1999-ъэсн сен Дагъыстанни таарыхейхъа кIарни гьаIрфбышиква одкIун. Манке республикайни сабара сувал’ни районбышейхъа ярахыква хаариджи банддестебы иккебчIы.
Азгъунувхьайни душманаршини фыкрее Дагъыстанни Конституциейн къулай хъоттулуй, мааъаб ешемишоохьен халкьбы джос таIъбы гьавъуй ыхьа. Амма манбышди фыкырейдынбы джосджад аху. Торпахбы душманаршике гьувааджесдимее Дагъыстанын халкьбы саджигейхъа сады. Манбыше эскераршиквайий полициейни ишчершиква хъитIобтIул абыйни мигьманаршин йыIкь гьакьварыйин.
Гьайни йигъбышее мани гьадисабышин 25 сен быкырхьа. Къийна Дагъыстане мани вурушбышее иштыракауйн, гьабтIыйн эскерар, полициейн ишчер, тахсирдешин инсанар йикIел’ хъаваляаъа. Манбышди игитийваликва багълыданан йигъынджахбы, тадбырбы алгъайгьи. Игитершис къадсырыйн кинобы гьагва.
Сайид мани саягъылидын хаIдын йигъынджах МагьаIчкъалайни шагьарее «Россия — йизын таарых» донани музее илгъечIу. Мааъад «Август 99. У последней чарты» мультимедийн гьагуй илгъеIу. Манчини аахъей Дагъыстан Правительствайни хаIрынкъве АIбдулмуслим АIбдулмуслимове, МагьаIчкъалайни мэре Юсуп Умавове, министерствабышди вукIлелинбыше, 1999-ъэсди сен ыхьайни гьаадисабышди иштыракчерше иштыракау.
Премьер-министре джун чыхыш манке Дагъыстанна аазадийвалла гьувааджесдимее вурушбы ыккыйни эскераршди, милициейни ишчершини ва ополченцаршини игитийвалике гидгъыл. Манкъве мультимедни гьагвейхъа сабыйнбышис хошгелдий гьавъуйле хъийгъа, увгьойн: «Къийнийн йишин йигъынджах гьинчиле 25-сенна гьихъа Дагъыстанее ыхьайни таарихыква багълыдани гьадисайс къадсырыйн водун. Манке йишди Дагъыстанни халкьбыше джона джамардийвалла гьаагу. Манке хаариджи банддестебышше Ботлихни районеехъа иккебчIы. Манке Дагъыстанна садибыйвалла гьувааджесдимее хаIбна гичI вухьа. Республикайни дагъамни вахтал’ гыргыба саджигейхъа сабы душманаршиква вурушбы ыккейс сугъооцу. Дагъыстанлыбыше дюнйейлхъа джона ватанпарварийвалла гьаагу. Душманаршиквани вурушбышее хаIдын иштырак кумагыс абыйни эскерарше гьау. Манбыше ши текба гьабсыр деш. Дагъыстанна, Россиейна садибийвалла гьувааджесдимее республикейхъа ваIшбышиква эскерарый, милициейн ишчер менни регионбышейнче абы. Манбышди аIрайл’ гьабтIыйнбыб, яраламишувхьайнбыб вухьайнбы. 1999-ъэсди сен ыхьайни гьаадисабышее ши душманаршис йишда гудж гьаагуна. Къийнаб Россиейл’ саакитийвалла дешда. Миллетчерше диндж гьели деш. ГьаIшде оIлкайна санабыйвалла гьувааджесдиме Дагъыстанейнчени джегьилерше СВО иштыракаъа. Манбыше мааъад джона игитийвалла гьаагва. Къийна ши 1999-ъэсди сен ыхьайни гьаадисабышин, СВО иштыракчер йикIел’ хъаваляъа. Манбы йикIел’ хъавалявъуй йишди гыргынкъун бордж водун».
Гойне хьине чыышбы Россиейни КьаIгьраманарше МагьаIммад Баачилове, Загьид Загьидове гьау. Манбышед джуни ихтелетбышее 1999-ъэсди сен къаджейни вурушбышике йишонебхьа.
Манчиле хъийгъа махъа сабыйнбы мультимедийни гьагуйква дёлесвалейнче танышувхьа. Гьагвее 1999-ъэсди сеней вурушбышее иштыракауйни эскераршин шикыл’бы, манбышис къадсырыйн кинобы, милициейни ишчершини джомардийвалис одкIунийн китаббы гьагу. Манчиле гъайре, джурайда гьагвее манке ыхьайни гьаадисабышее Россиейни кьаIгьраманаршин до алятIуйни игитершис гьаIзирауйн стенбыд гьагуйнбы.
Йигъынджахни аIхырее АIбдулмуслим АIбдулмуслимове гьагуй тешкиляуйнбышис миннатдарийвалла агъмишавъу .
