Доюквана ааIлим, техники ыIлимбышда доктор, профессор АIлиев Шамил' Гимбатна дих дюйейл' ни ыIлимчершини арайл' югра ацIа ворна. Манкъухъад ыIлимыква багълыда одкIунийн хаIдда китаббы водунбы. Манчини аIрайл' геллесынбы ракетбышди ярахыс къадсырыйнбы водунбы.

Гьайни йигъбышее Ш. АIлиеве РИА «Дагъыстанни» майдама журналистаршикван марахукван горуш алгъавъу. ИлгъечIуйни горушее ааIлиме журналистаршис джуни ыIмырике ва къийнийни йигъыл' вуккеккани ишике маIълумат гьуво. Манкъуни увгьойка, джухъаб гееб дагъамна йаIхъ вухьа. ДжукIле хаIдда четинийваллабы къаджы. Амма манчихъа ил'дяакы, джуни макьсадылхъа гьирхьыл'на. Фыкрее ахъыйн гыргын ишбы быкыраъас аIхыйнбы.
Ш. АIлиеве джуни ыIмырен хьоцIал' сен ыIлимыс багъышау. Мани сенбышее мана джурабаджурайни къуллухбышил' чалышмишхьа. Манбы Каспийскын Дагдизель завод, Дагъыстанни Правительствайни хаIрынкъуна кумагчий, Дагъыстанни экономикайни министерстве прикладной технологиейна хааIрна ва сабара медынбы ыхьа
Журналистарше ааIлимыке гьаIшде дюнйейл' гуджнаква еймишехьени къурмишаийни интелектыква багълыда марахламишувхьайнбы. Манбышди суалыс джаваб хъеленкъаI манкъве увгьойн: «Заманайс сакIы ман геед гуджнакан технология водун. Амма манчин ненкеджаб инсанна джига бадалааъас деш. Зы манчика маIшкьулехьен хаIдда сенбы водунбы. Къийна инсанар манчиква багълыда тезеба растына хъабыйни сабара карбышиква зы геер югра танышра ворна. Гыргыда мани технологиейква багълыда тезе аахъыйнбы аIрейнче вахт абкIынийле хъийгъа ацIахьес.
АаIлиме джуни ихтелете ушахаршилхъа водни хаIдни мугьуIбыке ва аIшкьыкеб махъа сабыйнбышис кIыл'на гаф гьавъу. Манкъуни джуваббышихъа гора, вудж экIра-экIра ушахаршиква горушмишехьена. Мактаббышейхъа, лицейбышейхъа, гимназиебышейхъа горушбышейхъа гьайкIан. Манбышис тезе технологиебышике лекциебы хъаIдаххъа.
Ш. АIлиев хаIдда мукафатбышысий наградабышис лайикьра къаджы. Къийна манкъуни доюл' на хаIйбышее хаIне вобна.
Горушни аIхырее Ш.АIлиеве журналистаршис джуква горуш тешкиляуйхъа гора, сагъулва увгьо.