Гайни сен дагъыстанни радиойн 95 сен быкырхьа. Республикайн радиожурналистар юбилейква табрикааъас  ВГТРК къуллухчер абы. Манбыше йишди гьамбазаршина иш джурабаджурни мукафатбышис лайикьавъу.

ГТРК «Дагъыстан» журналистаршини аIрее ахтыйни наградайс цIаIхни мизелин верлишбы ыккеккана Юсуф Бабаевыр къаджы. Мана мааъар ишлемишехьена хаIдда сенбы водунбы. Мани вахтал’ Ю. Бабаев чалышмишхьана цIаIхбышди ешайишни, маданиятни, адабиятни, аIдатбышди аллан марахыкван верлишбы гьазираъас.

Радиое вуккеккани ишиква янашеба манкъвее «Нур» кIазетейиб хаIбна заIгьмат гьааъа. Редакцие ишлемишехьени 25 сенее мана йишди халкьыква багълыданани джурабаджурни гьаадисабышда  шагьадкар ыхьа.

Юсуф Бабаеве одкIунийни макьалебышин кьаIгьраманар гьарса санаъаIтбышин ессибы вухьа. Манчини аллаб, манкъухъаб миллетни арайл’ хаIбна гьуIрмат вобна. Умудааъана, геледжагъылиб манкъуни журналист ишини  гьаIракатыс лайикьна кьиймат гьевлесда.

«Нур» кIазетни редакциейни коллективын джона гьамбаз Юсуф Бабаев федерални наградайква табрикаъа ва медын-медын угъурбы арзуламишаъа!