Февральни 13-чил Дагъыстанни хаIрынкъве Сергей Меликове вааджибни суалбышди аллан иджлас ыккы.
Мааъаб республикайни муниципалитетбышее йизбыше гьувойни зиянбышин оIги ыIхыйнчини гьаIкIее; халкьыни мураджиятбышилхъа иляакыйнчини гьаIкIее; коммунал инфракъурлушин объектбы тезелемишаийнчини гьаIкIее; джолебалхъа газ цIыцIавъуйнбы ашкаравъуйниме рейдбышди гьаIкIее; Дагъыстанэ здравоохранениейн объектбы ишилхъа адчыйни гьаIкIее ва менни суалбышди аллана хабаравъу.
Иджласни суалбышихъа иляакассе гьихъа, регионни хаIрынкъве джуни дагъамни йигъбышее йикI’бы гьувойхъа гора гыргынкъукIле сагъулва увгьо.
«Йизди хизанее вухьана къарахабар шу вушдахьинне кьабылявъу. Манчин мед дагъыстанныбышихъаб инсанийвалла , раIгьимийвалла вухьай тасдикьаийн. Зы шос джанана сагъвалла ва угъурбы аIрзуламишаъа. Чалышмишувхье аIзизни инсанаршикван ихтелет камдяъас. Манбышди къайгъвее гьаммаше аахвас лазымба»,- Сергей Меликове увгьо.
Йизбыше гьувойни зиянбышди гьаIкIее ва манчин оIги ыIхыйнчини гьаIкIеена хабар республикайни МЧС-ни хаIрынкъуни кумагчее Сулейман Рамазанове гьавъу.
«Мани вахтал’ гыргыни къуллухбыше къулайкана саджигеена иш вукку. МаIълумат гедждяу хъадайли ыхьа, вазиятыс назарат гьаъа ыхьа»,- манкъве агъмышау.
Республикайни регьберни джуваббышихъа гора, МЧС-ын Минэнергойка ва Минтрансыка гьаракатукана иш къавджу.
«Сений сурале гьихъа ши диспетчераршини къуллухбышди аллан иджлас ыккы. ГьаIшде манчин бар гьувой шакIле къеджен. Манбыше агьалийс къорхубышди гьаIкIее вахтал’ хабар гьооли вухьа. Манчин халкьыс лазымын тадбырбы къаджес имкан гьуво»,- Сергей Меликове медиа ташкилатбышда халкьыс вахтал’ маIълумат гьувойна иш агъмышавъу.
Манкъве хошни джуваббышис уходнойни йигъбышихъа ил’дяакы йаIхъбы темизяъанбы лайикьавъу. Манчиле гъайре, Сергей Меликове сувал’ни районбышеени электромонтёраршина иш миннатдарийвалла агъмышааъани кагъызбышиква бил’диравъуй теклифау.
Хъийгъа иджласе халкьыни мураджиятбышилхъа фагьым гьувойнчини суални гьаIкIее гаф вукку. ИлгъечIуйни уIлджуме халкьыкен 4 аазырыле агъаллан мураджиятбы хъады. Регионни маIълуматыхъа гора, манбышин хаIддананбы ЖКХ-ка, медташкилатбышди вазиятыква ва менни ишбышиква багълыдананбы ыхьа.
ДР-ни ХаIрынкъуни ва Правительствайни Администрациейни регьберни Алексей ГьаIсановни увгьойка, Ленинкенте халкь 8№ поликлиника джосахъа алгъааъава къалхмишхьа. Минздравын мани сардан хабар гьавъунаки, кьоIйидсана поликлиникабы ишлемишхьесынбы.
Гойне Казбековни районе ушахар заIгьаррамишивхьайнчина гаф вухьа. Роспотребнадзорни маIълуматыка, 36 инсан заIгьаррамишхьа. Машбышике 25 ушахар вобунбы. ГьаIшде 17 инсан больницее ворна.
Участковый терапевт дохтурарше акка-аккал’ ивийкыр мани азарыкван чIырынбы ашкаараъа. Манчиле гъайре, гыргыни кафебышейид ёхламабы ыккекка водунбы. Россиейни Силистни комитетни садрее Александр Бастрыкине мани фактыхъа гора джаза гьувой тапширмыш гьау.
Республикайна хааIрна иджласе йаIхъбышил’ эйхьени авариебышди гьаIкIеейир юшенхьа. Сергей Меликове дагъамни джигабышее бендбы гиххьый тапширмышау. Манкъве Октябрьни инкьилабни доюл’ни кIаналехъа машин къаъайдхьу ушах хъикIуй йикIел’хъаляу. Манкъуни увгьойка, агар йаIххъыл’ни гьаракатын къайдабы гозет’дяъэй, нениджад бенд’быше кумагаъас деш.
Манчиле савагьийда иджласе джурбаджурни суалбышиква министрарше, ташкилатбышди чIакIынбыше чыхышбы гьау.
