Цывыл’ сенийна уфтанна вахт вобна. Манке гьихъийаллани дюнйейн чина либас бадалааъа. Сабара йиваршин ярпагъбы къыIбы хъехьи, сабаранчинбы чIаIра хъехьи. Мани вахтал’ йиваршил’ мейваабы гьийхьар.
Сувал’ни дерайл’ ешемишейбхьайни инсанаршикIле къадже ихьес, нимеега уфтаный хъехьи чIалаг. Маадын йивар уфтанын донбы аляуйни истагъаршик акар хъехьи. Цывыл’ни гьаIкее хаIббанани шааирарше шечIбы къадсыр. Цывыл’ къыIл’нийий къыIдимни аIреена йыIгъ вобна. Мана эн болна сувал’ ешемишоохьени инсанаршина вахт вухьа. ОIгийл’ цывылихъа йишин малкъараний айкIан кочес, инсанарыб къазынджис АIранеехъа ва Мутураршиххъа. Манкийн фыкырбы шас гьаIшде едигарыс аху.
Цывылихъа мактаббышее, институтбышее, университетбышее джурабаджур маджлисбы илгъечIи. Манбы поэзиейква, табиятыква багълыдананбы эхьи.
АIдатеехъа гидхьу, гьар сен ноябрьни вуза Калел’ни йыIкьнекни мактабни дагъайдни сыныфбышее «Къизлен цывыл’» ушахаршина маджлис иилгъоочIе. Гьайни сеныд ман аIдат гьуваджы мактабни цIеддыйни ва кьоIдъэсди сыныфни ушахарше джони маъаIллимаршиква — АIлиева Айгул’ ШаIъбанна ийщеквайий Магьмудова Муъминат Шамсуддинни йищеква саджигее мана маджлис алгъавгьу.
Айгул’ маъаIллимайий Муъминат маъаIллима мактабее ишлемишоохьен хаIдда сенбы водунбы. Манбышихъад хьуледлехьее дагъайдни сыныфбышин къайиккый ыхьа. Мактабни директорни ва завучни увгьойква , манбыше хурни ушахаршис югун ацIаал’ ва тербие гьели. Алидни сыныфбышее манбышиква вахарийба ишлемишивхьес воохьи.
«Къизлен цывыл’» алгъайгьени йигъыл’ маъаIллимарше ушахаршиква саджигее мейваабышике ва емишбышике джурабаджур карбы: тIетIбы, кирпийбы ва медын карбы гьаы. Кьабахысыд хатир ахуъы деш. Манчике тандур, лахха, кура, кIумкIум гьавъу. Ичерше джон мактабни донбышиххъа, гуртбышиххъа ва илейлыгъбышиххъа цывылийн тIетIбы, ярпагъбы атIикьанау. Манбыше джони аIрее баIстбы гьаы, ненкъыIний эн уфтанда ийкIын. Жюрийни увгьойква, эн уфтанда ийкIынийн дон Юсубова Хаджейн ыхьа. МаIнкъыс гьамийхьава пай гьувы.
Маджлисее дагъайбни сыныфни ушахарше урусаршини ва дагъыстанни шааирарше цывылийс къадсырыйн шечIбы йикIеке хъаIдхъы. Манбыше сана-санкъулхъа тапмаджебы аледчу. Джурабаджур оIюнбы ушахарше гьагу.
Мани йигъыл’ джагъайдни сыныфын шигыртарыб, джон маъаIллимарыб, тамашейс абыйнбыб «Къизлени цывылиле» разийба авху.
