Украинее спецоперацие алгъааIн ючIуIбле ваз быкыроохьи. Манчина метлеб Донбасс ешемишехьен урусни мизел’ юшенаъан джамаъаIт укранацистаршике къорамишауй вобна. 2014 ъэсди сен Украинее кьаанун дешин чапхын ыхьа. Манке джамаъаIтын сечмишавъуна гьуIкум къатмишавъу. Донбасс ешемишехьени джамаъаIтыс ман кьабыл’хьа деш. Мааъад митингбы, наразийваллабы гидгъыл. Инсанар мислягьаIтеехъа хъабыйнбы, Украинайни къурлушеенче хъигъебчIес. ГьыIдчатбы садкIылыйнбы даIвъий-дарамабышилхъа. Украинайни армиейн ва медни силагь ташкилатбыше Донбасс ешемишехьени инсанаршилхъа ярахыква басхынаъа гидгъыл. Мани цIаехъа кьыш Авропайни сабара оIлкабыше Америкайква саджигее кIяъы .
Гьел’бедти, Росссияйныд Донбасс ешемишоохьени инсанаршин тераф аххъы, манбы къорамишааъа гибгъыл. Сен-сениле мани къаламакъалын сергьатбы чIакIы хъыхьа. Хурын алдабхьынийбы даIвъийбышилхъа садкIыл. Эгьес эйхьи , дюнйе кьоIни суралхъа хъыхьа. Авропайний , Къузайлин Америкайн джони НАТО-ни къошунбышиква Украинайс ярахыква кумаг гьели гидгъыл. ДжитIада, манбыше Украинайн джамаъаIт Россияйква вурушмишхьес аликкы. Къийна Украинайс хаIбвалла Америкайний Авропайн гьааъа вобна. Манчихъа ил’дяаку, референдумыле хъийгъа, Россиейн Донбассын республикабы ( Донецкна, Луганскна) ва Запорожиейний Херсонын вилаетбы джони таркибеехъа аккяы. ГьаIшде, Россиейни кьаануныква, Украинайни армиейн Россиейн чIиебы водунбы аххъы. Россиени армиейн, росгвардиейн, джони раазиваликва даIвъийеехъа абкIынни адамерше, едарше манбы душманаршике темизяъа водунбы.
Украинее аIлгьаани спецоперацие иштыракаъанбышди аIрее цIаIхбышин джегьилерыб кIылба дешобунбы. Манбыше джон бордж Ватанни гьийдын игитерше хьинне хъели. Ши чалышмишоохьенбы, гьар « Нур» кIазетни нумрабышее манбышди гьаIкIеедын маIълумат гьелес.
Къийнийна гаф мишлешбышди игитершикена вухьес. Манбы ГьаIйдароваршини хизанеенче хьебыйре чодж – Шагьмур, АIриф, Рамазан вобунбы. Хьебырсана чодж Мишлешни хивее едике вухьа, мааъаб чIакIы хъувхьа, Мишлешин йыIкьнекин мактаб таамау. Хьебни сана чоджее эскерна къуллух сечмишавъу. Манбыше кантрактбы одкIун, Чечнеени войисковой частбышил’ эскерийвалла гьааъа вобна. Рамазаныр, АIрифыр, Шагьмурыр цIайике ва хьинеке илгъебчIуйн джегьилер вобунбы.. Манбыше медни вурушбышее, даIвъийбышее Россиейн тераф ярахыква къорамишау. Мани карее манбы хъобхьур –къооджуйн игитер вобунбы.
Къийнаб манбы Украинее аIлгъаани спецоперациейн иштыракчера гьыIсабоохьи. Манбышди хьебынкъуни сана гьунарбышис, гьаIракатбышис гьоIкуматын, командирарше, джони эскер-достарше ахтыйна кьиймат гьооли.
Гьайни сен, къыIлина Россиейни Президентыни Владимир Путинни амурыква ГьаIйдаров Шагьмурыс Джаватни дихыс Украинее аIлгьаани вурушбышее кьаIгьраманна игитийвалла гьаагуйхъа гора ва душманар есирна авхъува, орден Мужества гьувы. Ман хаIбни дараджайкван гьоIкуматын орден водун. Шагьмурее хьебни хаIдни укронацистаршиквани вурушее иштыракаъы. Мааъаб душманыле гъамебхьайнбы. Сабарабы манбышин гьаIлакавъуйнбы , сабарабы есирна авхъу. Хьебыдъэсди наемникаршиквани ( полякар, американлыбы, инглисар, румынар, французар ва мебынбы) вурушее Шагьмир яраламишхьана. Манчихъа ил’дяккы, вурушеенче хъигъечIу деш. ДушманыкIле цIаIхигъалийн зор, сувабышда гудж, бабадидершин рыIгь гьагуйн. Манче Шагьмур госпиталеехъа хъыккы. Маалидже гьауйле хъийгъа, йишда игит’ мер джуна къуллух гьааъас частилхъа саркIыл’.
Шагьмурын чоджар: Рамазыный АIриф къийнаб вуруш аIлгьаани гьийбни къирагъыл’ вобунбы.
МаIгьбын йишди заманайн кьаIграманар, шахъаб гьар хивеенченбы вобунбы.
Ши хааиш гьаъан, манбышди гьаIкIеедын маIълумат шасхъа гьихьареъэ. Сасса вахтал’ шалхъа хабар геджба гьивийхьар.
Гьайни джегьилершини гьаIкIеедын маIълумат шас Мишлешни хивни администрациейни хааIрункъвее Ислам Ибрагьимове гьуво. МанкъукIлед сагъулва эйгьи.
«Нур» кIазетни редакциейн аIрзаъа гыргына спецоперацие иштыракаъан йишин игитер сагъба- саламатба, душманаршиле гъамувхьа джони хизанбышеехъа савкIаланбы. Амин!
