Гьар сенни аIхрее Дагъыстанни журналистаршини Союзын прессайна бал алгъаагьа. Мааъад оIт’мишивхьайни сенийн екунбы ыIхийха. Гьар сенни аIхрее Дагъыстанни журналистаршини Союзын прессайна бал алгъаагьа. Мааъад оIт’мишивхьайни сенийн екунбы ыIхийха.
Иш къулайква вуккуйни, вааджибын макьалебы одкIунни ва проектбышее иштырак гьаы къамувхьайни журналистаршис мукафатбы, грамотабы, дипломбы гьели. Мани маджлисе гьоолена эн хаIбна пай «Къизлена чалагъан»( «Золотой орёл») вобна. Шацыйни сен «Золотой орёл» «Нур» кIзетни редакциейн алебтIу. Мана гьувона ХаIбни Ватанни даIвъийни ветеранаршини гьаIкIее кIазете одкIунни макьалебышис. Гьайни сен мана табасаранлыбышди кIазетни редакциейн алебтIу.
Грамотабы гьеленбышди аIрее йишди миллетни мизелин радио-телеверлишбы ыккеккана Керимова Гул’нара АIбдураIгьимна йиш йихьа.
ГьаIкIерар мана цIаIхбышда Левитан ворна. Гул’нара цIаIхни мизел’ни радиое ишлемишейхьен хаIдда сенбы водунбы. Эгьес эхьи, мана едини мизел’на радио ачмишауйле хъийгъа, мана мааъар ворна ишлемишеехьи. Мани сенбышди аIрее Гул’наре джени ишини гьамбазыква Юсуф Бабаевыква аазырбышиква радиоверлишбы гьазирау. Йигъыс мичIееб манбы эфиреехъа хъигъебчIу ва миллетыква багълыданан хабарбы инсанаршилхъа гьихьарау. Манбышди редакциейни студиее ааIлимар, динэгьлер, спортсменар, сиясатчер, дохтурар, телябабы вухьа.
Сабара сенбышиле хъийгъа ГТРК «Дагъыстан» цIахни мизелин телеверлиш ачмишау. Гул’нарайс хааишауйн Юсуфыква саджигее ман верлиш ыккейс. Мана барабарра кьоIни ишил’ ишлемишехьи гиргъыл’. Сасса вахтал’ телеверлиш гьазираъасдимее, Гул’нара съемочный дестейква Сувал’ни маIгьалылхъа ва медни джигабышеехъа гьаейкIан. МаIнкъее джена иш къулайква, мерынкъулхъа гьидябсыр гьааъана.
Г. Керимовайхъад медын шааираршин баджарагъбыд водунбы. МаIнкъее ушахаршисын шечIбы, меххвар, хабарбы ойкIан. МанкъыIн сабара асарбы «Лачын» журнале ва дагъайдни сыныфбышди адабиятни китаббышее гьели водунбы. Манчиле гъайре, Гул’наре йишди шааираршин шеирбы, ааIлимаршин текстбы хъаIдаххъа. Кумаг гьаъас, хыл’ авхъас мана гьаммаше гьазирра еехьи. ЦIаIхни мизелхъа Гул’нарее Фазил Дашлайн «ЧIорай» китабеедын хабарбы сакIалау.
Г. Керимова гьам хизанеедын цIа гьуваджена цIаIхбышда йиш ворна. Адамийква Джебреиликва саджигее маIърафатыкван, тербиейкван ушахар чIакIы хъавъу.
Гул’нарайс ши джанана сагъвалла, хизанее барака аIрзуламишааъа. МаIнкъыке тезе чIакIын гьаIракатбы гозетяъа!
