ГьуIрматыкван Исламни динын чоджар, йичибы! Сабара йигъбына гьихъа йишди Пейгъанбар МуIгьаммад (с.аIл.с.)уммайна аIзизна Рамандина ваз эвчIу.  Манчина гьуIрмат авхъуй   Исламни диныс ыIбадат гьаъани гыргыни инсанаршилхъа бирмишавъуна фарз вобна. Мана мусурманаршина эн дилягбы, доъаIбы кьабылаъана ваз вобна. Рамандин инсанаршини аIреедын муIгьуббат саджигее манзикее гьаыйни кубарше, саджигее гьахувыйни сиварше уIтумаъа.  Шукур Аллагьылхъа,  гьаIшде дин гьаъани инсаныс мешат ачухда гьаъана дешда. Манчихъа гора, каамил’ни аIкIеелени, джан сагъни инсанее ыIбадат гьаъас ыккан.

Р

амандини вуза динни гьаIкIе­едын маджлисбы, мавлидбы алгъавгьуй, саджигеедын кубар гьауй, таIрмыгьеехъа сабый, ифтар джамаъаIтыква гьауй хаIдни суваабыс гьыIсабехьи. Мана сунна вобна.

Пейгъанбар МуIгьаммадни  (с.аIл.в.) гьаIдисе эйгьен: « КьоIйре мусурманий сана-санкъука хъызаахы, хыл’-хылес гьуво горушмишивхьайнкъаI, манбы гьале сана-санкъуке къирагъламишивхьессе джад, манбышин гунагьбы гьойгъаланбы».

Рутулни районее йихьыдле миллетбы: рутулбы, цIаIхбы, лакбы, лезгибы, азарбайджанлыбы, аварбы ешемишехьи. МанчикIле сабаранбыше кIылин Дагъыстан эйгьи.  Гьар миллетхъаб джона миз’, джон маданият ыхьейид, ши гыргыба са динын чубара ва йичибы вобунбы. Манчин йишин аIреедын муIгьуббат гьалед утIумаъа. Манчихъа гора, диныква багълыданан чIакIын маджлисбы ши санад-саджигее маIргьаматыква алгъайгьи.

Гьайни сенид ман югун , шадын, суваабыкван йигъынджагъ саджигее алгъавгьу.

Апрельни 5-чил’ МаIгьачкъалее, тезеба аляаъани ЫIса Пейгъанбарни дойил’ни йыIкьнекни манзике Рутул районеенче хъигъебчIуйни джамаъаIтна ифтар вухьа.

Мана маджлис гьааъасда мисл­ягьаIт районни имамарше къавдже. Мана гьааъасын кумаг Рутул районеени фонд «Инсанын» гьуво. ШакIле ацIан , маIгьдын диныква багълыданан маджлисбы алгъагьас гьоIкуматын пыл къекка деш. Манчихъа гора, харджийбы инсанаршинбы ыхьа. Гьаарункъвее джуни кьул’пеенче гехьан кумаг гьувы. Манбышди гьаарынкъус баракат Аллагье гьевлена, аIхратыл’ кумаг аваакен. Маджлис алгъаагьас мислягьаIтбышиква хаIдын кумаг республикайни муфтиятын, Дагъыстанни динэгьлершини управлениейн гьувы. Манче ваъаIзбы , нашидбы хъаIдхъасын ааIлимар абы.  ХаIдын кумаг джегьилерше- волонтёрарше гьаы. Манбыше маджлис илгъевчIесын джига гьазирау, сиваар гьихелесын хорагбы хъодхьур, йиджбы суфранылхъа гёку. Мани йигъыл’ манбыше манзикее ушахар гьуваагасда  кундж гьазиравъу. Мааъад джурабаджур истирагьаIт гьаъасын ва гьуваагасын батутбы, карусельбы гиххьы.

Маджлис нашидбышиква гибгъыл. Мана нашидбы хъаIдаххъани Султан Трамове вукку.  Манкъвее маджлисеехъа сабыйнбы цIебба Рамандини вузака табрикавъу, гойне маджлисеехъа абыйни инсанаршис джуваббы гьуво. ЦIеддыйн джуваб «Нур» кIазетни хааIрни редакторыс, джамаъаIтын ишбы ыккеккани Байрам АIбдуллаевыс гьуво. Манкъвее  марахыкван чыхыш ыккы. Б.АIбдуллаеве ифтареехъа абыйн мусурманар Рамандини вузака табрикавъу. Мана маджлис къурмишавъуйнбышикIле сагъул-варул увгьо ва маIгьадни маджлисбышда кьувват ашкаравъу. Гойне манкъвее мураджият цIаIхни  джамаъаIтылхъа  гьау: «ГьуIрматыкван чоджар, йичибы! ГьайнягьаIдни маджлисбыше ши са джигеехъа сааъа. Ши саджигеенанкъаI, йишда гудж вобна. Шос хааиш гьаъан, шу ыIбадат гьаъанкъаI гьабтIыйнбышилхъа раIгьмат къихевле. Къийна дюнйейл’ писда вазият вобна. Аллагьыке гьеххъе дилягбы мани писди гьаIдисабышике йишин чоджар , йичибы къорамишееъэджин. …»

Гойне мани маджлисее районеенче абыйн къуллухчера, динэгьлер, имамар, депутатар ва мебын дойикван инсанар йишон вухьа. Марахыкван динни гьаIкIеедын ваъаIзбы гьелен чыхышбы Дагъыстанни муфтиятни эл’чее ГьуIсейн ГьаIджиеве, Рутулни районни имамаршини садрее ГьаIзрат Кьадимове, ЦIаIхни дерайни хааIрни имаме Эл’дар гьаIджее, Мишлешни хивни имаме Сабир гьаIдже гьау.

Гьар ваIъазбы гьелени чыхышбышди аIрее-аIрее муадзинарше нашидбы хъаIдхъы.

Маджлисе югни ваIъазыкван чыхыш Дагъыстанни муфтиятни садрее МуIгьаммад Майранове  гьаъы.

Манкъуни ваъаIзбышиле хъийгъа,  хаIнелин он аляъа гидгъыл, сиваар ачмишаъана вахт хъабы.  Маджлисеехъа абыйни инсанарше саджигее  сивар гьахувы. Гойне саджигеедын кубар гьау. Манчиле хъийгъа меб маджлис цIыцIавхьа. 

Дагъыстанни муфтиятни сураке исламни динни йаIхъеххъана иш сербестба вуккекани динэгьлершис, имамаршис дипломбы гьуво. Манчис лайикьавуйнбышди аIрее йишди цIаIхни дерайна имам Эл’дар гьаIджий ыхьа.

Рутул районе ешемишехьени миллетбышда ифтар дилягбы гьеххъани доIъайка таамхьа. Я раббин я Аллагь инсанршини йикIеедын дилягбы быкырхьенбы! Аххъыйн сиваар, гьауйн кубар, гьеххъыйн доъаIбы, Аллаге кьабыляъанбы! Аамин!