Апрельни кьоIдъэсди йигъыл’ дюнйейл’ ушахаршини китаббышин йигъ алгъайгьи. Манчина метлеб вобна китабеенче ушахыс тербие, ацIаал’ гьувой.
Ушахаршини китаббышихъад джурабы водунбы. Манчин сабарабы художественный адабият водун. Шенсабы ацIаал’, гьаIракат артымишаъанбы. Къийна ши ушахаршини художественный адабиятни гьаIкIеени китаббышди гьаIкIее гаф гьаъас. Мани адабиятын китаббы ойкIананбышикIле ушахаршин язычер эйгьи. Ушахаршини художественный адабиятни китаббышихъадыд жанрыбы водунбы . Энки хуруни ушахаршин адабиятылхъан гьавас джитIани шечIбышиква, месалабышиква, тапмаджебышиква гийгъал. Манчин ушахаршин юшонавъуй гьаIракатеехъа адаччи , четинда эгьес эйхьен сесбы эгьес хаIбхъааъа. Хъийгъа язы окIанас ва хъаIдхъас хаIбхъувхьайле хъийгъа, хурун шечIбынан, хабарбынан, мехварнан китаббы хъаIдхъас хаIбхъааъа. Мани ушахаршини асарбышихъаб ушахаршини ешес сикIына маIъна воохьи. Манчини хаIддананбы тербиейква, табиятыква, ишиква, гьаIйванаршиква багълыдананбы эхьи.
Ушахаршини язычерше джони асарбышее гьаIйванаршини донеенче инсанаршин хасиятбы ( аIмалбы, гьорбы, пахылийвалла, кубытийвалла, хъаIл ва медынбы) гьагва. Ушахаршини асарбышее гьаммаше раIгьимийвалла хъаIлыле гъамоохьена. Шас йикIел’ водун, хурбананкъаI ши ушахаршини шааираршин К. Чуковскийн, А. Бортойн, С. Михалковын, П. Ершовын, С. Маршакын, А Кольцовын,А. Пушкинын, И. Крыловын, М. Лермонтовын , Р. Рашидовын, Гь. Цадасайн ва мебынбышин китаббы гейдни гьавасыква хъаIдаххъа ыхьа. Ши манчика оIгунмишоохьи ва баIстбы гьаъа ыхьа, ненкъвеейий хаIдда китаббы хъаIдаххъава. ГьаIшде замаана бадалывхьана. Китаббы ушахни ыIмрее телефонеени оIюнбышиква бадалхьа. Манаб югна хабар дешобна.
Манчихъа ил’дяаку, гьаIшдеб ушахаршис китаббы ойкIанан язычераб вобунбы ва ман китаббы хъаIдаххъан ушахарыб вобунбы.
ЦIаIхбышин ушахаршин адабият артымишехьи ХХ-ъэсди асырни аIхрее гидгъыл. Ман аIсас оокIанна цIаIхна миз’ аIрайлхъа хъабыйка багълыда .
ЦIеддыйн ушахаршисын шечIбы, хабарбы, меххвар цIаIхни мизел’ Селим ДжаIфарове, Дабуз Джаббаре, АIчилей Гьарунее одкIун. Манбыше гьам цIаIхни мизелхъа дагъыстанни, россиейни, хаариджий оIлкабышди ушахаршини язычершин асарбы сакIалау. Манчин сабарабы мактабни китаббышеехъа эчIу.
ЦIаIхни адабий мизел’ ушахаршисын китаббы чапыкее ХХ1-ъэсди асрырни кьома къекка гидгъыл. Къийна, эгьес эйхьи, шахъад ушахаршис одкIунийн асарбы, китаббы водунбы. Къийна ушахаршис одкIунийн асарбы АIбдураIгьим Дадашовыхъад, ВаIгьид Мирзоевыхъад, Валегь Гьамзатыхъад, АIбдурагьман УлуцIаIхийхъад, Гул’нара Керимовайхъад, Ханпери Назировайхъад, Камил’ Шамхаловыхъад, ДжуIма Сувагилийхъад, АIгьмад Давудовыхъад, Рашид Мирзоевыхъад водунбы Манбыше одкIунийн ушахаршисын асарбы «НУР» кIазетее, «Лачин» журналее ва джурабаджур Россияйл’ ва Азербайджан къайиккыйни анталогиебышеехъа гядкIу водунбы.
Джурайда ушахаршисын китаб «КIаарна биссий» шааир Гьамзатын чапыке МаIгьачкъалее хъигъечIу.
Китаб «КIаарна биссий» В.Гьамзатее пайис ушахаршис одкIун. Махъа садджу хурни ушахаршис ва мактабни шигыртаршис уйгъунын шечIбы гядкIу. Манчини аIрее поэзиейни къайдал одкIунийн ушахаршисын хабарбы водунбы. Китаб хыляхъа алетIункъаI, ул’ шадоохьи. Гьам маIънаквани шечIбыше, гьам уфтанни шикыл’быше, гьам къекIвани кагъызын манчис гудж гьооли. Китабехъа джуни шечIбышиле гъайре , вуджее цIаIхни мизелхъа сакIалауйн шааираршин- С. Стальскийн, З. Кьафлановын, М. Саидын, С. Увайсовын, К. Мазаевын, А. Пушкинын, М.Лермонтовын, Ф. Шиллерын, Ф. Скоринын, О Мандельштамын – шечIбы гядкIу. Ман цIеддыйн маIгьдын хаIдын къулай водун.
Шаца ушахаршис ед’ни мизел’ одкIунийн Ханпери Назировайн китаб « ЦIеддыйн нубгар» чапыке хъигъечIу. Манчеехъа гьар джура сюжетбышикван ушахаршини ыIмрени гьаIкIеедын хабарбы гядкIу водунбы.
Манчиле гъайре, шаца Фазил Дашлайн ва Артур Дашлайн китаб «ЧIорай» цIаIхни мизелхъа сакIалауйн чапыке хъигъечIу.
Къийнад чапыс гьазирауйн китаббы водунбы. Инам гьаъан, манчикIлед ишигъ къаджесын.
