Совет гьуIкуматни вахтал’ Кавказ, Дагъыстан туристаршис геед кьабылехьен джигабы ыхьа. Амма оIлка дагъылмишхьайле хъийгъа, гьиняаъад истираIгьат гьаъас вуккананбышин сай къат-къатна кIыл’ хъыхьа. COVID-19 пандемиейн мани сардан вазият югни сентилхъа абчы.

 

Мани вахтал’ доюкан хаариджийн маршрутбы багъламишехьи гидгъыл ва инсанарше адни туризмайлхъан гьавас гьагу.  Гьайни сен къыIлини вузаршее оIкае 25 милйон инсане истираIгьат гьау. Пандемиейле гьихъа халкьыхъад маIгьдын марах ыхьа деш.

Увгьойбышихъа гора, сентябрьна ваз гивгьалассе Дагъыстанэ 1,5 милйон турист ыхьа. Туристаршис энки кьабылехьен джигабы Дербент, Сулакын каньон, Сарыкум, веранувхьана хив Гамсутл’ ва медынбы. Гьелбетте туристаршис гыргынчиле гьихъа дерягьни къырагъылин истираIгьат кьабылехьи ыхьа. Диндж алятIас йишди республикехъа абыйнбышике мигьманханабышее, истираIгьатни базабышее маджал дешдий.

Быкырни дюнйейл’ туризм экономика гьаракатехъа адаччен чарх водун. ДагъыстанI истираIгьат гьаъанбышин сай хаIдхъыхьайке, тезе ишджигабы ачмышехьи, инфракъурлышис фыкыр гьооли. Сувал’ни районбышейид манчилхъан марах ашкархьа. Садджу Ростуризмайн республикайс пляжын зонабы ва туризмайн милли маршрутбы къурмышаийниме 132, 1 милйон пылнын гьелес.

Гьайни сен хил’дже туристар Сувал’ни маIгьалылиб вухьа. Гьелбетте, уфтанни джигабыше, табиятын манбы гьаIйран гьавъу. Туристар къаджейнчиле гееб разийба авху. Амма манбыше гьиняаъад аIдатый истираIгьат гьауйниме, туристаршис къулайкван шарааитбы яратмишааъас ыккан. Манбы ыхьее, йишин гивъур-сугъооцый къаджес вуккананбы гееб хаIбхъивхьес.