ЦаIхни мизелин диктант МоскIавни шагьаре
Урсият ваIщеле агъаллан халкьбы ешемишехьен гьоIкумат водун. Гьаарна миз' аIзизба вобна. Манчини аллад, манбы гьуваджийниме, артмишаийниме оIлкае джураба-джурайн тадбырбы илгъечIи. Мани сардан ваджибна джига едини мизяаршил'ни диктантбыше авхъаахъа.
Гьар сен октябрьни 21-чил йишди республике дагъыстанни маданиятни ва мизяаршин Йигъ алгъайгьи. Мани йигъыл' менни тадбырбышиква янашеда дагъыстанныбыше едини мизяаршил диктант обкIун. Гьел'бетди, манбышди джаргэй йишди миллетын эл'черыб вухьа. Манчини гьаIкIее кIазете одкIунний.
Дагъыстан Республикайни хаIрынкъве Фёдор Щукине дагъыстанни мизяаршилин диктант оIлкайни пайтахте одкIуний теклифау. МаIгьад МоскIавни шагьаре ноябрьни вуза едини мизяаршил'ни диктантни одкIунийн марафон гидгъыл.
Ноябрьни 12-чил Дагъыстан Республикайни Россиейни Президентысанани Эл'чихане цIаIхни мизелин диктант ыхьа. Мани ташкилатни хаIрынкъве Руслан Нагиеве тадбырын иштыракчер республикайни башчийни доюле табрикавъу ва угъурбы аIрзуламишау.
Едини мизелин диктант окIанас ва халкьни маданиятылхъа джон аIшкь, муIгьуб гьагвас джураба-джурайни саIнаъатбышин ийессибы абы. Манбышди аIрее маIъаллимар, дохтурар, телябабы вухьа. Маджлис урусни ва адабиятни мизени маIъаллимае Сехергул' Ибрагьимовае вукку. МаIнкъее цIаIхбышди машгьур язычийни Кьурбан Омахановни «КьоIдле язы» китабейнче «Бахт» донан са тика хъаIдхъы.
Маджлис Селимна дих Эюбе едини мизел' гьавъуйни маIънийн шешитявъу. Мани маIънийсын джуваббы йишди халкьыни доюкани духее раIгьматтыгъ Нусрет ЫIсмаилове одкIун.