Гьайни сен йишди гьоIкуматыл’ майни вуза ХаIбна Ватанна даIвъий таамувхьайн 80 сен алгъагьас. Мани даIвъийе дюнйейлин миллет фашизмайни идеологиейле гъамхьайн. Манчина кьиймат лап йыIкьна вухьа. Анджах фашизмайна кок юзмишавъу деш. Нен миллетый даIвъийни йыIкьни хылик авхъа хъады, къийна мед гьаманбышеджад гьаманчис оIги мед гьели водун.
КьоIбъэсда дюнйейна даIвъий ХХ-ъэсди асырее вухьана дюнйел’ эн хаIбна даIвъий вухьа. Мани даIвъийе хаIдданани оIлкабыше, миллетбыше иштыракаы. Милйонбышиква джегьил эскерар, кьаIсинбы, ушахар манчин дюнйейле вукку. Аазырбышиква шагьарбы, хивар дагъылмишау. Мысвалике, мыкIаалике сан-гьыIсаб дена инсанар гьабтIу. Фашизмайн оIги ыIхасдимее эн уфтанни, гуджнаквани джегьилерше джанбы гиххьы. Анджах инсанарше манчин дарс ил’детIуйн. Мани «фашизм», «нацизм» донани азарын мед ярабы тезелемишаъа водунбы. Къийна ман кар шакIле ашкарда Украинее къеджи водун.
Йишин бордж водун ХаIбни Ватанни даIвъийн дарсбы кIелихан гьидяуй. Манчин зиян, уцIур, ыкIар гьидёвойн хав йишди гьоIкуматыл’ гьассыр деш. Хьулейре сипIырийне айху, хьулейре етим ушахне аху, хьулейре кут’не мани даIвъийн гьарсыл’ дюнйейни акьвал’. ГьаIшдед манчин ярабы мейид водунбы. Эн хаIдын зиян манке йишди оIлкайс хъетIу. Гьел’бедти менни миллетбышиква саджигее , мани даIвъийе хаIббанани цIаIхбышди джегьилерше джон джанбы Ватанни меега намыквани чIиел’ гьадсыр.
Мани даIъийе иштырак йишди баба-дидершед гьауйн. Сабарабы тылыл’ ишлемишивхьа. Едарше адамершин ишбы гьаъы. Малкъара гьуваджы, фронтеехъа турсбы, чуры, ниссе, няк, хьыняал’ оIтираъы, Фашистаршин танкбы илгъемечIеджинва, сангарбы гьаъас , кIоран архбы къазаммишаъас гьабкIын. Манбышин хаIббананбы мааъаб мысвалике, мыкIаалике, чIырвал’бышике гьабтIы. Манбышда игитийвалла ши кIеливханааъас вуккан деш. Сенис ветеранаршини едигарыс къадсырыйн йигъынджагъбы алгъагьас ыккан
Гьайни аIхреени вахтал’ мана иш гьаIракатеехъа эвчIу. Хиваршее гьаIйкалбы тезелемишаъу, дешди джигее манбы гиххьы.
ЦIаIхбышди ветеранаршини Союзыс садрывалла гьаааъас АIгьмадов НезирмаIгьаммад Эфендийна дих гиххьы. Мани джамаъаIтни ташкилатна метлеб ветеранаршиква багълыданан ишбы гьаIракатеехъа адчий вобна. Махъа ХаIбни Ватанни даIвъийни ветеранаршиква саджигее локальный даIвъийбышин ( Афганистан, Чечня, Дагъыстан, Украина) ветееранар гябакIа.
Шаца Н. АIгьмадовее джегьирлершини кумагыква ветеранаршис къадсырыйн футболун оIюн цIаIхбышди джегьилершини аIрее алгъавгьу. Джуни джибеенче хаIдданан харджий гьау.
Къийна мана иш даянмишивхьа дешобна. Мана чалышмишехьи ворна хиваршее ветеранаршиква багълыданан ишбы ыккейс. Н. АIгьмадовни мислягьаIтыква хивни джегьилерше ЦIаIхни хивее ветеранаршис къадсырыйн хаIдын мемориал ачмишау. Манчихъа даIвъийе иштыракауйни гыргыни хивни ветеранаршин добы одкIун ХаIбни Ватанни даIвъийни ветеранаршина гьаIйкал тезелемишавъу. Гьел’бедти ман ишбы хивни джамаъаIтни кумагыква гьаъы.
Гьайни сеныд Сувал’ни маIгьалыл’ни хиваршее мани юбилейис къадсырыйн джурабаджур спортын оIюнбы джегьилершини аIрее алгъавгьуй фыкрее водун. Манчиле гъайре, ватанпарвар тербие гьелен горушбы мактаббышее алгъагьас.
ГьаIмагьдын хайирхагь гьаIракатыкван ишбы Мишлешни хивее ыккы. Мааъаб хивни йыIкьнена ветеранаршис гивхьына гьаIйкал тезелемишавъу. Мишлешни, ДжинаIгъни, Гыл’мецIни, ЦIаIхни, Муслагъни йыIкьнекни мактаббышее локальный даIвъийбыше , СВО иштыракаъани эскераршикван горушбы илгъечIу. Мишлешни ва ДжинаIгъни мактабеын мигьманар гьаммаше Россиейн пограничниуар воохьи. Мактаббышин ушахар эскерни къуллухыква, ешайишиква танышивхькс манбышди заставабышеехъа гьавайкIван. АIсас ватанпарвар тербиелхъа фыкыр гьоолен мактаб Гыл’мецIни хивын водун. Агар хъодкуда увгьее , мана иш кьулайква хаIрни пионервожатыйе АIсадуллагь Рамазановейий, маъаIллиме Аслан Давудове мактабее вуккекка вобна. Хьойикни хивее ХаIбни Ватанни даIвъийни ветеранаршисда гьаIйкал гьазирааъа вобна. Манчисын диб гиххьыйн. Умуд вобна, хивни джаIмаъатын мана гьаIйкал 80 сенни юбилейни йигъыл’ ачухааъасда.
Гьайни сен, юххьан хаIдда югун йигъынджагъбы Сувал’ни маIгьалыл’ алгъавгьуй ниятеехъа алеетIу водунбы. Ин ша Аллагь , манбы халкьбышди кумагыква шадда, саакитда, марахыква алгъагьасынбы.
