Сабара сенбы водунбы Рутул районни малдарарше дамазлыгъбы кочес ейлагъбышейхъа сувалхъа хъадайлен. Гьихъа селлимда ахуйн сувабы, къийна малкъарайка гяцlы водунбы. Гьайни сен хаlббанани фермерарше давараршика саджигее чаврабыд кочес хъадыйнбы.
Кlуссурбышда Зиявуддин Гудаев доюкана пешекар ворна. Манкъве гьар сен джун малкъара гыранийвалихъа ил’дяакы, ейлагъыс хъадайли. Гьайни сеныд манкъве тамбалийвалла гьидявъу, сувалхъа цlерра кочес хъары. Къийна манкъуна ферма уфтанни сувабышди оlришбышее ухьан водунбы. Манкъуни увгьойка, районни геллесди дамазлыгъ гьувадженбышис сувалхъа хъавалес вуджей теклиф гиххьы. Ненаджар фермер кочес хъарыйке нарязийра дешда.
Зиявуддин кlуссур ешемишхьейир, манкъуна кьаlсда адий цlаlхбышда йихьа. Гудаеваршини тохумее гьаммаше малкъарайс гьавас гьагван пешекарар вухьайнбы. Манкъуни увгьойка,вуджыр къийна манбышди йаlххъын ал’гьааl ворна. Дамазлыгъ гьувааджи, манчин сай хаlдхъаъас чалышмышехьи.
Заква гаф гьааъанкъаl, Зиявуддинее хаlдда пешекарни санаъаlтыка багълыданан ихтилетбы гьау. Манкъве увгьойн: «Зы пешекарийвалла гьааъа кlыл’ни вахтале гиргъыл. Гьийдни сенбышее сувабышилхъа малкъара хъадайлен дешдий. Хаlббананбыше дамазлыгъбы къышлагъбышейний гьайсар. Гьаlшде са кьаlрабна сува вакlле къавджес деш. Гьар сурал’ малкъарайн фермабы гиххьы водунбы. Гьайни сен садджу кlуссурбышди фермераршеджаб сувалхъа 600 чаврайий 3500 даварар хъады. Гьамани саягъылид, медни хиваршее воохьени фермерарше дамазлыгъбы сувалхъа хъалы водунбы».
Зиявуддиныс даварар ухьийхьанас кумаг джуни кlыл’ни духее гьаъа. Манкъве мактабей хъаlдаххъа. Къыlлина истирагьатбышил’ манкъве деккика саджигее малкъарайлхъа иляка.
Мана гьамыр ватанпарвар ворна. Манкъве Кlуссурна хив сувал’ аахвасдимее хаlбна иш вуккека вобна.
— Гьайни сен ейлагъбышис Кlуссурхъа йицlыбле аиле хъабы. Мыкlал’бы хъадымее, манбы гыргыба Камбулатхъа мейб савкlалас. Кьыlдмина хивее инсан ахва деш. Манчихъа ил’дяакы, кlуссурбыше джона ватан кlеливханааъа деш. Гьар сен юххьан хъадыйка манбы сувалхъа сивийкlаланбы. Йаlхъбы, ишигъбы ыхьее Кlуссурхъа, Калелхъа ва сабара менни хиваршейхъа инсанар меб савкlаласынбы. Мана йишда ватан, юрд вобнава, манкъве заквани ихтилете увгьо.
Зиявуддине фыкрее геледжагъыл’ гьаъасын хаlдда ишбы аххъы водунбы. Манкъуни ниятее Кlуссурни кабал’ истирагьатыс абыйни мигьманаршис хав аляуйни вод. Манчиле савагьийда, мана дамазлыгъ бадалааъас гьаlзирехьи. Манкъве кlылда-кlылда няк’ гьоолени цlеебы илещи. Манкъуни увгьойка, манбы йишди сувабышис уйгъунда водунбы.
Гойне хьинне, манкъве зы вудже гьуваджени малкъарайка танышау. Даварар, чаврабы тавулий. Пешекарни увгьойка, гьайни сен вакьаlбыше, ургбыше уфтанын чеки сау. Сентябрыл’ ейлягъбышенче къышлагъбышейхъа коч гьаъас. Гьийгъанче-гьихъа манбы кьыlдмина гьуваджесын джига тlалабау водун.
Зиявуддин ихтилетике зас са кар башда ыхьа, къийна малкъара гьуваадженбышис гьокуlматни сураке ненджад кумаг дешод. Манбышди дагъамийвал’бышис шавааджаб фыкыр гьооли дешоб. Амма водни дагъамийвал’бышихъа ил’дяакы, фермераше нишикенаджаб зигаара гьавъу деш.
Са хаlм манкъуни бакlей гьавъу. Хъийгъийни йигъыл’ Зиявуддиникайий, джуни духайка саламаттамышхьа , манбышис джони ишил’ угъурбы аlрзау, йаlххъылхъа хъигъечlу. Йаlххъаl хъооlнкъаl, хаlбба малкъара ухьийхьанаъан фермерар хъызаахы. Манбышиква гьавъуйни гафни гьаlкее кlазетни хъийгъыйни нумрее хабарааъас.
