Гьайни йигъбышил’ Россиейни гыргыни йыlкьнекни мактаббышее аlхырейни зенгыс къадсырыйн йигъынджахбы илгъечlу. Рутул районын мактаббыд мани йигъыс югда гьаlзирхьа.
Цlаlхыйни дерайл’ни мактаббышейид манчика багълыда уфтанын тадбырбы ыхьа. Гыл’мецlни, Муслагъни, Мишлешни, Джинаlгъни хивни йыlкьнекни мактаббышее алидын сыныф таамаъани шыгыртаршика саламатламишувхьайнбы. Цlаlхыйнийий Миххьегlни хиваршее мактаб быкыраъан шыгыртар девхьайхъа гора, аlхырейдын зенгбы ыхьа деш.
Гьайни сен Гыл’мецlни хивын мактаб са шыгырте, Муслагъни хивын мактаб са шыгырте, Мишлешни хивын мактаб йихьни шыгырте, Джинаlгъни хивын мактабыд са шыгырте быкырау. Мактабни директораршини увгьойка, 2022-ъэсын сен къоокани ушахаршини сайыс сикlы касибын ыхьа. Манчихъа ил’дяакы, аlдат гьуваджы гыргынанкъаl тентенейкван йигъынджахбы алгъавъу.
Аlхырейни зенгыс къадсырыйн йигъынджахбы мактабни директорарше аахъы. Манбыше мактаб таамааъани шыгыртаршис угъурбы аlрзау. Геледжагъылийсын дилегбы гьеххъы.
Муслагъни хивни йыlкьнекни мактабын гьайни сен 41-ъэсын ушахаршин къайиккый ыхьа. Гьайни сен хивни мактабыхъад алидни сыныфее са ушах ыхьа. Манар ючlыдъэсди сыныфна телеба Ыlсмаилов Шамил’ ворна. Йигъынджах Урудж маъаlлимее ахъы. Манкъве мактабни майдамейхъа сабыйни маъаlллимаршис, ушахаршис, хивни джамаъаlтыс, абыйни мигьманаршис хошгелди гьавъуйле хъийгъа, приказ хъаlбхъы. Манчиле хъийгъа, джуваб мактабни директорыс Мустафа Магьаlррамовыс гьуво. Манкъве джун чыхыш мактабни таарыхыке гидгъыл. Хъийгъалетти Муслагъни хивейнче хъигъебчlыйни доюкани ааlлимаршини ва джурабаджура ишбышил’ ишлемишоохьени инсанаршике гаф гьавъу. Манкъуни увгьойка, гьайни сен хъаlдхъее мактабын югун натийджабы гьагу. Ши гьавъуйни ишис сикlы Рутул районни хъаlдхъыйни управлениейн ахтына кьиймат гьуво. Чыхышни аlхырее М. Магьаlррамове мактаб быкыраъанкъус югда имтагьаlнбы хъелес аlрзау. Манкъуле хъийгъаl чыхышбы Шамильни сыныфни регьбере Ыlса Гьаlсанове, манкъуни деккее Гьаlджий Ыlсмаилове, манкъус дарс гьувойни Пирдавуз маъаlллиме гьау. Манбышди гыргынбыше Шамиль йикlейнче табрикау.
Шамилее мактабни гыргыни маъаlллимаршис джанана сагъвалла аlрзавъу. Джус билиг, ацlаал’ гьувойхъа гора, миннатдарийвалла агъмишавъу. Гойне хьинне санасанкъус пайбы гьуво. Мактабни шыгыртарше мани йигъыс гьаlзирауйн шечlбы хъаlдхъы.
Йигъынджахни аlхырее мактабни магьалле аlхырейдын зенг ыlхыl. Махъа сабыйнбыше мактаб быкырауйнкъука едигарыс шикыл’бы цlыцlау. Муслагъни хивни йыlкьнекни мактабе мани йигъыс къадсырыйн йигъынджах мыкlаршика таамхьа.
Шинад гыргын мактаб таамгьауйни джегьилнршис угъурбы аlрзаъа. Манбыше югда садибын имтагьаlнбы хъуво, джос ыкканни аали мактабышейхъа иккебчlес кьисматхьенва эйгьи.
