КьоIдъэсын сен водун кIыреенче сесбы, мизеле джуваббы – «коронавирус», «пандемия», « штамм», «карантин», «локдаун», «дельта», «омикрон» ва медынбы. Ман джуваббыд тезеба дюнйейлхъа абыйни чIырвалин яратмишау. Мани джуваббышиква лугъат хаIдхъыхьа. Анджах мани джуваббышин джанеехъа инсанаршини вас-вас абы.
Эгьес эйхьи , быкырни дюнйейн къурлуш, инсанаршин ешайиш охале къаъадчийн. Мани чIырвалин садджу джанас джад деш зиян гьуво, манчин инсанаршин фыкырбы, нервыбышда система, хасиятбы бадалау. Манчин хаIббанани инсанаршин ыIмырбы ыккы. Фыкреедын мураадбы быкыраъас имканбы гьуво деш. Гьаарна са аIджалыква аркIын. Манбышди аIрее шакIле ваацIан инсанарыб вухьа. Гьел’бедти, сабара джигабышее мани чIырвалис оIги инсанарше джо гьувы.
Январьни вуза коронавирусын ёкьудъэсын хыли хъады. АIреенче тезе вирус «омикрон» хъигъечIу. Дохтураршини увгьойка, мана чIырвалла гыргынчиле зараба еймишоохьи вобна. ЙицIни- йицIуххьани йигъбышди аIрее йишди гьоIкуматни гыргыни субъектбышилхъа еймишивхьана. Эн хаIбба чIырыхъувхьайнбы МаскIавни шагьарее, МаскIавни вилаятыл’, Санкт- Петербургни шагьарее вобунбы. Къийна мани чIырваликва гьичIокаранбышди цIеббыйни джаргее дохтурар, медсемтрабы, санитаркабы вобунбы. Йигъысыд мани азарыке чырыхъувхьайнбышин сай хаIдхъехьи водун.
Дагъыстан сувабынана республика вобна. ХаIббанан инсанар сувал’ни районбышее, хиваршее ешемишоохьи. КьыIдимына сасса хиваршеехъана поштина йаIхъ йизбышике, ыкIейкIбышике утIумоохьена. Бирданхьессе инсан чIырыхъихьее , махъа дохтурын кумаг вахтал’ гьийхьар деш. Садджу коронавирусыкеджар деш, медни хасталикваб инсанар чIырыхъоохьенбы. Манчихъа гора, республике Санавиациейн ташкилат ишлемишехьи водун. Манбышди ыIгьтее медицинайни аппаратбышиква, дохтураршини дестейква гьазирауйн верталётбы водунбы. Агар инсан аIкьанани районбышее, хиваршее йыIкьра чIырыхъыхьее, махъа ман верталет гьайкIан. Манчихъад диндж дешин. Йигъыс са районеехъа илеха.
Шас йикIел’ водун, къыIлина Сувал’ни маIгьалыл’, Гыл’мецни хивее йишди шааирыс ВаIгьид Мирзоевыс инсульт ыхьа. Манке мана МаIгьачкъалеехъа вахтал’ верталётыква хъары ва вахтал’ лазымын маалидже гьаы, ВаIгьыд’ маъаIллим хъуваркауна. Гьайни йигъбышее Рутулни больницеенче верталетыква МаIгьачкъалеехъа йыIкьра чIырына ЦIаIхни хивеенчена са хьунащершина хъары. Къийна дохтурар чалышмишоохьи вобунбы мана хъуваркайы, къелилхъа озахъееъэс.
Гьел’бети, верталет суалхъа ыккий сибыкна ва вахарийна иш дешобна. Анджах, инсанни ыIмреле гранын кар дешин. Лётчикарше, дохтурарше дагъамни рельефыхъа, гьаваахъа ил’дяакы джона иш гьааъа вобна. МанбышикIле сагъул- варул эйгьи.
Меб ши савкIалас коронавирусылхъа. Къийна манчина дагъамийвалла мана вобна, манчин шениса джанеедын чIырвал’бы хъулёканаъа. Къийна республике хаIбба чIырын инсанар вобунбы. Манбышди аIрее вакцинабы гьаыйнбыб, гьидяуйнбыб вобунбы. Дохтураршину увгьойква, вакцина гьавъуйнбыше мана чIырвалла раIгьатба алгъагьа ва инсанар хъоотIаланбы вакцина уIвхас.
Гьел’бедти, инсан Аллагье ирхьын. Мана гыргынчина саIгьыб ворна. Гойне , гьар инсан джуни джанал’ вудж мугъаетхьес ыккан. Хьебыдъэсыд, дохтурарше эйгьен кар гьаъас ыккан. Дохтурыр , инсанын джан хъувадкаъас къахувына Аллагьна эл’чий ворна.
