Январьни 12-чил’ Раджабна ваз гибгъыл. Мана цIыцIавхьесда февральни 10- меега. Гойне ШаIъбанна ваз февральни 11-чиле мартыни 10-мага цIыцIавхьес. Хъийгъа эн аIзизна Рамандина ваз хъавалес. Мана хьейибле вузар ыIбадат гьаъан ва дилягбы, доъаIбы Аллагье кьабыляъан вахт вобна.
Къийна динни гьаIкIеедын ихтелет’ геедни аIгьтиятыка гьаъас ыккан. Са хъичIодкурыйн джуваб гIалене хъигъечIее, ыIмреке ихьес мункум вобна. ШакIле ацIан дюнйейл’ чIакIын ёкьудле динбы: исламын, хачбаразын, ягьудершин, будистаршин. Манчин хаIдданан ыIмрени гьаIкIеедын увгьойбы сана-санчиква акарада водунбы. Анджах бадалыйвал’быд гьел’бедти водунбы. Санбыше ыIбаадат садджу са Аллагьыс гьаъа, шенсанбыше уюхбышис.
Ман динбы дюнйейлхъа Аллагьни амурыква пейгъанбарарше еймишау. Исламынийий хачбаразаршин динбы сана-санчис дёлесин динбы водунбы. Динбышди адыд гьар джурайлин йаIхъбы, джигъырбы водунбы. Са йаIххъылхъа савалесдимее аазырбышиква сенбы ыккан. Гьаарункъве вудж аIл’гьаана йаIхъ хъобкуйнчис гьыIсаб гьааъа. Манбышин гьавасбы сана-санчиква эксина хъадымее, аIреехъа наразывалла хъигъоочIи. Мана хаIбхъоохьилетти инсан азгъунехьена. МеннягьаIр фыкырамишехьени инсанылхъа гьуIджум гьааъа. Анджах нениджад динее, нениджад эвлия китабее эйгьи дешодун медын дин гьаъана инсан гикIева. Гыргыни инсанаршис ыIмыр Аллагье гьуво. Мана алебтIасыб са манкъухъад иджааза водун.
Ши мусурманни уммайнбы, Исламни дининбы вобунбы. Шахъар са баба-дидей ыхьа. Анджах шинаб джурабаджур йаIхъбышилхъа джуребхьа.
Чубара душманаршилхъа сабкIыл. МуIгьубна перда хъобхуна. Мана хъидявъу, дюнйейл’ суIлгь ихьес деш. Йизди увгьойка, къийна дюнйейл’ кIяаъана эб диниква алакьаба дешобна. Манчина вукIул’ барабарыйвалла девхьай, хъобкувалла девхьай, ешайиш гьаъасын имканбы яратмиш гьидяуй вобна. Эн хаIдын уцIыр мани сардан Палистине, Сектор Газа цIыцIаъа водун. ДжуIгьутIерше мани Пейгъанбараршини чIиел’ ледж адчу водун. Йигъыс джегьилера, кьаIсинбы, ушахар, хьунащер гьабатIа вобунбы. Къырагъыле манбы сана-санкъулхъа «кысааъа». ХаIдда гьаIракатбы гьаъы Россиейн, мусурман оIлкабыше мани даIвъийн оIги ыIхас, анджах гьалеки манчисда дарман тIалабааъас даIвхуна.
Гыргыни карахъар са сааIгьыб эйхьенаки. Агар са карахъар кьоIйре есси ворхьее, манбышди аIрее гьыIдджат ихьес. Гьаарункъве вудж хъоркура ворнава эгьес. ГьаIмагьдыд динбышее водун. Мани дагъамни вазиятна кок ваацIавхьес ва манчисда дарман тIалабааъас Дюнйейни мусурман оIлкабышин регьберар, чIакIын динэгьлер Конгрессеехъа сабы. Анджах не мусурман оIлкабыше, не ООН-ын кьабыляуйни резолюцебышике Израилис чара вухьа деш. НягьаIдый манбыше Сектор Газа ешемишоохьени мусурманаршин хав-уджагъ дагъылмишаъы, медыд гьаъа водун. Манбышди далыйлид Америка, Англия илёдзур водун. Украине спецоперацие гидгъылыйнкъаI Авропа, Америка «хъытIахханий»: тахсир дешин инсанар гябатIава, хайбы дагъылмишаъава. Анджах йишди эскерарше мана вайсийвалла мысаджаб гьавъу деш. Садджу военныйбышиква гьичIобкур ва военный объектбы укранацистаршин дагъылмишаъы ва гьаIшдеб гьамана иш темиз’ба гьааъа вобна. Къийна джуIгьутIершикIле геноцид Сектор Газее гьаъанкъаI джуваб эйгье деш. Няхъане демократие ыхьа? Гойнед няхъане мусурман оIлкабы илякка ацIа деш. Гьале, ши мусурманар вобунбыва коксибы гетани оIлкабыше, Израил’ни армиейс наIвыт’, медын янаджагъ, ярах гьаъасын йива дюгленда гьели. ДжитIада дюнйе быкырда сайидкьыл водун. Къийна садджу Палестинееджаб деш , ахуйни Дёлесни Машрыкьни мусурман оIлкабышил’ – Иракыл’, Ливиее ва медынчил’ диниква багълыбанана дагъамийвалла вобна. Манчихъа гора, мана дагъамийвалла гьаIллааъасдимее гыргын мусурманар са мислягьаIтеехъа хъавалес вуккан.
Къийна йишди гьоIкуматыл’ 20 милйон мусурманий ворна. Гьиджо имкамбыйи хачбаразаршини диныс гьуво, исламни динысыд манбы гьуво водунбы.
Садджу йишди республикее 120 миллетин инсанар ешемишоохьи вобунбы. Манбыше исламни, хачбаразаршини, ягьудершини диныс ыIбаадат гьаъа. Ненкъведжад ненкъусджад мешат гьаъа деш. Исламын дин гьаIракатеехъа хъаляъасдимеега, Дагъыстане 2 аазыр Исламын ташкилат водун ишлемишехьи. 20-25 аали ва йыIкьнекин Исламни динын мактаббы водунбы. 8 дагъыстанни мизаршил’ исламын кIазет’бы хъигъеечIи. Джурабаджур телеканалбышил исламни динни гьаIкIеедын верлишбы эйхьи. Гьар сен ГьаIдж къилмишааъас АIрабстанылхъа аазырбышиква инсанар гьавайкIан. Къийна республике диныс ыIбаадат гьаъани инсаныс гыргын имканбы гьуво водунбы, анджах гьалекийс гыргын динэгьлер гьалекийс мислягьаIтеехъа хъабы деш. Мед ман кар къыIлина аэропортыл’ вухьайни гьаIдисайн гьагуйн. Ман сабаранбыше диныква алаакьа гьаъа. Йишди увгьойка, Исламын дин манчика алаакьа гьаъас ыккан деш. Мани баляана кок медни джигее тIалабааъас вуккан. Исламын дин оIгеехъа гьуво, сабаранбыше джон кIарын ишбы гьаъа. ГьаIкIени мусурмане ярах тахсир дешди инсанылхъа мысаджад къалхымишаъас деш,терактбы джамаъаIт садыйни джигабышее гьаъас деш. Шавусмы йишди республикайл’ ледж адчес ыккан водун. Манбыше джегьилершин маIгьбы къайнемишаъа.
ГьуIрматыкван чоджар! Сабара вахтыле шалхъа Рамандина- эн аIзизна ваз хъавалес. Шахъад имканбы водунбы манчис гьазирувхьесын. Ин ша Аллагь , манкийс Украине аIл’гьаан спецоперациед, Палестинее гибгъылна даIвъий даянмишивхьесда . Аллагье тахсир дешин инсанар гьувааджесынбы ва тахсиркараршис лайикьна пай хъевлесда.
