Къийна Рутул районын геллесын фермерар малкъарайка сувабышил’ ейлагъбышее вобунбы.

 

Сувалхъа хъабыйн фермерар  ейлагъбышиле гееб разийба вобунбы. Манбышди увгьойка, сувабышил’ни оlришбышихъад малкъарайс гьеххааликана окl вобна. Манчика саджигее давараршед югун чеки саъа водун.  Коч таамхьессе даварарше 6-7 килона тавулхъа хъалес.

Сувалхъа давараршика хъабыйни фермераршини сыранее гыл’мецlбышда фермер Имам-гьыlсейин Шириновыр ворна. Манкъуна давараршда бина хивыс делесни сувал’ вобна. Манкъве закани ихтилете увгьойн: «Зы гьар сен даварар кочес ейлагъбышейхъа хъадайленбы. Манбы вардишхьа водунбы. Гьайни сенийн хьинне болун ейлагъбы закlле гьихъа къаджы деш. Гёгъуйбы ыхьайхъа гора,  оlришбы уфтанда кlатыл’да водунбы. Сабара джигабышее окl давараршиле ахтыба вобна. Сувал’ мани сардан дагъамийвалла дешда. Къийна ши кlылба-кlылба кьыlдмийс гьаlзироохьи вобунбы.  Кьыlдмийс  окlый кlорма саъа гибгъыл вобунбы. Даварар сувале гечlессе, ман джигабы гьаlзирда ихьес ыккан».

Муслагъалий Баширов Радикни биригадейиб мани сардан вазият писба дешобна. Манкъуна ферма югни джигее вобна. Манкъуни увгьойка, юххьан ыхьайн гейбы уфтанда парпаламишхьа водунбы. Ахуйн даварарыд югда водунбы. Гьавъуйни заlгьматыс сикlы,  даварарше уфтанын чеки сауйн.

Районни медни тасарруфатбышейид вазият югба вобна.  Дамазлыгъбы итки  дена  водунбы. Манбышед сен югда хъадыва эйгьи вод. Гьайни сен сувалхъа кочехъа хъидябыйн тасарруфатбыд водунбы. Манбыше джон дамазлыгъбы Ставрополни оlришбышилхъа хъиккы.

Ейлагъбышейхъа хъадыйн дамазлыгъбы цывыл’ хъалесмее сувабышил’ ихьес. Гьаваабы мыкlа хъыхьамее, манбы къышлагъбышейхъа кочес хъигъебчlес.