Калел’ни хивни йыlкьнекни мактабыхъад геед мугьуlбыкван, ишилхъа аlшкьыкван коллектив водун. Мааъаб хаlбба доюкан маъаlллимар ишлемишувхьа. Манбы хаlбни гьуlрматыс, доюс лайикьын санаъаlкарар вухьа. Къийнаб мактаабее мани саягъыл’ ишлемишоохьен джаван маъаlллимар гьеххаалика вобунбы.
Хивни мактабна дагъайдни сыныфбышда бина джурайба вобна. Манчина бина гьинчиле хаlдда сенбына гьихъа алявъуна вобна. Хаlдни мактабее даркашийвалла вухьайхъа гора, 1-4-ъэсди сыныфбышин дарсыбы йиссейни мактабее алгъааl. Шаца хивни инсанаршини дагъамийвалибышиква делесвалейнче танышхьес махъа республикайна хааlрна Сергей Меликов ары. Манке илгъечlуйни горушее джамаъаlтын джо водни дагъамийвалла цIыцIааъани ишбышиква мана танышау. Манчини аlрайл’ мактабна мисалаб вухьана. Амма къийнаб мани сардан ненаджаб иш вукку дешда.
Дагъайдни сыныфбышди мактабыхъаб даркашийвалла вухьейиб, манчин хъаlдхъыйс зарар гьели деш. Мааъаб ишлемишоохьени маъаlллимарше чини къайдал’ дарсыбы ыккеканбы. Манчиле гъайре манбыше гыргыни байрамбышин уфтанын тадбырбы алгъайгьенбы.
Къийна мааъад 56 шыгыртын тербие, ацlаал’ аляатlа. Манбышис дарсыбы джаван маъаlллимарше гьели. Аlлиева Айгюл’ мактабейхъа ишлемишхьес хъарына 26 сен водун. Мана йидж Мишлешни хивейнчена ворна. Маlнкьыни увгьойка, джес сабара сенбына ешли маъаlллимаршика ишлемишийхьес кьисматхьайн. Манбы Мазгарова Марзият, Аlлиева Дестегул’, Аlлиева Фатlимат маъаlллимабы вухьа. Манбышди гьаарынкъее хьоцlалиле агъаллан ыlмырен сенбы мактабыс къадсыр. Къийна манбы пенсией вухьейиб, мактаб кlелихаъана деш. Мактабни тадбырбышее манбыше гьар вахтал’ иштырак гьаъан. Гойне хьинне А.АIлиевае джес цlеддыйн дарс гьувона маъаlлима йикlел’ хъаляйъу. Мана Мишлешни хивее ишлемишейхьена АIштиева Джемилет маъаlллима ворна. Мактабни къийнийни йигъыке гаф гьааъанкъаl маlнкъее увгьойн: «Йидж ишлемишейхьени сенбышее, мактабейнче хаlбба доюкан ушахар хъигъебчlы. Къийна манбышда гьаарна са сурал’ ишлемишехьи ворна. Манбышди аlрайл’ хаlбба эскерын санаъаlт сечмишауйн джаванар вобунбы. Манбышди командираршини доюле экlда-экlда шалхъа таlърифын кагъызбы хъадайли. Манчиныд йишда мактабын, миллетын до ахты хъаъа».
Магьмудова Муъминат маъаlллимаршини хизане хаlр хъийхьа. Маlнкъына дек’ Шамсуддин маъаlллим хаlдда сенбына къийна йидж ишлемишейхьени мактабыс директорийвалла гьавъу. Ед’ Дестегул’ маъаlллима дагъайдни сыныфбышда маъаlллима йихьа. Къийна маlнкъее ед’на джига авхъу вобна. Маlнкъыни йаlххъын аlл’гьааl. Ушахаршис югун билиг гьелес чалышмишейхьи.
Раджабова Наргиз мактабее чалышмишейхьена кlылба вахт дешда. Маlнкъее заквани ихтилете увгьойн: « Зы нимеехьее йизди ишиле разийра ворна. Мактабни даркашийвалла ил’дяакы, чалышмишейхьена дарсбы гьагуйни саягъыл’ ыккейс. Йишда гыргынкъуна мурад шас тезе мактаб аляуй водун. Манке йишда иш сыкыlлбаб гьаракатехъа хъавалес».
Къараева Фаина мактабейхъа маъаlлимийвалла гьааъас хъарына ёкьудле сен быкырхьа. Мана Муlхаlхни хивейнчена ворна. Джени ихтилете маlнкъее джес мактабее дарсбы гьувона Мазгарова Ал’бина маъаlллимыс таlърифбы агъмишау. Къийна йиджейид маlнкъык акар йихьес гьаlракатаъа.
Йизын макатбейдын горуш 23-ъэсди феврал’ къадсырийни йигъынджахыква сайидхьу. Ушахарше хъаlдаххъани шечlбышис, гьаъани маlънийбышис зы югна кьиймат гьуво.
Гьел’бетди, сагъулва зы манбы гьаlзиравъуйни маъаlллимаршикIле эйгьи. Гьасре манбышис югун шыгыртар камдяаъанбы.
