Са йигъыле йишди оIлкайн ХаIбни Ватанни даIвъийе Гъамувхьайн 80 сенийн байрам алгъагьас. Ман Советни гьоIкуматни инсанниме некки аIзизын байрам водун. Няъас увгьее хаIдда миллетбынани оIлкайни гьар хаанче Ватан душманыке къаттивхьанааъас инсан аттамишхьа. Арайле хаIбба вахт абкIынейиб , йишди ачухни йигъниме, йишди саламатийваллайниме джон аIзизын джанбы гьувойнбы ши ненкеджаб кIеливханааъас деш. Ши сагъба летти, манбыб гьаммаше йишди йикIек’ аахвасынбы.
ГьаIшде цIаIхбы кьоIбле ватаннан халкь водун. Советни деврыл’ шахъаб са Ватан вухьа. Манчиниме джон джан гьелес гьаарна гьаIзирра ыхьа. ХаIбни Ватанни даIвъийни вахтал’ гыргына фронтниме чалышмышхьа. ОIлкайни ваIщеле агъаллани миллетбышиква янашеда йишди халкьын фашистаршиквани даIвъийе хаIдын гьунар гьагу. Манбышди гьаIкIее одкIуний, манбы йикIел’ хъавалявъуй йишин бордж водун.
Закатала районни цIаIхбышди Кьас, Кьаркьвай, Къалал, Эзгилли хиваршейнче ХаIбни Ватанни даIвъийехъа 170 инсан аркIын. Мани вахтал’ ман хивар са кендсоветехъаний гехьа. ДаIвъийле хъийгъыйни сенбышее мани хиваршеедын джаIмаъатбы кьадаалилхъа кочмышхьа ва АIлибайрамлыйна хив къурмишавъу. ГьаIшде манчикIле Дагълыва эйгьи.
Ватан душманыке къаттивхьанааъас фронтейхъа абкIынийнбышди джаргэй МаIгьаммадов ГьаIбибуллагь Кьасымна дихыр ыхьана. Мана 1920 сен Закаталайни Эзгилли хивее едике ыхьа. 1942 джегьил’, геллесын джун тай-тушер хьинне, немец-фашистаршиквани даIвъийехъа аркIын.
ГьаIбибуллагье манче даIвъийехъа аIл’гьаани гыргыни эскерарше хьинне, Мутурстанни ЦIынорни станциейхъаме йаIхъ пиядаба алгъавгьу. Гойне Гь. МаIгьаммадов гьамбазаршиква поездиква Орджоникидзейни шагьареехъа хъары. Гьиняаъад манкъве пулеметчикар гьаIзирааъан хьони вузан курсбы илгъечIу.
ГьаIбибуллагь МаIгьаммадов ХаIбни Ватанни даIвъийе цIеддыйни ва хьебеъэсди Белоруссиейни фронтбышди Таганрогни 416-ди дивизиейни таркибее вурушмышхьа. Йишди игит кьаIгьрамане Киев, Сталинград, Белгород шагьарбы фашистаршике азад гьаъанкъаI джомардийвалла гьаагу. Ёкьни элеес яраламишхьана.
ХаIбна Ватанна даIвъий аазырий ючIудваIще ёкьцIале хьодъэсди сен таамувхьейиб, Гь. МаIгьаммадовыс хаахъа 1946 сенни октябрьни вуза сакIалас кьисматхьа. Манкъуна игитийвалла гьоIкуматын ЧIарани ХаIнейни, Ватанни даIвъийни орденбышис ва хаIдданани медалбышис лайикьавъу. Ветеране суIл’гьни вахтал’ джурбаджурни ишбышил’ заIгьматавъу. Мана гьаммаше гьалалын къык охьанас чалышмышхьа ва йыIкьале хъооIни насылбышисыд ман хаIдхъаъа ыхьа.
ХаIбни Ватанни даIвъийни гьаракатукани иштыракчийе Гь. МаIгьаммадове хылийна, ючIаIл сениле гьеххана ыIмыр гьавъу. Мана АIлибайрамлыйни хивее раIгьматыххъа аркIын.
Къийна фашизмайн меб вукIул’ къалхмишавъу. Мана кIаарна кIуда шавааджаб гозет’дяаъани сурале хъабы. Манчин до Украина водун. ГьаIшде, 1914-1945 сенбышее хьинне, манчина кок йишди кьаIгьраманарше СВО авакIанааъа вобна. Шакдена, манчиныд аIхир хъалесын ва ши гъамувхьесынбы. Няъас увгьее ши гьаIхълыба вобунбы.
