ИлгъечIуйни уIл'джумее МагьаIчкъалайни шагьарее джванаршини аIрайл' футболун кубокун оIюн илгъечIу. Гьар сен алгъайгьени футболни кубокни оIюнбышее йигIни дестейн иштыракаъу.  

АIхырейни сенбышее цIаIахбышди джаванршини аIрайл' футболни оIюнбышилхъан гьавас хаIдхъыхьа. Гьар сен манбыше ЦФЛ чемпионат, ХаIбни Ватанни даIвъыйни иштыракчершини едигарыс къадсырыйн турнир, Кубокун оIюнбы алгъайгьи. Мааъад джаванарше сауйни дестебыше джони аIрайл' баIстбы ыккекка. ИлгъечIуйни сенани сезоне ЦФЛ ни чемпионате йицIни дестей иштыракаъу. Манбы хиваршейнче сауйн дестебы ыхьа.
Гьайн сена илгъечIуйни кубокни оIюнбыше йигIни дестейн иштыракаъу. Манбы «Аттагъай», «Ихва», «Курдул», «Карадагъ», «Самур», «Согют», «Миккиг-Цахуры» ыхьа. Дестебыше геед марахукван ва уфтанын оIюнбы гьагу.
Финалее «Ихва» - «Самур» дестебы хъызаххы. Манбышди аIрайл' Кубок «Ихва» футболни дестейс кьисматхьа.
Футболун Кубокун оIюнбы ташкилаъуйнбышди увгьойква, мани саягъыл'ни горушбышее цIаIхни халкьын джаванар саджигейхъа сааъа. Манбышди аIрайл' вобна доствалла сыкыIылбаб утIумаъана.
ГьаIшде ЦФЛ футболын дестебы 2026-2027-ъэсди чемпионатыс гьаIзирехьи. Манчин оIюнбы сабара вахтаке гигъаласынбы. Дестебышис ши илгъечIесди чемпионате угъурбы аIрзаъа.