• Гьар дюнйейлхъа арыйни инсаныхъаб джус обкIунна ыIмыр вобна. Мана уфтанба, хызаныква, гогьар-гьамбазыква, дост-танышиква шадба, шуIгьлетыква вуккуй хаIбна хошбахтыйвалла вобна. Гыргыда зы ооъад увгьойн кал'мабы къийнийни йизди макьаалейни кьаIгьраманыс аваакIа водунбы. Мана Хьойикни хивна агъсаххъал, джамаъаIтни аIрайл' хаIбна гьуIрматына инсан Бабаев ГьаIбибуллагь Гъайбуллагьна дих ворна. 
  • Гь. Бабаеве йишди оIлкайни дагъамни вахтал' 1946 –ъэсди сен дюнйейлхъа ары. ХаIбна Ватанна даIвъий таамувхьайн хъийгъыйн сенбы, гыргынанкъаI дагъамыйваллабы ыхьа. ЦIаIхни дерайл'ни хиваршее ешемишоохьени инсанаршин доланаджагъ авхуйнбышихъа иляаканкъаI кьат-кьатна четинда ыхьа. Манбышихъад одхьуний, илёдгъуй, оохъа аляаъасын палтар еттыгъда ыхьа деш. Хиваршее ешемишоохьен джаванар, адамеер хизанбышин доланаджагъ гьуваджесдимее гьар сен къазанджыс гьавайкIан вухьа. Манбы цывыл' хъадымее АIранейхъа, Гурджустанхъа десте-дестена ишлемишувхьес абкIын. Юххьанийлхъамее мааъаб аахва вухьа. Манбышди джаргее Гьабибулагь дайийна дек' Гъайбуллагь дидей, манкъун эмисерий дайисерыб вухьайнбы.
  • Гъайбуллагь дайий ХаIбни Ватанна дяIвъыйна иштыракчий ыхьа. Манкъве даватбы фронтейхъа ал'гьааIсе гьихъа гьау. Эскерейхъа аIлгьааIнкъа, Гъайбуллагь дидейхъар кьоIйре ушах вухьа. Манбы манкъве джуни ёлдашылхъа Сейраний адилйхъа гьабсыр. Ватанна даIвъый гибгъыл-таамувхьесмее манкъвее фашистаршиквани вурушбышее иштыракау. Хьулехьее мана дагъамни вурушбышее яраламишхьана. Амма манчихъа ил'дяакы Гъайбулллагь дидей сагъра-саламатра фронтейнче хъарына. Хаахъа хъарыйни са сениле манкъуни хизанее хьебыдъэсда ушах - Гьабибулагь дюнйейлхъа ары.
  • Гь. Бабаевна ушахийвалла сибыкна вухьа деш. Манчихъа ил'дяакы. манкъве хъаIдхъый таргау деш. Мана 1953-ъэсди сен ЦIаIхни хивейхъа цIеддыйни сыныфейхъа аркIын. Хивын мактабын молюдъэсын сыныф таамау, хъийгъыйн хъаIдхъый алятIасдимее мана Мишлешни хивни мактабейхъа илгъечIу. КьоIдле сеннад манкъвее мааъад хъаIдхъыйле хъийгъа, атесттат алебтIу. 1966-1969-ъэсди сенбышее Ватанни гьийдын бордж хъелесдимее, эскерийвалла гьавъу. 1969 эскерийвалейнче саркIыл' хъарына. Эле гьамниджад сен Гь.Бабаев МагьаIчкъалайни шагьарее Политех технукумейхъа кьабыл'хьа. 1973-ъэсди сен ман югни кьийматбышиква хъаIдхъы таамгьау.
  • Хъийгъыйна ыIмырена йаIхъ Гь. Бабаевна хивни тасарруфатыква багълыба. Мана техникум таамгьауйн диплом алебтIумее ишлемишхьес хивейхъа саркIыл'. Мана цIерра «Правда» кIалхозе ревизионный комиссиейна садрына ишлемишхьа. Манчиле хъийгъа, манкъве хаIдда сенбына кIассирийвалла гьавъу. Пенсиейхъа хъигъечессиме мана «Правда» кIалхозее бухгалтерна ишлемишхьа.
  • КIалхозее ишлемишехьени сенбышике гаф гьаъанкъа Гь. Бабаеве увгьойн: «Зы кIалхозее хаIдда джурабаджура кьуллухбышил' ишлемишхьа. Манбы гьаIкIеда кIалхозбы гуджнаква инкишаф гьаъан сенбы ыхьа. «Правда» кIалхоз манке гьихъа аIл'гьаан ыхьа. Тасарруфатыхъад болун маIгьсулбы гьелен торпхбы, хаIдда даварар гьуваджен бакIийбы, чавра ахъаххъан фермабы ыхьа. Манке гьавъуйни заIгьматыс сикIы кIалхозе ишлемишоохьени инсананарше югун гелирный алятIа. ГьаIшде кIалхозбышихъад маIгьдын гьаIракат аху деш. Районын хаIдданан тасарруфатбы дагъылмишхьа адкIынийнбы. Мааъаб ишлемишоохьени инсанаршин сайыд, гьуваджен малкъарад аху деш. Гьийдын тасарруфатбышике садджу добы аху водунбы. Манбы зас меед гьийдни сенбышейдын хьинне болда къаджес ыкканий».
  • Гь. Бабаеве 1971-ъэсди сен даватбы гьау. Манкъве Банавше баджийква гееб уфтанна аиле къурмишавъу. Манбыше саджигэе йихьыйре ушах ёкьуйре гадейий кьоIйре ичий чIакIы хъавъу. Манбышди гыргынбышис хъаIдхъый гьуво, эвле-атта гьавъу. ГьаIшде манбы ушахаршике, невабышике гуянмишоохьи. Манбышед дидейнайий адийна дараджа гьаммаше ахтывалей гьуваджес чалышмишоохьи.
  • Заквани горушее ГьаIбибулагь Бабаеве вудж гьавъуйни ыIмырыке нимеехьей рязийра ворнава агъмишау. Манкъве увгьойн: «Йизын сенбы- йизда девлет вобна. Мани сенбышее зы хаIдданан югуний-писин къаджы. Амма манчихъа ил'дяакы, гьаммаше чалышмишхьана сабырыква ешемишхьес. Гьаракатауйн гьамбазаршини аIрайл', хивее гьуIрмат къазанмишаъас. Манбышиква югра ёла ооIхъаIс. Къийна йизда иш невабышис тербие гьувойка багълыба. Манбышди гьарункъуни югни йигъыква зы шадехьена. Маныд йиздимее хаIбна хошбахтыйвалла вобна»
  • Гь. Бабаев ешбыше ыхьейир, мана са агъсаххъал хьинне Хьойикни хивни гыргыни ишбышее иштыракаъан. Манкъве лязымынкъус кумаг ва мислягьаIтбы гьелес гьар вахтал' гьаIзирра ворна.
  • Гьайни йигъбышее йизди макьалайни кьаIгьраманее Гь. Бабаеве вудж едике ыхьайн молюдцIал' сенийн юбилей алгъау. Мана табрикаъас хаIбба манкъун дёлесынбы, гьамбазар, даст-танышар сабы. Абыйн мигьманар Гь.Бабаеве мавлидыква къаршиламишавъу. Манбыше юбилярыс хылийна ыIмыр ва джанана сагъвалла аIрзау. Юбилярей вудж табрикаъас абыйнбышис югун дилягбы гьеххъы, манбышди гыргынбышис хылийна ыIмыр аIрзау.
  • Зынар мани табрикбышилхъа илеккана. ГьаIбибулагь Бабаевыс гьинчиле хъийгъад хаIдда юбилейбы алгъаъас, джанана сагъвалла гьевлена!. Гьасре манбыд джунимее шадынбы ва хошунбы ихьеджин.