СВО гидгъылыйн хьебыдъэсын сен ал`гьааI. Къийна йишди эскерарше Украинайни миллетчерше аххъыйн чIакIын шагьарбыйий районбы кIылда-кIылда йыIкьаIлхъа алятIанбы. Мааъад ал`гьааIни вурушбышее Россиейни ярахни къошунбыше джон такьат, гудж гьаагвана. Эскерарше джони джомардийваликва азгъунувхьайни миллетчершис диндж гьели деш. Къийнийна йишда гаф СВО иштыракчий, Дагъыстанни кьаIгьраманни доюс лайикьра къаджына хааIрна прапорщик Асланов МагьаIммад Салимни духайни гьаIкIеена вухьес.
Къийнийна йишда гаф СВО иштыракчий, Дагътанни кьаIгьраманни доюс лайикьра къаджына хааIрна прапорщик Асланов МагьаIммад Салимни духайни гьаIкIеена вухьес. Салимна кок Муслагъни хивейнчена вобна. Мана I995-ъэсди сен едике ыхьа. Манкъве йицIыдъэсди сыныфейхъамее Тюбейни йыIкьнекни мактабе хъаIдхъы. Мактабын аIхырейдын сыныф МагьаIммаде Муслагъни хивее быкрау.
Мактаб таамауйле хъийгъа, МагьаIммадее дохтурун санаъаIт алятIасди кьарарейхъа хъары. Манкъве санаъаIтбы Ростовни медколледжейхъа хъуво. Гьаманиджар сен мана колледжейхъа иккечIуна. Манкъус фельдшерын санаъаIт алятIас кьисматхьайн.
Йишди кьаIгьраманна хъийгъыйна ыIмыр эскерийвалика багълыба. Мана эскерийвалла гьааъасдимее Южный Сахалинхъа аркIын Мааъад манкъве контракт одкIун. Хидмат гьааъани частыл` фельдшерни кьуллухыл` ишлемишехьи гиргъыл`.
2022-ъэсди сен мана джуни гьамбазаршиква саджигее СВО-хъа хъары. Ватан миллетчершике темизяаъасдимее цIерра хъарыйнбышда сайир МаIгьаммад ыхьа. Манкъве джуни баджарухуква, ацIааликва хаIбба яраламишувхьайни эскераршис цIеддыйн кумаг гьуво. Манбы вурушбы ал`гьааIни майдамбышейнче хъыгъавшесдимее хъыIдаIркьын махъа гьаркIын. Вурушбышди санчее МагьаIммад вудж яраламишхьа.
Манчиле хъийгъа мана хил’дже гагьна джан тавулхъа хъаляъасдимее госпиталей къалирхьу. Маалидже алятIуйле хъийгъа, мана мер джуни гьамбазаршисахъа саркIыл. МагьаIммад гьаIкIерар джуни саIнаъатыс аIшкь гьагвана эскер ыхьай джуни гьаIракатыка гьагу. Манкъве увгьойн: «Захъад йизын гьамбазар текба гьавасасрасын иджаза дешин. Зы манбышди кIане ихьес ыккан». Къийна мана гьамбазаршиква саджигее СВО ворна.
МагьаIммадни дирибашийвалис вудже эскерийвалла гьааъани частыльни командираршед ахтына кьиймат гьооли. Мана джурбаджура наградабышис лайикьра къаджына эскер ворна. Манкъуни коксей «За отвагу», «За спасение погибающего», «Участник СВО» медалбы гивадхын. МагьаIммадни игитийваллайни гьаIкIейиб втанылиб хабаробна. Гьайни йигъбышее мана ДагъыстанникьаIгьраманни доюс лайикьра къаджы.
МагьаIммадыс гьувойни хаIнни наградайква табрикааъасдиме зы манкъуни деккика Салим чоджийка ва едика Дил’бер баджийка алаакьа аххъы. Манбышике йишди кьаIгьраманни аллан хъидгIынбы гьау. Манбы гееб шадувхьа. Джуна дих аIрсее гьауйхъа гора, минатдарийвалла агъмишавъу. Гойне хьинне увгьойн: «МагьаIммаде къийна Ватанни гьийдын бордж хъели СВО ворна. Манкъус республикайн гьувойни наградайке хабар вобна. Амма джукIле гьалекийс ман дёлесвалейнче къаджы деш. Сагъвалла вухьена. Гыргынчиле гьихъа ши СВО таамхьай гозетяъа. Йишдимее манчиле югун награда дешин. Шавухъабый йишди МагьаIммад хьиннен СВО духйебы, манбышди йикI’бышис сабырбы гьеленбы. СВО экIда таамхьа, йишин духйе хизанбышисахъа, джони ушахаршисахъа, деккисахъайий едисахъа савайленбы».
МагьаIммад, гьелбетте, гыргынкъуле хаIбба джуни хизанын гозетяъа. Манкъуни хизанее кьоIйре ушахар чIакIы хъоохьи. Манбы Южно- Сахалинске ешемишувхьейиб, Дагъыстаныкан, делесинбышикван, гогьар-гьамбазаршикван алаакьабы камехьи дешинбы. Манбыше экIда-экIда деккиква, адейршикайий дидейршика телефоныква йишонеебахьенбы. Манбышда вазият вацIоохьена.
«Нур» кIазетни редакциейн МагьаIммад, манкъуна хизан, гогьарбы алятIуйни ахтыйни наградайква табрикааъа. Шавухъабый СВО духйе, манбышда сагъвалла вухьена эйгьи. Манбы оорункъве гьуваадженбы. СВО таамхьа, йишин эскерар гъамувхьа хайбышейхъа савкIаланбы!
