Февральни 24 — чил’ Урсатни Президенте Владимир Путине Донбасcыл’ ярахыкван спецоперация гидгъылыйнчини гьаIкIей эълан гьау. Манкъуни увгьойка, манчина макьсад молюдле сенна мааъадын халкь вайшиванийвалла гьааъани киевни режимыке къаттихьанауй вухьа. Февральни 24 — чил’ Урсатни Президенте Владимир Путине Донбасcыл’ ярахыкван спецоперация гидгъылыйнчини гьаIкIей эълан гьау. Манкъуни увгьойка, манчина макьсад молюдле сенна мааъадын халкь вайшиванийвалла гьааъани киевни режимыке къаттихьанауй вухьа.
ЦIаIхбыше гьаммаше инамыкайий гьаIкъийкъатыква Ватаныс къуллух гьааъа. ХаIбни Ватанни даIвъийе йишди миллетни эл’черше хаIдын иштракау. Манбышин хаIббананбы вурушбышди чолбышей авху. ЦIаIхйелий Салагьиддин Казимов Совет гьуIкуматна кьаIгьраман доюс лайкьра къаджы.
Афганни даIвъийейид йишди кIыл’ни миллетын хаIдын иштырак ыхьа. Мишлешелий ГьаIзратаалий ГьаIйдаров джун интернациональный бордж хъеленкъаI, гьалакхьана. Манкъуни игитийвалис гьуIкуматын хъикIуйле хъийгъа орден гьуво.
1999 сен Дагъыстанылхъа къонши республикайле абыйни хариджийни террористарше гьуIджум гьавъу. Ватан душманаршике къаттивхьанааъас республикайни медни миллетбышиква янашеба цIаIхбыб сугъоцийнбы. Карамахи хивни аллани вурушбышди санчее къаIраманхьинне мишлешелий МаIгьаIммад ШаIъбанов хъикIу. Манкъуни игитийваллайс орден Мужества гьуво (хъикIуйле хъийгъа).
Къийнийни ййгъыл’ РФ-ни Президентни Владимир Путинни амрыква Донбассыл’ спецоперация алгьааI. Мааъаб Россиейни ярахыквани кьуввабышди таркибени дагъыстанлыбыше къаIгьраманийвалла гьаагва вобна. ГьаIйифки, сабаранбышис Донбассни торпахыл’ оIлум авайкы. Манбышда сайир гыл’мецIалий Кьурбанов Амрагь ГьаIсанна дих ыхьа. РФ-ни Президентни фирманука манкъус орден Мужества гьуво (хъикIуйле хъийгъа).
А. Кьурбанов 1987 сенни апрельни 16-чил Рутулни районни Гыл’мецIни хивее едике ыхьа. Мааъад манкъве йыIкьнекин мактаб таамау. 2005 сенни цIывлихъа Амрагь Ватаныс бордж хъелес эскерехъа хъортIул. Манкъве 242-ъэсди джурайни разведбатальоне (ОРБ) къуллух гьавъу. Манчиле хъийгъа джегьиле 2015 сен контракт одкIун джуна ыIмыр Россиейни армиейква багъламишавъу. Мани вахтал’ Амрагь Кьурбанове Чечнайл’, Ингушетиейл’, Сириейл’ алгьааIни ярахыквани операциебышее иштыракау. Мана Мужествайни орденыс, «Къузайл’ни Кавказыл’ни къуллухыс» медалыс ва грамотабышис лайикьра къаджу.
Гыл’мецни йыIкьнекни мактабни ОБЖ предметын дарcыбы ыккейкани маъаIллимни Асланбег Давудовни увгьойка, Амрагь гьаммаше мактабе аIзизна мигьман ыхьа. АIхрейни элеес хивеехъа арыйнкъаI, мана хивни шигыртаршиква горушмишхьа. Джуни ихтилете Амрагь Кьурбанове ушахаршис Ватанылхъани муIгьуббатни гьаIкIее ва мана къорамишавъуй гьиджо эйгьен ыхьай йишонау.
Манкъве джус дарс гьувойни маъаIллимаршис миннатдарийвалла агъмишавъу. Шигырташиква саламаттамишехьенкъаI, манкъве меер джока горушмихьесва джуваб гьуво. Амма ман аIхрейдын горуш ыхьа.
Мартыни 7-чил едике ыхьайни Гыл’мецIни хивей, Донбассни торпахыл’ кьаIгьраманхьинне хъикIуна хааIрна сержант Кьурбанов Aмрагь ГьаIсанна дих аIхреени йаIххъылхъа оIтирау. Манкъука саламаттамишивхьес гогьар-гьамбазыле гъайре, Сувал’ни маIгьални хиваршин джамаъаIтбы, погранзаставайн къуллухчейр абы.
Ши Амрагьни аилейс, джуни делесынбышис, Гыл’мецIни джамаъаIтыс башсагълыгъийвалла гьооли ва Аллагье раIгьматаъанава эйгьи. Амрагьни хьунашейс ва джуни хьебни балайс йикIес сабырбы гьеленбы ва джос хылийна ыIмыр арзуламишааъа!
