Гьайни сенни февральни 1-чил йишди миллетни доюкани маIъаллимын, шааирын, ХаIбни Ватанни иштыракчийн Дабузов Шавкат Джаббарни духайн 100 сенний быкырхьес.
Ш. Дабузов 1924 сенни февральни санчил МиххьегIни хивее шааир Джаббарни хизанее едике ыхьа. Мактаб таамаийле хъийгъа, Шавкат МиххьегIни дагъайдни сыныфбышди мактабна хааIрна гиххьы. Сабара гагьна мааъар ишлемишхьаме, даIвъий гибгъыл. 1943 сенни августни вуза мана хивни менни джегьилершиква джони хайишиква Ватан немец-фашистаршике азадааъас йаIххъылхъа ичIу.
Фронтейхъа къахилессе гьихъа, Джаббарна дих Шавкат Бакуйни шагьаре еррашмишхьайни Грозныйни военный училищейхъа хъаIдхъас оIтирау. Ман училище быкрауйле хъийгъа, кIынна лейтенант Шавкат Дабузов украинайни цIеддыйни фронтни таркибейхъа йаIххъыляу. Манкъве стрелковый взводни камандирни къуллухыл’ къуллух гьавъу. Дих фронтейхъа аркIынинкъаI, деккее шечI обкIун, мааъад «дих, душманыс лайикьын хъелева» джуваббы ыхьа.
Мани вахтал’ Магърибни Украинайл’ йыIкьын вурушбыний аIлгьаа. Мааъад Совет гьуIкуматни эксина бендеровцаршин ва власовцаршин къошинбы вурушмишехьи ыхьа. Манчихъа ил’дяакы, советни къошинбыше ман джигабы азадау, йаIхъ Польшайни сураххъа авхъу. Польшайни джаIмаъатын советын эскерар тIетI’бышиква къаршиламишааъа вухьа.
Дабузов Шавкат Джаббарна дих ХаIбни Ватанни даIвъийе вудж гьаIкIена игитхьинне гьагу. Манкъулхъа чIакIни камандирарше йыIкьын мисалабы гийхьи ыхьа. Манар манчини ыIгьтеенче хъайленаний. Манкъве Гренау ва Жарнау шагьарбы фашистаршике азадааъанкъаI хаIбна кьаIгьраманийвалла гьаагу.
Ш. Дабузов ХаIбни Ватанни даIвъийе Гъамувхьайн йигъ алгъагьас госпиталэ кьисматхьа. Майни вузани молюдъэсын йигъ ыхьа. МичIейд радиойнче Левитане чыхышау, манкъве даIвъий къаттибхьынна хабаравъу. Мани йигъни гьаIкIее гаф гибхьыйнкъаI, ветеране хабарааъаний: «Ши палатабышени яраламишивхьайни эскерарше улеббышее нагъбышиква гъамувхьайни йигъына шадвалла гьавъу. Йишди шадвалихъаб кьарал’ вухьа деш.
ДаIвъэйнче мана 1945 сенни ноябрьни 23-чил хъары. Шавкат Дабузове ХаIбни Ватанни даIвъийе гьаагуйни игитийвалис кьоIни «ЧIаIрани хаIнейни», «Ватанни даIвъийни 1-ни ва 2-ди дараджанани» орденбышис, «Жуковни медалыс», «ХаIбни Ватанни даIвъийе 1941-1945 сс. Германиейле гъамувхьайс» медалыс лайикьра къаджы.
ДаIвъийле хъарыйле хъийгъа, мана джурбаджурни къуллухбышил’ ишлемишхьа. Ш. Дабузове хаIдын из шааирхьинне гьадсыр. Манкъус маIгьдын гьунар дек’ Джаббарыке илгъечIу. Манкъве джус адабиятын лакьаб Дабыз Шавкат алятIу. Манкъун хаIдданан шечIбы ыIмырыка багълыдананбы ыхьа. Манкъуни шечIбышин кьаIгьраманар джурбаджурайни саIнаъатбышин ийессибы вухьа. ШечIбышиле гъайре, Дабыз Шавкате прозайн асарбыд одкIун. Манбы меххваршди къайдал’ аIкIелисын асарбы ыхьа. Манкъуни кьаламни авгъанче хаIдда шечIбы, поэмабы, хабарбы хъигъечIу. Манбы чапыке къайиккыйни китабейнче хъаIдхъас аIха.
Дабузов Шавкат Джаббарни духее хылийна ыIмыр гьавъу. ЦIеддыйни группайна инвалид 2015 сен 92 ешее раIгьматыххъа аркIын. Манкъве джуни игитийваликва, джаIмаъатыс гьаийни хайирни ишбышиква йишди халкьыни таарыхе гов гьабсыр. МаIгьабни инсанаршин едигар гьуваджий йишин бордж водун.
