КьоIдле сен водун дюнйейлхъа коронавирусна чIырвалла салатIувхьайн. Мани йыIкьни хастааликва гыргын оIлкабы гьичIойкар водунбы. Анджах гьалекийс манчин цIа быкырда кIядхъаъаIс аIхы дешодун. Мани чIырвалике милйонбышиква инсанар гьабтIу.
Яраб маIгьабна хизан вухьее , коронавирусын зиян гьидёвуна. Манчикен маалидже гьаыйид , гейб дагъамна иш вобна. Коронавирусыхъадыд джурабы водунбы. Санчин оIги ыIхымее , шенаса аIралхъа хъигъоочIи. МанчикIле медицине штамм эйгьи. Сенни аIхрее тезе штамм аIреехъа хъигъечIу, манчиква инсанар чIырыхъоохьи гибгъыл. Дохтураршди увгьойка, манаб йыIкьна , хъигъоочIена, зараба еймишоохьена чIырвалла вобна.
Ши гьайни макьаалее чалышмишивхьесынбы Омикрон- штаммни гьаIкIеедын маIълумат гьелес. Мани хастаал’ни гьаIкIее цIедда 2021 сенни ноябрьни 9-чил’ ацIахьа. Мана Ботстованеехъа хъабыйни дипломотаршик’ ашкарывхьа. Хъийгъа мани штаммыква чIырын инсанар ЮАР ваацIавхьа. Гойне инсанар Израиле, Англие, Нидерланде, Ганконге, Белгие, Чехие, Германие мани хастаалике чIырыхъувхьа. ГьаIшде мани штаммыква чIырынбы гыргыни континентбышил’, оIлкабышил’ вобунбы. Россиейлиб мани чIырваликва начахавуйн инсанар ашкарувхьайнбы.
21 декабрыл’ Америкее омикрон- штаммыке цIеррыйна инсан хъикIу.
Къийна манчин оIги ыIхасдимее, формокологиейни компаниебыше лабораториебышее омикрон-штаммыс эксинана вакцина гьазирааъа вобна.
Мана чIырывалла зараба еймишдевхьайнимее, дюнйел’ни гьоIкуматбыше дохтураршини мислягьаIтбышиква ва гьоIкуматбышди чIакIынбышди амырыква карантинын ишбы маIгькамаъа водунбы. АIсас гьоIкуматбышди аIреедын ивийкырийбы кIыл’хъаъа. Самолетын рейсбы, поездын, машинбышин, гамыбышин ийкырий кьоIд-хьебыд кьатна кIыл’хъаъа гидгъыл. ГьоIкуматбышди адыд профилактик ишбы, вакцинабы ыIхий гьаIракатеехъа адаччи водунбы.
Мани чIырвалихъа гора Гыргынидюнйейн къыIдимийн Универсиада 2021 далыйлхъа хъау. ПIланыква ман декабрьни вуза Швейцариейний илгъечIес.
Декабрьни 9-12-хъамее Япониейни Осака шагьарее фигурный катаниейн Гран-при финални ихьес. Маныд даянмишауйн, няъас увгьее Япониейни правительствайн хаариджий оIлкабышиле вуIххъани инсанаршис кьадагъа гивхьу.
Дохтураршини, ааIлимаршини увгьойка, мани чIырвалин лышанбы коронавирусынчик акаранбы водунбы, анджах манчин зараба инсанна имунный система «гьавакьарааъа». «омикрон» штамм «дельта» штаммыле сибыкын ыхьейид, анджах аIгьтият гьувааджес вуккан. Манчин инсанни джанее водун медын хастаал’быд хъулёканаъа.
Гьалекийс мани штаммни гьаIкIеедын быкырын маIълумат дешин, манчихъа гора маалидже гьаъасын дарманбы гьазирда дешодунбы. Анджах дохтураршини увгьойка, манчикена аIгьтият садджу вакцина гьавъуйква гьувааджес. Лап инсан чIырыхъыхьейир, мана раIгьатба джанеенче авайкIан.
Н.Ф. Гамалейни дойил’ни РАН НИЦЭМ–ни директорни академик А.Л. Гинцбургни увойква ,омикрон-штаммыкена вакцина джоке 10 йигъни аIрее гьазирааъас вааIхасда, анджах мана уIвхасын иджаза садджу 45 йигъыле хъийгъа гьелес аIхас , няъас увгьее манчин сабара ёхламабы илгъечIес ыккан.
