайнбы. Анджах гьихъа ойкIанан язы дехьайхъа гора, манбышике джон шечIбы едини мизел’ одкIунийн чапаъас аIхы деш.
ЦIаIхни мизес ойкIанан адабиятни мизен язы яратмишаыйле хъийгъа, мана вазият юг хъувхьа. Шааирарше цIедда едини мизел’ одкIуныйн шечIбы кIазете , гойне журналэ чапаъа гибгъыл. Гойне манбы сен-сениле хаIдхъехьи гидгъылмее китаббышее чапаъы. Сабара шааираршин шечIбы дагъайдни сыныфбышди цIаIхни мизени адабиятни китаббышеехъа эчIу.
Сабара вахтыле цIаIхбышди шааираршин шечIбы дагъыстанни, кавказни, урусни мизяршилхъа тарджумачерше сакIалаъы. Йишди миллетни адабиятни гьаIкIее республике, гьоIкуматыл’, дюнйейл’ ацIахьа. ЦIаIхбышди шааираршин, язычершин асарбы республикайн, РФ-ни субъектбыше, гьоIкуматын чапыке къеккани Антологиебышеехъа гядкIу. Манчис ахтына кьиймат адабиятни танкьитчерше гьуво. Эгьес эхьи, 30 сенни аIрее йишди миллетын адабият фольклорыле классик адабиятылхъа гьидхьыр.
Гьел’бедти, са поэзиейква ва манчин китаббышиква адабият къурмишехьен кар дешодун. Шахъаб прозаб, драматургиеб, адабиятна публицистиква ва адабиятна танкьит вухьес вуккан. Манчил’ оойиб ишлемишоохьи вобунбы.
Йишди увгьойква, миллетни адабиятын артымишхьай йыIкьале хъооIни джегьилершике ва манбыщди баджарагъыке ва гьаIракатбышике аIслыда водун.
АIхреени сенбышее йишди шааираршин, язычершин 60-70 китаббы къайиккы. Манчин хаIддананбы поэзиейква багълыдананбы водунбы. Махъа Дабыз Джаббарын, Дабыз Шавкатын, Муса Фаррухын , АIшукь Сафарын, АIбдурагьим Дадашевын, АIбдурагьман ЫIмаровын (УлуцIаIхийн), Хан-Алмазын, ШейхаIлий ХанаIгьмадовын, Валегь Гьамзаевын, Сираджудин Кьурбановын, Кьурбан Омахановын, Элескер ГьаIджиевын, Ханпери Назировайн китаббы гядкIу. Анджах ман быкырын цIаIхбышди шааираршин сиягьий дешодун.
Шахъаб гуджнан шааирар ВаIгьид Мирзоев, Юсуф Юсуфов, Эмирджан Мирзоев, Лезги Семед’, Рашид Мирзоев, Фикрет ГьуIсейн6ов ДжуIма Сувагылий, Магьмуд Магьмудов, Нарман ГьаIсанов, Наргиз Раджабова, Къахлы Зафар, Гул’бениз Рамазанова ва мебынбы вобунбы. Ин ша Аллагь, манбышин китаббыд чапыке къайиккасынбы.
ЦIаIхни шааираршин асарбы урусни ва медни мизяаршилхъа сакIалаъас хаIдын кумаг Фазил Дашлайе, Фатима МагьаIммадовае, Мурад Саиде, Никита Кузьмине, Мердалий Жалилове, Аминат Абдулманаповае, Людмила Лыткине, Ашура Кузиевае, АIли Эмирове, Камил’ Шамхалове, ГьаIджи Омарове, Хаваш Носортаеве, Шахвелед Шахмарданове ва мебынбыше гьаы.
«Нур» кIазетни редакциейн цIаIхбышин шааирар ва поэзиейн гьаваскарар джони байрамыква табрикааъа ва джанана сагъвалла ва угъурбы аIрзуламишааъа!
