Гьар дюнйейлхъа арыйни инсаныхъа ыIмырна йаIхъобна. Мана йаIхъ гьалалба,темиз’ба гьоогьарас вуккан. Йишди миллетихъаб гьунарыква,ачухба ыIмырна йаIхъ гьообгьурийн инсанар еттыгъба вухьайнбы. Манбышда сайир Гыл’мецIни хивеенчена Мирзоев Эмирджан Саламна дих ыхьа.
Э. Мирзоев 1935 сенни январни 9-чил едике ыхьа. Манбы дагъамын вахтбыний. ГыргынанкъаI кIолхозбы къурмишаъана вахт вухьа. ЙигIыдле еш быкырхьайнкъаI, 1942 сен мана Гыл’мецIни дагъайдни мактабни цIеддыйни сыныфеехъа хъаркIын. Гойне манкъве ёкьудъэсын сыныф ЦIаIхыйни мактабни интернатэй быкрау. Хъийгъа летти джегьиле джун хъаIдхъый Рутулни хивее давамау. Мааъад манкъве йыIкьнекин мактаб таамау.
1954 сен Эмирджан Мирзоев эскерейхъа аркIын. Манкъве хьебыдле сенна Ватаныс къуллух гьавъу. Эскереенче хъарыйле хъийгъа, Дагъыстанни мединститутеехъа кьабыл’хьа. АаIли мактабее мана эн югда хъаIдаххъани телябабышди джаргэй ыхьа.Манчиле гъайре институтни ишее гьаракатукан иштыракний гьаъан.
Институт таамау, Эмирджан дохтур Рутулни районни больницее хирург-травматологна ишлемишхьа. Манкъухъаб хаIбна гьоIрмат вухьа. Рутулни районе ишлемишехьени вахтал’ Эмирджан дохтур дехьана хив баIджагьат авху. Манкъве хаIббаннани инсанаршин джанбы, къел’бы, хулеббы хъувадкау.
Э.С. Мирзоеве джуни саIнаъатыкен ацIаал’бы артмишаийниме Ленинградни шагьаре дохтураршина дараджа ахты хъааъани институтни аспирантуреехъа иккечIу. Ёкьудле сенна мааъад хъаIдхъы. Дюнйейл’ сифтаба манкъве хылийни люлейквани баркIубышилхъа лазерын таIъсираий хаIрхъихьа, практикэй ишекечирмишау. КьоIни сенни аIрее Эмирджан дохтуре диссертацие обкIун, угъадука мана мудафиа гьавъу ва медицинайни ыIлимбышда кандидатна дараджа алябтIу.
Хъийгъа ааIлимни дараджайквана Саламна дех Эмирджан МаIгьачкъалэйхъа саркIыл, Дагъыстанни мединститутэй ишлемишехьи гиргъыл. Сабара гагьыле мана доюкана травматологхьинне Алжирни Республикеехъа къахову. Хил’дже вахтна мааъар ишлемишхьа, травматологиейн пунктбы ачмишау, саIнаъаткарар гьаIзиравъу. Алжирни гьоIкуматын Эмирджан дохтурни ишис ахтына кьиймат гьуво, манкъве къавджуйни ишни гьаIкIеедын фильм цIыцIау.
Мани оIлкайле савагьийда Эмирджан Мирзоев Тунисни Республикайл’ угъадука ишлемишхьа, 400 агъаллан операциебы гьау. Маадыд джуни дохтурни пешейни баджарыгъыйваликва ерры халкьни арайл’ хаIбна гьоIрмат къазанмишавъу ва гьоIкуматын манкъуни ишис лайикьна кьиймат гьуво.
Ватаныле къырагъыл’ни сенбышее Эмирджан Саламовичын дохтурни саIнаъатыле гъайре шааирын талантыд ашкархьа. Манкъве аIрабни оIлкабышеени вахтал’ хил’дже шечIбы одкIун. Манбы саъас хъадэе, са абырыкван китаб къайиккас эйхье. Манчин сабарабы ши «НУР» кIазетее гьувойнбы. Манкъун шечIбы Ватанылхъа, дюнйейни гедишатылхъа ва менни гьаIдисабышилхъа къадсырыйнбы ыхьа. Эмирджан дохтуре хаIдын хаджалат Совет гьоIкумат дагъылмишхьайке гьау.
Хаариджийл’ни командировкайле хъийгъа, мана МаIгьачкъалэйхъа саркIыл. Мед доцент Э. Мирзоеве Дагъыстанни медакадемиее дарсыбы гьели гиргъыл, Республикайни травматологиейни марказее ишлемишхьа. Республикайни травматологиейна агъсаххъал Эмирджан дохтур 2018 сен раIгьматыххъа аркIын. ГьаIшде манкъуна иш духее давамааъа вобна. Медицинайни ыIлимбышда кандидат Эмирджанна дих Назим Мирзоев хаIдда сенбына Санкт- Петербургее ортопед-травматологна ишлемишхьа. ГьаIшде манкъве МаIгьачкъалайни шагьарее дек’ ишлемишхьайни джигэй заIгьматааъа вобна.
