25 сенна гьихъа, августни 7-чил, Чечен Республикейнче 500 агъаллани террористарше Дагъыстанылхъа гьуIджум гьавъу. Манбы республикайни БотIлихни ва ЦIумадайни районбышейхъа иккебчIу.
БоевикIаршикена къошин джурбаджурни оIл’кабышди эл’чершике ибаратба вухьа. Манбышис Шамил’ Басаеве ва Хаттабе хаIбвалла гьавъу. ОIгийл’ душманарше Ансалта, Рахата, Тандо,Шодрода хиваршилхъа басхынау. Ерры джаIмаъатын гуджнакани ярахыква хъидёбтIул абыйни мигьманаршике джохъаб гьиджо макьсадее хъидгIынбы гьау. Террористаршини увгьойка, джона аIсас месала Дагъыстан россиейни зулумыке къаттихьанауй водун.
ГьуIджумни цIеддыйни йигъыл’ лайикьыква боевикIаршин оIги садджу инсанаршин ихтиярбы гозетяъани ташкилатбышди ишчерше джад деш ыIхы, манбышис хаIдын кумаг ерры хиваршини адамерше, манбышди едарше, ушахарше, кьаIсинбыше гьуво. Джигайл’ни джаIмаъатыхъаб ярахыкена кеситийвалла вухьа, ярах гыргынкъус чIаIвехьи ыхьа деш.
Террористарше дагъыстанын сабара хивар аххъыйна хабар республикайни гыргынанкъаI еймишивхьайнкъаI, гыргыни шагьарбышенчейий районбышенче БотIлихни ва ЦIумадайни сураххъа интербиргадабышике ибаратнан машинбышин ва автобусбышин къатарбы аттамишхьа. Манбышди аIрее йыIкьнекна джига афгани ва менни ярахыквани гьаадисабышди иштыракчерше авхъу.
Сабара йигъбышиле хъийгъа районбышейхъа кумагыс РФ-ни Миноборонайн эскерар хъабы. 1999 сенни гьаадисабышди шагьадкараршини увгьойка, террористаршихъаб республикайни джурбаджурни джигабышее кумагчер вухьа. Салафитарше хъавалесди душманаршис гуджнакан шарааитбы яратмишаъа ыхьа. ГьидкIурни сангарбышенче боевикIар радавъуйниме артиллерие ва вертолётбы ишлемишау. Ансалтайни хивее гьаммаше ГьаIджимурат Курахмаев йикIел’хъаляъа. Джегьиле вудж салафитаршина тарафдар хьинне гьагва ыхьа. Мана душманаршини ыIгьтибарейхъа иккечIу .Телевидениейни журналистаршиквани гафее манкъве урусар гуллемишааъасынбыва увгьо. Анджах игит ГьаIджимурате хылехъа автомат алябтIу ёкьуйре хъидёбтIулыйн мигьманар гуллелемишавъу. Амма хьоръэсди душманна гулле манкъус кьисматувхьа.
Августни 13-чил «АIмалейн кIыры» донани сувалхъа россиейни эскераршин десант гихы. МичIейд манбышин сувалхъа аIлхъаани боевикIаршикван вуруш ыхьа. Манчиле хъийгъа Къадарна зона террористаршике темизяаъа гибгъыл. Новолаке боевикIаршис аман гьуво деш. Ерры милцебыше ва махъа оIтиравъуйни Липецкни ОМОН-ни эскерарше душманаршикван атышбы РОВД-ни бинейнче гьаъа ыхьа. Террористаршике манбы таIъбы гьааъас даIвхыйнбы.
Дагъыстанылхъа гьуIджум гьавъуйни цIеддыйни йигъыл’ джад террористаршис гьиняаъаб джо гозет’дявъуй баштахьайн. Августни 27-чил РФ-ни правительствайни садрыйкан Владимир Путиныкан ва республикайни хаIрынкъукан МаIгьаммадаIлий МаIгьаммадовукан вертолёт гихы. Районни администрациейни гьийд оIлкайни гьоIкуматни хаIрынкъве душманаршиквани вурушбышее гьаагуйни игит эскераршис ва ерры джаIмаъатыс гьоIкуматын наградабы гьуво.
Дагъыстанэй хаариджийле адыйн банддестебы дагъылмишаий терроризмайквани мубаризе Россиейниме вааджибын аддым ыхьа. Дагъамни йигъбышил’ дагъыстанни халкьыс уйгъунын хасиятбы ашкархьа. Мани гьаадисабышее гьаагуйни игитийваллайс йигъыйре дагъыстанныбы Россиейни КьаIгьраманни доюс лайикьба къавджу. Къийнад йишди республикайни эл’черше джон гьунар СВО гьагва водун. Манбышда игитийвалла оIлкайни ва регионни чIакIынбыше агъмишааъа вобна . ГьаIшде гьоIкуматын манбышди хизанбышис хаIбна фагьым гьооли. ШакIле гьаман ацIа: «Шалхъа гьуIджум гьавъуйни душманыке гьинче сагъра къаттихьанасда чараа дешда».
