Январьни 27-чил Россиейл’ Ленинград быкырба фашистни блокадайке къаттивхьанавъийн 80 сен алгъагьас.
1941 сен Ленинград чIиейква барабаравъуйниме Гитлере шагьарылхъа гуджнаквана гьуIджум гьавъу. 1941 сенни сентябрьни 8-чил гьар сурале вааджибна, 2,5 милйон инсан ешемишехьена шагьар гьалкьеехъа алябтIы. Манбышике 400 аазыр инсан ушахар вухьа.
Одхьунийкений янаджагъыкен геед кIылин аIгьтиятбы ыхьа. Манчини аллаб мысвалла, мыкIаалла айибхьу. Манчиле гъайре шагьарни джамаъаIтылхъа гёгъуй хьинне, бомбабы къаагьа ыхьа. Мани фаляатыке милйоныле агъаллан инсанар гьабтIу. Амма ленинградлыбыше иш явашавъу деш, гыргынбыше джони ишни джигал’ заIгьматааъа вухьа.
Ленинградна блокада 872 йигъна цIыцIавхьа. Шагьар манчике къаттибхьынийни сабабыс байрамын салют гьуво. Ленинградни фронтыл’ вурушмишивхьайн 350 аазырыле агъаллан офицерар ва салдатар джурбаджурни орденбышисий медалбышис лайикьба къавджу. Шагьар къорамишааъани 226 игитис Советский Союзна КьаIгьраман до гьуво.
Ленинградни аллани вурушбышее цIаIхбышиныд хаIдын иштырак ыхьа. Манбышди сабаранбыше мааъад Ватанниме джан гиххьы. Ленинградни блокадайке къаттибхьыйнбышди аIрее йишди миллетна игитна дих гыл’мецIни хивеенчена Мирзоев Мирза МаIгьаммадна дих ыхьа.
М. Мирзоев 1919 сен Гыл’мецIни хивее едике ыхьа. Манкъуна ушахийвалла мааъаб илгъевчIу, едике ыхьайни хивее 8 сыныфнан мактаб быкырау. Мактабыле хъийгъа, манкъве Азербайджанни Закаталайни шагьареени педучилищейхъа иккечIу ва 1939 сен ман маIъаллимаршин мактаб угъадука таамау. Мирза Мирзоеве са сенна маIъалимийвалла гьавъу. 1940 сенни июнни 22-чил джегьилилхъа эскерехъан повестка хъады. Мана Батайскни шагьаре еррашмишхьайни эскерын къулай хаIдхъаъани частеехъа гирхьу. Эскерее къуллух гьааъан са сен быкырхьаме, ХаIбна Ватанна даIвъий гибгъыл. Мирзоев Мирза МаIгьаммадна дих хаIббанан джун тай-тушерхьинне Ватан фашистни душманыке азад гьааъас къалхмишхьа. Манкъуна даIвъийна йаIхъ Ленинградни 160-ди артиллериейнийий пулемётни батальоненче гибгъыл. Батальоне манкъве Ленинград къорамишааъани частьбышди арайлин связын джуваб хъели ыхьа. Блокадайни быкырни вахтыл’ батальон шагьарейнче игъидкыр деш ва советни менни къошунбышиква Ленинград фашистаршике къорамишаъу.
Ветеране йикIел’хъаляъанний, душманни гьуIджумыле шагьар къорамишааъани эскераршис, ерры джаIмаъатыс хаIдын зиян мысваллайий мыкIаалин гьуво. Манке утIумын мыкIаал’быний. Инсанар мыссынчике гьаIлбадалавъу гьыIгъаакар вухьа. Манчихъа ил’дяакы, Ленинградна шагьар блокадайке къаттивхьанавъуна.
Вурушбышди санчее М. Мирзоев йыIкьра яраламишхьана. МанкъукIле Ленинград душманни хыленче блокадайке къаттибхьынна хабар госпиталэ радиойнче къавуххьу. Мани шадни хабарыхъаб кьараал’ вухьа деш.
Мирза Мирзоев ХаIбни Ватанни даIвъийе гаагуйни игиийвалис ва джомардийвалис хаIдданани орденбышисий медалбышис лайикьра къаджы. Манчини аIрее – ХаIбни Ватанни даIвъийн кьоIдъэсди дараджайнан орден, медал « Ленинград къорамишаийс», медал «Фашистни Германиейле гъамувхьайс» ва медынбы.
ДаIвъийле хъарыйнчиле хъийгъа, Мирзоев Мирза МаIгьаммадни духее хизан къурмишавъу, ыIмырни ёлдашиква ушахар чIакIы хъавъу, манбы эвли-атта гьавъу. Манкъве хылийна ыIмыр гьавъу. М. Мирзоев 2012 сен 93 сенее раIгьматыххъа аркIын.
Ленинград блокадайке къаттивхьанавъуйн 80 сен быкырехье. Амма манчин уцIурбы ненкеджад кIелиханас деш. Къийнийни йигъыл’ мед нацистарше вукIул’ къалхмишааъа гибгъыл. Манчин джаIъаматбышилхъа йигъ алляъа. Манчина кок кIораалейхъа идевчIуниме, гедждяу манчин оIги ыIхас ыккан.
