Россиейни Президентыни Владимир Путинни кьарарыква 2026 сен Россиейни миллетбышди садибыйвалис къадсыр. Гьайни сен тезеда сентябрьни 8-чил' Россиейл' миллетбышди мизяаршин Йигъ алгъавгьу. 

ГьоIкуматыхъаб гудж манке воохьи, агар мааъад ешемишехьени миллетбышис артымишхьесын барабарын усулбы яратмишеъэ. Гыргын миллетбы са кьаануныква ешемишхьес ыккан ва гыргынбышихъад акаран ихтиярбы ва борджбы ихьес ыккан. Садджу манке оIлкайл' саакитыйвалла вухьес ва манчин экономика артымишхьес.
ГьоIкуматни регьберарше манчилхъа хаIбна фыкыр гьооли вобна, анджах сабара республикабышее манчилхъа лазымна фыкыр гьооли деш.
Эн ваджибын са миллетын гьыIссад водун – миллетна миз'. Гыргыни Россиейл' мани суалыс къадсырыйн акциебы, маджлисбы, йигъынджагъбы илгъечIи. Мани сардан аIхреени сенбышее хаIдын атдым Россиейни къузайни – машрыкьыл'ни республикабышее. КIелидхын хъикIу аIл'гьаан мизера къелилхъа сугъоцаъа водунбы. Анджах сабара Къузайни Кавказыл'ни миллетбышди языбышихъад артымишхьесын усулбы водунбы, амма гьаIракатбы сен-сениле заыIфламишехьенбы. Манчин тахсиркарарыб, цIебба мани миллетбышин инсанар вобунбы, няъас увгьее водни имканбышике истифада гьаъа деш. Манчихъа ил'дяакы, югун гьаIракатбы гьагвас чалымишоохьен маъаIллимар, ааIлимар, ыIлимын ишчера, язычер, шааирар, журналистар вобунбы.
Дагъыстане гьайни сен едини мизяаршиква къадсырыйн джурабаджур маджлисбы, иджласбы, фестивал'бы ва медын гьаIдисабы ыхьа ва едини мизяаршилин мактаббышисын ва художественный адабиятын китаббы чапханабыше къайиккы. Джурабаджур маъаIллимаршини, шыгыртаршини едини мизяаршиква алаакьан конкурсбы илгъечIу.
Са вааджибын гидгъылыйн гьаIдисабыд водунбы: Дагъыстанни мизяаршин Сводбы гьазираъый ва мизяар оцифровать гьаъа гибгъылый. Гьел'бедти, манбы лазымын, дагъамда гьаIллаъас эхьен ишбы водунбы. Ин ша Аллагь, гьар темизни фыкырбышиква гидгъылни ишбышихъад хайирыкван аIхир эйхьенки.
Октябрьни 21-чил' Дагъыстанни девлет педагожи университетни дагъыстанни филологиейни факультете гьар мизяаршилин диктант илгъечIес. Манчина аIсас метлеб едини мизяаршилхъан назарат ыккый вобна.
Гьар сен республикайни джурабаджур майданбышее ман мизяаршин фестивал' илгъечIен. Мани йигъыл' ши са диктант джад деш ойкIан. Мани йигъыл' ши Ед', Ватан, йишди баба-дидершин насигьаIбы, миллетын аIдатбы, адаббы йикIел' хъаляъа. Гойнеб ши сана-санкъуква хъызааха, югун ыIмрен вахтбы йикIел'хъаляъа. Ши йишин едини мизекен ацIаал'бы ёхламишаъа ва маIгькамаъа. Ши йишин ушахар эн йикIес аIзизни карбышиква танышааъа.
Мани йигъыл' ши гыргын Ед' , Ватан, миз' вукканан инсанар джони хурни ушахаршиква, маъаIллимар, ааIлимар, кIазетын, ушахаршини журналын, телеверлишин, радиоверлишин журналистар, джамаъаIтчер, къуллухчер, депутатар, блогерар, динэгьлер, шааирар , язычер , ишкарар ва мебынбы саъаIт 10 -чил' ДДПУ- ни магьаIлле гозетяаъасынбы.
Гыргынкъус югун гьелен!