Сентябрьни 15-чил’ йишди республикее Дагъыстанни миллетбышин Садибын йигъ алгъайгьи. Дагъыстанын миллетбы гьаммаше югни –писди вахтал’ санаб-саджигее вухьа. Мани байрамыс къабсырна маджлис МаскIавни шагьарее илгъевчIу. Мааъад ЦНКА иштырак гьаы. Сентябрьни 15-чил’ йишди республикее Дагъыстанни миллетбышин Садибын йигъ алгъайгьи. Дагъыстанын миллетбы гьаммаше югни –писди вахтал’ санаб-саджигее вухьа. Мани байрамыс къабсырна маджлис МаскIавни шагьарее илгъевчIу. Мааъад ЦНКА иштырак гьаы.
Йишди республике 30-ле агъаллан миллетбы ешемишехьи. Манбышди гьаарункъухъаб джона миз, джон таарых, джон адабият, джон маданият водун. Анджах манбышихъад са хасиятбы, акаран аIдатбы, гювъур- сугъоцый водун. Ватаныс къорхунанкъаI, манбы гьамбаше мислягьаIтее вохьи. Са миллетин уцIур , шениса миллетин водун; са миллетын шадлыгъ. Шениса миллетын водун. Дагъыстанни миллетбышди таарыхе хаIдда гьаIдисабы ыхьа. Манбы гьаммаше саджигеехъа сабы къабни душманаршиква вурушмишивхьа, республикайна абыр, ламус , сифат гьувааджы.
Сен-сениле мани байрамын сергьатбы хаIдхъехьи водунбы. Йишди гьоIкуматни субъектбышил’ , джурабаджур шагьарбышее Дагъыстанни таарыхыс къадсырыйе конферециебы, маджлисбы , концербы илгъечIи. Гьайни сен, тезеда. Дагъыстанни миллетбышди Садибни йигъыс кьадсырыйн йигъынджагъбы МаскIавни шагьарее илгъечIу. Мани маджлисее иштырак ЦIаIхни миллетни маданиятни автономияйни (ЦНКА) эл’черше , кьома садрыйква Рафаэл’ АIлиевыква гьау. Маджлисеехъа МаскIав ешемишоохьен цIаIхбы тамашейс абы. Мааъад цIедда Р. АIлиеве къхувыйн цIаIхни миллетни гьаIкIеедын кино гьагу.
Гьайни элейс цIаIхбышин маданият, фольклор, мыкIар, маIънийбы Астарханни шагьареенче адыйни мыкIаршини дестейн «Легенда Кавказа» гьагу. Мани дестейс хаIбвалла йишди цIаIхбышди джегьилее, Мишлешни хивеенчени ичее Аидее МагьаIммадни гьааъа. Манкъее джени дестейква саджигее йишди атабабабышин йиссейн мыкIар ва аIдатбы гьагу. Тамашейс абыйни гьар джура эл’бышди инсанаршис манбы хошда ва марахда хъады. Гьар тамашейле хъийгъа утIумын гапар гьау ва манбышис тIетIбышин тIуччера гьуво.
Ман маджлисее дихъатукван цIаIхбышди таарыхни, мизени, миллетни гьаIкIеедын чыхыш ЦНКА-ни садрее Рафаэл’ АIлиеве гьау. Манкъуни увгьойка , геледжагъыл’ йишди миллетыква багълыданан гьар джура маджлисбы чалышмишивхьесынбы экIда-экIда алгъагьас.
МаIгьадни маджлисбыше йишин миллет саджигеехъа саъа, муIгьуббатбы утIумаъа, йишин дагъамийвал’бы бил’дираъа ва маданиятын сергьатбы аIкьхъаъа. Гойнеб инсанар сана-санкъука хъызаахъа, горушмишоохьи, танышёохьи. АIреенче югун мислягьаIтбы хъигъеечIи, — Р.АIлиеве увгьо.
Мани йигъыл’ байрамеехъа сабыйни инсанарше Дагъыстанни кIухняйни хорагбышике дадбы гьаы.
Байрамеехъа абыйни тамашечерше аIхрее саджигеедын шикыл’бы цIыцIаы.
