Украинайл’ силагьыкван спецоперацие аIл’гьаан сура ваз вобна. Манчина сабаб вухьана Донбассыл’ ешемишоохьен инсанар националистаршике, бандеровцаршике къорамишавъуй.

Й

ишди Президентни увгьойка, мана спецоперацие гьаъасда мислягьаIт къавджей раIгьатын кар деш ыхьа, анджах къабни ва Украинени душманарше  мебна имкан гьабсыр деш. Агар ман силагьыкван спецоперацие ши гидийдгъылыйнхьий, ман Украинайни гьуIкумын ва джони гьамбазаршений гигъалас. Къийнийна йишди гьоIкуматна метлеб мана вобна, Донецкни ва Луганскни республикабышис кумаг гьувой ва къирагъыле вуIххъана йишди гьоIкуматылхъана къорху ва гьуIджум даянмишавъуй.

Гьел’бедти, даIвъийн чина кIаарна иш гьаммаше гьааъана. Манчин  хаIдын уцIурбы, ыкIарбы, мысвал’бы, мыкIаал’бы адайле. Къийна йишди Россиейни армиейн джон гьаIракат гьагва водун. Йишди игит’ эскерарше Ватанни гьийд гьувойн джон кIын’ быкыраъа водун.  Ши аIрзуламишаъан, даIвъий экIба таамувхьай, йишин эскерар сагъба – саламатба джони хизанбышеехъа хъабый.

Къийна манбышис джамаъаIтна  джувабыквана хыл’авхъуй лазымба вобна. Къийна, Ватан дареенанкъаI, миллет  Президентыква саджигее, са мислягьаIтее ихьес ыккан.  Манчике хаIдда кар аIслыда водун.

Ши ооъад увгьойн, даIвъийн мысвалла абайле. Къийна эле Донбассыл’ гьамана вазият вобна. Манчихъа гора, Россиейни субъектбышиле махъа чIакIни машинбышиква гуманитарный кумаг ( аляъан палтар, одхьанан кар, темизин хьян, ёргъан – душаг, къалябакIан чадырбы, мобильный госпитальбы, дарманбы ) ыккекка водун. 

Вурушбы ааIни джигеенче ушахар, едар, кьаIсинбы хъыгъавъу саакитни джигабышее еррашмишааъа. Манбышис къалябкIасын джигабы, къуIман  хорагбы, психологар, ушахарше хъаIдхъасын мактаббы гьазираъа. Гыргын республикабы, вилаетбы манчис  гьазирда водунбы.

Гьел’бедти, йишин республикаб мани ишее гьаммаше джомардда эхьи. Къийна Дагъыстане Донбассыле хъабыйн ушахар, джон едяар гьувааджи вобунбы. Манбышис ешайиш гьаъасдимее, гырыгын шарааитбы яратмишау водунбы. Республикайни чIакIынбыше мани каралхъа хаIбна фыкыр гьооли вобна ва инсанаршеб раIгьым гьааъа.

Дагъыстанни шагьарбышеенче, районбышеенче Донбассыл’ни шагьарбышеехъа, хиваршеехъа  чIакIни машинбышиква одхьанан кар ( хоI, макIаронбы, чей, мейвабы, кьыш, зетий, хьинен  тIакьабы ва медын карбы) оIтирау. Къийнийни йигъылхъассе даIвъийке гьейбхыйнбышис ( беженцы) Дагъыстанеенче «Единая Россия» партиейни мислягьаIтыква 50 тонн каран оIтирау. ХаIббанан гьейбхынбы Ростовни вилаетыл’ еррашмишавъу вобунбы.

Шас садджу Аллагьыке дилягбы гьеххъас аху :«ДаIвъий даянмишивхьена», «Эскерар-сагъба саламатба джони хизанбышеехъа савкIаланбы» . Аамин!