Сура асырна гьихъа дюнйейн къурлыш планетайни гыргыни оIлкабышис баштаданий. Мани вахтал’ ООН-ни ташкилатыхъаб хаIбна кьувват вухьа ва манчин гьоIкуматбышди арайл’на барабарыйвалла гозетяаъананий. Гьел’бедти таарыхни гьаарни замаанайл’ ёкьуд-хьод экономикайс, имканбышис гуджнакан оIлкабы ыхьайнбы, амма манбышди фыкрее медын хурун, заIъыфын, касибын гьоIкуматбы гёкьаIс ненкеджад ыхьа деш.

Совет гьоIкумат дагъылмышхьайле хъийгъа, дюнйе сайидкьылыйн. Саакитийвалла авху деш. ГыргынаIнкъаI даIвъийбышин сес’бы къийхьи гидгъыл. Дюнйейни акьвалхъа манчис джос шавааджад ихтиярбы гьидёвойн ийессибы хъигъебчIу. Манбышда фыкыр-зикыр ахуйн оIлкабы джос таIъбы гьаъуй, джони макьамыка мыкIаар гьаий вобна. Ачухда увгьее, АмеркIайн авропайни магърыбни оIлкабышиква дюнйейл’ ледж адчы. Мани цIайина ялав Россиейлхъаб гьибхьыр.
Россиейс энки дёлесин оIлка Украинаний. Мани кьоIни чубахьиннени миллетбышихъаб са кок вухьа, акаран мизяр, маданият, аIдатбы ыхьа. АмеркIайн ман халкь мани кIацIалхъа хъалиъыки, украиналыбыше урусаршике душманар гьавъу. Украине агьалийн хьебцIал’ фааиз, сассанбышди увгьойка, ёкьцIал’ фааиз,урусар вухьа. Анджах бандераршини режимни башчийерше, къырагъыле тIубааъани амырбышиква урысын миллет сыхмышаъа гидгъыл.
Россейни Федерациейни чIакIынбышис, оIлкайни халкьыс мугьуIббатыква гуд’мишоохьени халкьбышин алаакьабы харабаъас ыккан дешдий. Манчини аллад йишди гьоIкуматни вукIлелинбыше хаIдын дёзюм гьау, хаIдданани карбышилхъа улеббы садчу. Амма гьини нягьаIкьни ишбышин аIхыр къеджи ыхьа деш. Мани сабабыхъа гора, Россиейн 2022 сенни февральни вуза Украинайл’ СВО гидгъыл.
Мани вахтале гьаIшдийлхъаме хаIдда бадалхьайбы ыхьа: Донецкын ва Луганскын Халкьын Республикабы, Запорожьейн, Херсонын вилаятбы Россиейни Федерациейни таркибейхъа иккечIу. Йишди оIлкайни ярахни кьувватбыше йигъыс Донбассын ва медын торпахбы украмиллетчершике темизяъа водунбы. СВО хаIдни оIлкайни гыргыни миллетбышди эл’чершиква янашеба цIаIхни халкьын игит’ джегьилераб вурушмишоохьи вобунбы.
«НУР» кIазетин редакцие СВО иштыракчершини гьарынкъукан алаакьабы аххъас чалышмишехьен. Мани сардан хаIбна дирибашийвалла кIазетни мухбирарше Юсуф Бабаеве ва Рамил’ АIбдуллаеве гьаагва вобна. Юсуф чалышмышехьена СВО иштыракчершина ненаджар къырагъыл’ гьидядсырый. Мана хаIм-йигъна йишди игитершини джомардыйваллайни, кьаIгьраманыйваллайни гьаIкIее окIанас гьаIзирра ворна. Рамиле хаIдын гьаракатбы йишди эскераршис посылкIабы къихеленкъаI гьаъа. Манчиле гъайре манкъве редакциее манбышикван горушбы алгъайгьи. Гьел’бетти редакциейни авхуйни ишчершеб манчиква алаакьана иш къооджи вобна.
Гьини элеесыр Р. АIбдуллаеве мигьманна редакциейхъа СВО иштыракчий, Мишлешни хивейнчена ГьаIсанов Рустам Исрафилна дих хъортIул. Дора шу, гьуIрматыкван кIазет хъаIдаххъанбы, манкъука танышааъас.
Р. ГьаIсанов 1990 сен Мишлешни хивее едике ыхьа. Вахт хъабыме, джуни тай-тушершиква мактабейхъа аркIын. АIзизни хивеедын мактаб таам гьаийле хъийгъа, джегьил’ Ватанни гьийдын бордж хъелесаттамышхьа.. 2009-2010 сенбышее АIкьанани Машрыкьыл’,(Дальний Восток) Белогорскни шагьаре манкъве эскерийвалла гьавъу. Рустам геер дирибаш эскер ыхьа. Манкъуни гьаракатбышис джуни камандирарше ахтына кьиймат гьуво. МаIгьарна камалукана дих хаIрхъаийхъа гора, джегьиле къуллухааъани частни чIакIынбыше миннатдарийвалла агъмышааъан кагъыз деккилхъа,ГьаIсанов Исрафил АIлийни духайлхъа ва ед’, ГьаIсанова Хадиджат МаIгьаммадни йищелхъа къахову.
ЙаIгь-ламусыка Ватаныс борд хъуво, Рустам хивеехъа саркIыл. Сабара гагьна истираIгьат аляатIу, мана хивее еррашмишхьайни сергьатчершини заставе ишлемишехьи гиргъыл. Манкъве мааъаб къуллух гьааъанбышис балканаршиква нягьаIбе аваханас вуккан хаIдхъаъа ыхьа. Гойне Рустаме Дербенте сварщикни саIнаъатын курсбы таамау. Хилидже вахтна Сувал’ни маIгалыл’ мана пеше гьавъу. Манкъуни устадыйвал’ни гьаIкIеена хабар сувахъанбыше гьаIшдеб гьааъа воб.
Рустамыхъад иш-пешеехъан Аллагьыкен талант водун. Мана чалышмышехьена хылехъа алябтIуна иш мыIгькамба гьааъас. ХаIббанани сувал’ ешемишоохьени инсанаршихъабхьинне Рустамни хаадыд ярах ыхьа. Джегьил’на дек’ АIлийна дих Исрафил, доюкана авчийний. Ман машкьулият Рустамылхъад илгъечIуйн. Вахт гибхьыме, джегьил’ деккика кIонахъаний гьайкIанна. ОIгийл’ йишди сувабышеехъа аIкьананчен авчий мигьманараб абайленбыний. Савахтал’ маIгьад кино цIыцIаийниме МоскIавгъанчен, Белгородгъанчен авчийер абы. Рустамыр эле мани кинойна иштыракчий ыхьа.
2022 сенни февральни вуза СВО гидгъыл. Сентябрыл’ гьоIкуматын мобилизацие алгъавгьу. Мобилизациейс цIебба гябкIыйни игитершини аIрее йишди макьаалайна кьаIгьраман Рустам ГьаIсановыр ыхьа. Повестка хъадыме, мана гьихъа-йыIкалхъа ил’дяккы. увгьойни джигеехъа гьирхьыл’на. Рустам ва джукан гьамбазар Каспийскни флотилийе савъу. Манче манбы Запорожьейни вилаятеехъа къахову.
Са сенна Р. ГьаIсанов украинайни боевикIаршиква штурмовик-пулемётчийни къуллухыл’ вурушмышхьа. Гьаммаше даIвъийн инсанаршини ыIмрее чина кIаарна иш къооджена. Мааъаб, гьаIйифки, гьабатIанбыб, яраламишоохьенбыб хаIбба воохьи. Йишда кьаIгьраманыр вурушбышди санчее йыIкьра яраламишхьана. Манчихъа ил’дяккы, Рустаме ярах къаледчу деш ва камандирарше джуни оIгийл’ гиххьын мисалабы гьаллаъа ыхьа.
2022 сенни аIхрее Запорожьейни вилаятни Гуляй-поле донани джигее йыIкьын вурушбы ыхьа. Рустамни увгьойка, манче сагъра хъигъечIуй Аллагьыкена хошбахтыйвалла вобна. Манчиле гъайре йишди кьаIгьрамане хаIбна джомардыйвалла Работино гасаба мудафие гьааъанкаI гьаагу. Манкъуни гьаракатбышис, эскерни гьунарбышис камандирарше ва гьоIкуматын ахтына кьиймат гьуво. РФ-ни Президентни кьарарыка кIынна сержант ГьаIсанов Рустам Исрафилна дих «За отвагу» медалыс лайикьра къаджы.
СВО вурушмишехьен сен быкырхьайнкъаI, Рустам хаахъа къайиккы. Сабара йигъбына дёлесинбышди кIане истираIгьат гьауйнчиле хъийгъа, мана кьарацайкени операциейс къалирхьу. Гойне кьоIбле вазна джан тавулхъа хъаъа ыхьа. Бабатхьаме, Р. ГьаIсанов меер Ватаныс къуллухааъас гьазирраний. Амма Каспийскни флотилиейни чIакIынбыше манкъус медын теклиф гиххьы ва командировкейхъа Саратовни вилаятеехъа къахову. ГьаIшде Рустаме Россиейни ВМФ контракт одкIунийниме ерры джаIмаъатыка таблигъат иш вуккека.
Р. ГьаIсанов югнар хизанчий ворна. Манкъве джуни ыIмырни ёлдашиква, ГьаIсанова Муслимат Мусайни йищеква, хьебыйре ушахар йишди миллетни аIдатбышиква, адаббышиква хаIбхъааъа.
Ши Оорункъуке даIвъий экIба таамувхьа, гыргын эскерар сагъба-саламатба сабкIылый дилягбы гьеххъа.