Къийна СВО цIаIхни халкьни хил'дже джаванарше иштыракаъа. Манбышди гьаарункъве игитийваликва Ватанни гьийдын бордж хъели водун. 

Манбышин игит гьаракатбы, кьаIгьраманийвалла гьоIкуматын джурабаджурайни орденбышиква, медалбышиква, пайбышиква бил'дираъа.
Гьайни дёлесийвале сайиб шадна хабар Каспийскни шагьарейнче хъабы. СВО ветеран Сафаров АIгьмад Ил'ясна дих Жуковни медалыс лайикьра къаджы. Россиейни Президенте В.В.Путине гьайни сенни августни 6-чил манкъус медал гьелесди кьарарылхъа къол гиххьы.
Жуковын ахтыйни дараджайкван награда водун. Манчис баджарухукван, вурушбышее джомардыйвалла гьаагуйн, дирибаш эскерар лайикьааъа. Манбышда сайир къийнийни йизди макьалайна кьаIгьраман АIгьмад ворна.
АIгьмад Сафаров гьинчиле сабара сенбына гьихъа джуни хайишиква СВО аркIын. Мана хаIдданани дагъамни вурушбышда иштыракчий ыхьа. Манчихъа ил'дяккы, мана мани цIаейнче сагъра-саламатра хъигъечIуна. АIхырейдын вуруш манкъуниме геед йыIкьын ыхьа. Манбышда десте душманарше аахъыйни атышилхъа гябкIы. АIгьмад ва манкъукван гьамбазар йыIкьба яраламишувхьайнбы. Душманаршин топ-къалагъ манбышди яныл' къитIодкIул. Йизди макьалайна кьаIгьраман къелике йыIкьра яраламишхьана. Манбы сабара йигъбына хъигъевчIес даIвхы, мааъаб авху. Миллетчершин атышбы явашхьайле хъийгъа, мана геедни дагъамийвалика вурушбы адкIынни джигейнче позициейхъа саркIыл. Манкъве джукван гьамбазарыб гьабазарыб кIеливханавъу деш. Манбы дагъамба яраламишувхьейиб, АIгьмаде достаршис цIеддыйн кумаг гьувойн.
АI. Сафаровыр фронтейхъа сакIалас хьинне ыхьа деш. Мана госпиталейхъакъалиъы. Игит' эскер хил'дже вахтна мааъар маалидже аляатIа ыхьа. Джан бабатда тавулхъа хъадыме, манкъуни фыкрее тбыIссаъат джуни гьамбазаршисхъа саркIылий ыхьа. Амма дохтурарше АIгьмадыс иджааза гьуво деш. Мана манче хъаахъа оIтирау.
Манкъуни деккей, Ил'ясее, духайс гьувойни медални гьаIкIее гаф гьаъаанкъаI увгьойн: «Йиздидихыхъа Ватанылхъан мугьуIб гьаммаше ыхьайн. Манчихъа гора мана СВО джуни хайишиква аркIын. ГьаIшде вудж хааъар ыхьейир, манкъве гьамбазар кIеливханааъа деш. Мана гьар вахтал' манбышиква алаакьее ворна. Къийна зы манкъуле гуянмишехьена. Манкъве игите хьинне Ватанни гьийдын бордж хъуо саркIыл'на.
АIгьмаде ветеранийвалла гарданахъа алябатIа деш. Мана Каспийскни шагьарни администрациейн алгъайгьени джурабаджурайни тадбырбышее, йигъынджахбышее иштыракаъан. Джуни чыхышбышее махъа сабыйнбышис СВО къаджейнчике гаф гьааъа. Мани саягъыл' джаванаршини аIрайл' ватанпарварийвалла гуджлемишааъа.
Награда гьелен тадбыр гьайни йигъбышее Каспийскни шагьарее илгъечIу. Мани йигъыл' АI. Сафаровука саджигее СВО вухьайни менни игитершед наградабы алятIуйнбы. Наградабы манбышис Каспийск шагьарни ва военный комиссариатни къуллухчерше гьуво.
«Нур» кIазетни редакциейн Сафаров АIгьмад Ил'ясна дих ва манкъун дёлесынбы гьокуIматни ахтыйни наградайква табрикааъанбы. Медалыс лайикьра къаджейни кьаIгьраманыс джанана сагъвалла аIрзааъа.